শনিবাৰৰ দিনটোত গুৱাহাটীত অনুষ্ঠিত দুখনকৈ গুৰুত্বপূৰ্ণ সংবাদমেলৰ পিছত প্ৰশ্ন উঠিছে হিন্দু সন্ত্ৰাসবাদীৰ তথ্য অসম আৰক্ষীক দিব নেকি অখিল গগৈয়ে?
হিজবুল মুজাহিদিনৰ সৈতে সম্পৰ্ক থকা অসমৰ কেইজনমান যুৱকক শেহতীয়াকৈ আৰক্ষীয়ে গ্ৰেপ্তাৰ কৰা প্ৰসংগত অখিল গগৈয়ে সংবাদমেলত কৰা মন্তব্যৰ পিছতে আন এখন সংবাদমেলত অসম আৰক্ষীৰ বিশেষ সঞ্চালক প্ৰধান পল্লৱ ভট্টাচাৰ্য্যই কৃষক মুক্তিৰ নেতাজনক জনোৱা আহ্বানৰ ফলতে উদয় হৈছে এই প্ৰশ্নৰ।
‘ইছলামিক সন্ত্ৰাসবাদীক কঠোৰ হাতেৰে দমন’ কৰাৰ লগতে ‘শেহতীয়াকৈ আৰ এচ এচৰ প্ৰভাৱত’ ‘গা কৰি উঠা’ ‘হিন্দু সন্ত্ৰাসবাদী সংগঠনসমূহক’ ‘পুলিয়ে পোখাই উভালি পেলাবৰ বাবে আহ্বান’ জনাইছিল অখিল গগৈয়ে।
‘ইছলামিক সন্ত্ৰাসবাদীক চৰকাৰে কঠোৰ হাতেৰে দমন কৰিব লাগে। শেহতীয়াকৈ আৰএছএছৰ প্ৰভাৱত হিন্দু সন্ত্ৰাসবাদী সংগঠনবিলাকে গা কৰি উঠিছে। আৰ এছ এছৰ প্ৰভাৱত গঢ় লৈ উঠা সংগঠনসমূহক পুলিয়ে পোখাই উভালি পেলাবৰ বাবে আহ্বান জনাইছো,’ এয়া আছিল অখিল গগৈৰ অসম আৰক্ষীৰ প্ৰতি আহ্বান।
অখিল গগৈৰ মন্তব্যৰ প্ৰতি সঁহাৰিৰূপে অসমত ‘হিন্দু উগ্ৰবাদী’ গা কৰি উঠাৰ তথ্য থাকিলে আৰক্ষীক যোগান ধৰাৰ বাবে শীৰ্ষ আৰক্ষী বিষয়া ভট্টাচাৰ্য্যই আহ্বান জনাইছিল।
‘তেওঁৰ হাতত যদি তথ্য আছে, তেন্তে আমাৰ সৈতে যোগাযোগ কৰিব লাগে। তেওঁ আহক আৰু তেওঁৰ হাতত যি-যি তথ্য পাতি আছে, আমাক যোগান ধৰক,’ এয়া আছিল আৰক্ষী বিষয়া ভট্টাচাৰ্য্যৰ আহ্বান।
ভট্টাচাৰ্য্যই লগতে কয়, ‘হিন্দু উগ্ৰবাদী সংগঠনো যদি গা কৰি উঠে, তেন্তে আমি তেওঁলোকৰ ওপৰতো চোকা দৃষ্টি ৰাখিম।’
আৰক্ষী বিষয়াগৰাকীৰ এই আহ্বানৰ ফলত ‘ধৰ্মীয় মৌলবাদী’ খেলৰ বলটো এতিয়া আহি অখিল গগৈৰ ক’ৰ্টত পৰিছে।
বিশেষ শাখাৰ বিষয়াজনৰ এই আহ্বানৰ পিছত কৃষক নেতাজনৰ সঁহাৰি লক্ষণীয় হ’ব।
অখিল গগৈয়ে পূৰ্বে আৰ এচ এচৰ কেন্দ্ৰত কিশোৰী-যুৱতীক বন্দুক চালনাৰ প্ৰশিক্ষণ দিয়াক লৈ আপত্তি কৰি তাৰ বিৰুদ্ধে ব্যৱস্থা গ্ৰহণৰ দাবী উত্থাপন কৰিছিল।
