সাংবাদিক গৌৰী লংকেশৰ হত্যাকাণ্ডৰ গোচৰত কাৰাগাৰত থকা শেষজন অভিযুক্তইও জামিন লাভ কৰিলে। বেংগালুৰুৰ এখন আদালতে জামিন মঞ্জুৰ কৰিলে ভৌচাহেব কলাস্কাৰ নামৰ অভিযুক্তজনক।
যোৱা ৮ জানুৱাৰীত বেংগালুৰুৰ অধিৱেশন আদালতৰ ন্যায়াধীশ মুৰলীধৰ পাই বিয়ে অভিযুক্ত কলাস্কাৰক জামিন মঞ্জুৰ কৰে।
আদালতে লক্ষ্য কৰে, ‘এই গোচৰৰ সৈতে জড়িত অন্যান্য বন্দীসকলকো জামিন প্ৰদান কৰা হৈছে। সেই আধাৰতেই আন এজন অভিযুক্ত ভাৌচাহেব কলাস্কাৰক জামিন দিয়া হয়।
২০১৮ চনৰ ৪ ছেপ্টেম্বৰৰ পৰা তেওঁ জিম্মাত আছিল। দেশৰ উচ্চতম ন্যায়ালয়ে বাৰে বাৰে নিৰ্দেশ দিছে যে – সংবিধানৰ ২১ অনুচ্ছেদ উলংঘা কৰিব নালাগে, সেয়া আদালতৰ দায়িত্ব। আমি মনত ৰাখিব লাগিব যে অভিযুক্তৰো মৌলিক অধিকাৰ আছে।
অৱশ্যে এই জামিনৰ বিৰোধিতা কৰিছিল চৰকাৰে। চৰকাৰী অধিবক্তাজনে কৈছিল যে এই মুহূৰ্তত অভিযুক্তক জামিন দিব নালাগে। তেওঁ এজন অপৰাধী। লগতে আন এটা অপৰাধমূলক গোচৰত দোষী সাব্যস্ত। জামিনত মুকলি হ’লে অধিক অপৰাধ সংঘটিত কৰাৰ সম্ভাৱনা থাকিব।
কিন্তু ন্যায়াধীশে অভিযুক্তক জামিন মঞ্জুৰ কৰে। মন কৰিবলগীয়া যে অন্ধবিশ্বাস বিৰোধী আন্দোলনৰ আগশাৰীৰ যুক্তিবাদী নৰেন্দ্ৰ ডাভোলকৰ হত্যাকাণ্ডৰ গোচৰতো কলাস্কৰ দোষী সাব্যস্ত হৈছে।
বিগত বৰ্ষৰ জুলাই মাহত কৰ্ণাটক উচ্চ ন্যায়ালয়ে এই গোচৰৰ তিনিজন অভিযুক্তক জামিন মঞ্জুৰ কৰিছিল। এই গোচৰৰ আৰু চাৰিজন অভিযুক্তক এমাহৰ পাছত জামিন প্ৰদান কৰা হয়। ইয়াৰ উপৰিও ২০২৩ চনৰ ডিচেম্বৰ মাহত সাংবাদিক হত্যাৰ অন্যতম মূল অভিযুক্ত মোহন নাইককো জামিন প্ৰদান কৰে কৰ্ণাটক উচ্চ ন্যায়ালয়ে।
উল্লেখ্য যে ২০১৭ চনৰ ৫ ছেপ্টেম্বৰত বাংগালুৰুৰ ৰাজাৰাজেশ্বৰী অঞ্চলত বিশিষ্ট সাংবাদিক তথা সমাজকৰ্মী গৌৰী লংকেশক তিনিজন দুৰ্বৃত্তই তেওঁৰ ঘৰৰ সন্মুখত গুলীয়াই হত্যা কৰিছিল। উগ্ৰ হিন্দুত্ববাদ আৰু সাম্প্ৰদায়িকতাৰ বিৰুদ্ধে যুঁজত লংকেশে অগ্ৰণী ভূমিকা পালন কৰিছিল। সোঁপন্থী সংগঠন সনাতন সংস্থাৰ সদস্যই তেওঁক হত্যা কৰিছিল। তদন্তকাৰী বিশেষ তদন্তকাৰী দলে তেওঁলোকৰ তদন্তৰ অন্তত এই তথ্য প্ৰকাশ কৰে।
