শিৱসাগৰত আজিৰৰ পৰা পুনৰ নাগৰিকত্ব সংশোধনী আইন বিৰোধী আন্দোলন আৰম্ভ হৈছে। ‘কা’ বাতিলৰ দাবীত আজি হাজাৰ হাজাৰ লোক শিৱসাগৰৰ ৰাজপথলৈ ওলাই আহে।
শিৱসাগৰৰ ষ্টেশ্যন চাৰিআলিস্থিত টাই আহোম সাংস্কৃতিক বিকাশ কেন্দ্ৰত কুৰিটাতকৈ অধিক জাতীয় দল সংগঠনৰ উদ্যোগত এক বিশাল প্ৰতিবাদী সভা অনুষ্ঠিত হয়।
নাগৰিকত্ব সংশোধনী আইন বাতিল আৰু অখিল গগৈৰ মুক্তিৰ দাবীত এই বিশাল গণ প্ৰতিবাদ অনুষ্ঠিত হয়।
প্ৰতিবাদী সভাৰ পূৰ্বে ‘কা’ বিৰোধী আন্দোলনত শ্বহীদ হোৱা পাঁচগৰাকী শ্বহীদক শ্ৰদ্ধাঞ্জলি জনোৱা হয়।
ইয়াৰ পাছতেই জাতীয় দল সংগঠনৰ নেতাৰ উদাত্ত ভাষণে কপাই তোলে শিৱসাগৰ। ক’ৰ’নাৰ ভয়াৱহতাৰ পাছত শিৱসাগৰৰ পৰাই আজি পুনৰ কা’ বিৰোধী আন্দোলন আৰম্ভ হয়।
প্ৰতিবাদী সভাত শিল্পী মানস ৰবীন, ৰাইজৰ দলৰ মুখপাত্ৰ ধৈৰ্য্য কোঁৱৰ, মানস কোঁৱৰ, বীৰ লাচিত সেনাৰ নেতা চিতু বৰুৱা, শৃংখল চলিহা, সংগ্ৰামী যুৱ ছাত্ৰ পৰিষদৰ দেৱজিত দত্ত, সদৌ অসম অনুসূচীত জাতি ছাত্ৰ সস্থাৰ সম্পাদক পৰশ জ্যোতি দাস, জাগৃত মহিলা সমাজ, বৃহত্তৰ অসমীয়া যুৱ মঞ্চ, মৰিয়া যুৱ ছাত্ৰ পৰিষদ, কৃষক মুক্তি সংগ্ৰাম সমিতি আদিকে ধৰি বহু দল সংগঠনৰ নেতাই ভাষণ প্ৰদান কৰে।
সকলোৰে এটাই দাবী কা’ বাতিল কৰিব লাগিবই আৰু কা’ বাতিল নকৰা পৰ্যন্ত অসমীয়া ৰাইজে ৰাজপথত আন্দোলন কৰি থাকিব।
ইপিনে, আজি প্ৰায় এটা বছৰ কাৰাগাৰত বন্দী কৰি ৰখা অখিল গগৈক অতি শীঘ্ৰে মুক্তিৰ দাবী তোলে সকলো দল সংগঠনে।
এই প্ৰতিবাদস্থলীৰ পৰাই ৭০ টা জাতীয় দল সংগঠনে অনাগত ২০২১ ৰ নিৰ্বাচনত অখিল গগৈ শিৱসাগৰৰ পৰা নিৰ্বাচনত প্ৰতিদ্বন্দিতা কৰিব বুলি ঘোষণা কৰে।
প্ৰতিবাদী সভাৰ পাছতেই কেইবা হাজাৰ লোকে এক প্ৰতিবাদী সমদল বাহিৰ কৰে। হাজাৰ হাজাৰ লোকে সমগ্ৰ শিৱসাগৰ চহৰ সমদল কৰি বিজেপি চৰকাৰৰ বিৰুদ্ধে বিভিন্ন শ্লগানেৰে ৰাজপথ কপাই তোলে।
প্ৰতিবাদী সভাত যুৱ নেতা শৃংখল চলিহাৰ উদাত্ত ভাষণে সকলোকে আকৰ্ষিত কৰে। ভাষণত চলিহাই বিজেপি চৰকাৰ, সৰ্বানন্দ সোণোৱাল, হিমন্ত বিশ্ব শৰ্মা, আৰএচএচক তীব্ৰ সমালোচনা কৰে।
২০২১ ৰ নিৰ্বাচনত সৰ্বানন্দ সোণোৱালক গাদীৰ পৰা উফৰাই দিয়াৰ হুংকাৰ দিয়ে শৃংখল চলিহাই।
তেওঁ লগতে কয়, শিৱসাগৰবাসীৰ বাবে আজি এটা ভাল খবৰ। শিৱসাগৰৰ উন্নয়ণৰ বাবে ২১’ৰ নিৰ্বাচনত অখিল গগৈয়ে প্ৰতিদ্বন্দ্বিতা আগবঢ়াৱ বুলি ঘোষণা কৰে।
