প্ৰাথমিক শিক্ষকৰ দাবীসমূহৰ ক্ষেত্ৰত বিভাগীয় কাৰ্যালয়ত ক্ষিপ্ৰতাৰে কাম আগবঢ়াৰ পৰিপ্ৰেক্ষিতত অহা ১৬ আগষ্টৰ পৰা ঘোষিত আন্দোলনৰ কাৰ্যসূচী ৩১ আগষ্টলৈ স্থগিত ৰাখিছে অসম ৰাজ্যিক প্ৰাথমিক শিক্ষক সন্মিলনীয়ে।
সন্মিলনীৰ সভাপতি জীৱন বৰা আৰু সম্পাদক ৰাতুল গোস্বামীয়ে জানিব দিয়া মতে সোমবাৰে দিনৰ ১২ বজাৰ পৰা শিক্ষা আয়ুক্তৰ সৈতে প্ৰায় তিনি ঘণ্টা ধৰি চলা আলোচনাত প্ৰধান শিক্ষকৰ পদৰ প্ৰস্তাৱ শিক্ষা আয়ুক্ত কাৰ্যালয়ে ইতিমধ্যে বিত্ত বিভাগলৈ প্ৰেৰণ কৰিছে বুলি সদৰী কৰে।
স্নাতক শিক্ষকৰ ৮,৭০০ টকাৰ গ্ৰেড পে’ৰ বাবে সঞ্চালকালয়ে দিয়া প্ৰস্তাৱ শিক্ষা আয়ুক্তৰ কাৰ্যালয়ে পৰ্যালোচনা কৰি এসপ্তাহৰ ভিতৰত বিত্ত বিভাগৰ অনুমোদনৰ বাবে প্ৰেৰণ কৰাৰো প্ৰতিশ্ৰুতি দিয়ে। বিদ্যালয়ৰ সময়সূচীৰ আদেশ ১৫ আগষ্টৰ পূৰ্বে প্ৰকাশ কৰাৰ উপৰি এম এ চি পি বিত্ত বিভাগৰ অনুমোদনৰ জৰিয়তে জিলা পঞ্চায়ত সুবিধা লাভৰ ব্যৱস্থা ৩০ আগষ্টৰ ভিতৰত গ্ৰহণ কৰিব বুলি শিক্ষা আয়ুক্তই আলোচনাত জানিব দিয়ে।
আনহাতে, বেতনবঞ্চিত শিক্ষকসকলৰ সমস্যাটোৰ ক্ষেত্ৰত মুখ্যমন্ত্ৰীৰ সৈতে আলোচনা অনুষ্ঠিত কৰাৰ বাবে প্ৰস্তুত কৰা ফাইল নিজস্ব তদাৰকত শীঘ্ৰে কাৰ্যকৰী কৰাৰ বাবে দায়িত্ব গ্ৰহণ কৰিছে। তদুপৰি সন্মিলনীয়ে মুখ্যমন্ত্ৰীৰে আলোচনা নোহোৱাপৰ্যন্ত কাৰণ দৰ্শোৱাৰ বাবে প্ৰস্তুত কৰা জাননী প্ৰকাশ নকৰাৰ বাবে কৰা অনুৰোধ বিবেচনাৰ প্ৰতিশ্ৰুতি দিয়ে।
প্ৰধান শিক্ষকৰ পদ, স্নাতক শিক্ষকৰ গ্ৰেড পে’সহ অন্যান্য দাবীসমূহৰ ভিত্তিত শিক্ষা আয়ুক্ত কাৰ্যালয় আৰু বিত্ত বিভাগত চলি থকা ফাইলৰ কামসমূহ ক্ষিপ্ৰতাৰে আগবঢ়াই নিয়াৰ স্বাৰ্থত শিক্ষা আয়ুক্তই ১৬ আগষ্টৰ পৰা ঘোষণা কৰা কাৰ্যসূচী স্থগিত ৰখাৰ বাবে অনুৰোধ জনায়।
সন্মিলনীয়ে শিক্ষা আয়ুক্তৰ অনুৰোধ ৰক্ষা কৰি অহা ৩১ আগষ্টলৈ ঘোষিত সকলো আন্দোলনৰ কাৰ্যসূচী স্থগিত ৰখাৰ বাবে সিদ্ধান্ত গ্ৰহণ কৰিছে।
