বহিঃজগতৰ প্ৰাণী এলিয়েনৰ ধাৰণাক লৈ পৃথিৱীৰ মানুহৰ কল্পনাৰ অন্ত নাই।
এলিয়েনবিলাক দেখিবলৈ কেনেকুৱা?
এলিয়েনবিলাক মানুহতকৈও উন্নত নেকি?
নে সিহঁত মানুহৰ দৰেই, বন্ধুবৎসল?
অথবা সিহঁত হিংসুক নেকি?
এই প্ৰশ্নসমূহৰ উত্তৰৰ বাবে কল্পবিজ্ঞানীসকলে অনুসন্ধান অব্যাহত ৰাখিছে।
ইয়াৰ মাজতে জাপানৰ এজন পদাৰ্থবিজ্ঞানী তথা বিশ্ববিখ্যাত কল্পবিজ্ঞান লেখক মিচিও কাকুৱে (Michio Kaku) এলিয়েন সম্পৰ্কে এটা নতুন ধাৰণা দিছে।
তেওঁৰ মতে, এলিয়েনবিলাক বন্ধুত্বপূৰ্ণও হ’ব পাৰে, কিন্তু পৰিস্থিতি অনুযায়ী হিংস্ৰও হ’ব পাৰে।
ইমানেই হিংস্ৰ হ’ব পাৰে যে মানৱজাতিৰ বাবে সি বিৰাট ক্ষতিকাৰকো হ’ব পাৰে।
বিজ্ঞানীজনে এজন ভাৰতীয় সাংবাদিকৰ প্ৰশ্নৰ উত্তৰত এইদৰে কয়।
তেওঁ কয় যে পৃথিৱীৰ প্ৰতি এলিয়েনবিলাকে এটা হিংস্ৰ মনোভাৱ পোষণ কৰে কিন্তু পৰিস্থিতি অনুযায়ী বন্ধুত্বমূলক আচৰণো কৰিব পাৰে।
তেওঁ আশা কৰে যে বিজ্ঞান-প্ৰযুক্তিৰ অগ্ৰগতিৰ ফলত এসময়ত এক ধৰণৰ উন্নত ৱেব টেলিস্কোপ (Webb telescope) আৱিষ্কাৰ হ’ব, যাৰ জৰিয়তে মানুহে হাজাৰ হাজৰ গ্ৰহ পৃথিৱীৰ পৰাই চাব পাৰিব।
বিজ্ঞানীজনে কয় যে তেনেদৰেই এলিয়েনৰ স’তে মানুহৰ পৰিচিতি লাভ কৰিব।
তদুপৰি তেওঁ কয় যে এলিয়েনবিলাকৰ সভ্যতা মানুহতকৈ অধিক উন্নত, সেয়ে মানুহে এলিয়েনৰ স’তে টক্কৰেই দিব নোৱাৰিব, যাৰ বাবে এলিয়েনবিলাক চিৰদিন মানুহৰ পৰিসীমাৰ বাহিৰতে থাকিব যাব।
উল্লেখযোগ্য যে বৰ্তমান আমেৰিকা যুক্তৰাষ্ট্ৰৰ বাসিন্দা বিজ্ঞানী মিচিঅ’ কাকু পদাৰ্থবিজ্ঞানৰ ‘ষ্ট্ৰিং ফিল্ড থিয়ৰী’ (String field theory) নামৰ এটা তত্বৰ বাবে বিশ্ববিখ্যাত।
তদুপৰি তেওঁ ‘ফিজিকছ অৱ দ্যা ইম্পচিবল’, ‘ফিজিকছ অৱ দ্যা ফিউচাৰ’, ‘দ্যা ফিউচাৰ অৱ দ্যা মাইণ্ড’ আদি বিজ্ঞানবিষয়ক গ্ৰন্থৰে একৈশ শতিকাৰ এজন উল্লেখযোগ্য বিজ্ঞানী হিচাপে পৰিচিতি লাভ কৰিছে।