স্পেনিছ ফুটবল মানেই এটা সুকীয়া বৈচিত্ৰ থাকিব। গোটেই খেলপথাৰজুৰি দেখা পাব শিল্প। ঠিক যিদৰে এইবাৰৰ বিশ্বকাপত স্পেনিছ ফুটবলত দেখা গৈছে। স্পেইনে শেষবাৰৰ বাবে ২০১০ চনত বিশ্বকাপৰ ফাইনেল খেলিছিল। আইকাৰ কেছিয়াছৰ দলটোৱে নেদাৰলেণ্ডক পৰাস্ত কৰি খিতাপ দখল কৰিছিল।
১৬ বছৰৰ পাছত পুনৰ বিশ্বকাপৰ ফাইনেলত প্ৰৱেশ কৰিছে স্পেইন। আজি তেওঁলোকে খিতাপৰ যুঁজত আৰ্জেণ্টিনাৰ বিৰুদ্ধে খেলিব। লা ফুয়েণ্টেৰ প্ৰশিক্ষণত স্পেইনে এই বিশ্বকাপত আটাইতকৈ কলাত্মক ফুটবল খেলিছিল ফ্ৰান্সৰ বিৰুদ্ধে ছেমি ফাইনেলত। কাইলিয়ান এমবাপেৰ দৰে তাৰকাক জ’নেল মাৰ্কিং কৰি কুকুৰেলাই তেওঁৰ খেলেই আৱদ্ধ কৰি দিছিল।
এই পৰ্যন্ত বিশ্বকাপ আৰম্ভ হোৱাৰ পূৰ্বে আৰু পিছত মুঠ ৩৭খন মেচত অপৰাজিত হৈ আছে স্পেইন। ফাইনেলত সন্মুখত আছে লিয়নেল মেছি নামৰ এক ‘বিস্ময়’। স্পেইনে পাৰিবনে? তাৰ আগতে চাই লোৱা যাওঁক ইউৰোপৰ এই শক্তিশালী ফুটবল খেলা দেশখনে এই বিশ্বকাপৰ ফাইনেলত কিদৰে প্ৰৱেশ কৰিলে।
গ্ৰুপ পৰ্যায়ৰ আৰম্ভণি লেহেমীয়া হোৱাৰ পাছতো স্পেইনে সহজেই গ্ৰুপ চেম্পিয়ন হৈ নকআউট পৰ্যায়ত প্ৰৱেশ কৰে। কেপ ভাৰ্ডেৰ বিৰুদ্ধে গ্ৰুপ পৰ্যায়ৰ প্ৰথমখন খেলত আবদ্ধ হৈ পৰিবলগীয়া হৈছিল লেমিন ইয়ামাল বাহিনী। খেলখন ০-০ গ’লত ড্ৰ’ত সমাপ্ত হয়।
তাতেই শেষ, তাৰ পিছত তেওঁলোকে আৰু মেচ ড্ৰ’ কৰা নাছিল। সকলো মেচতে জয়লাভ কৰে। ছৌদি আৰৱৰ বিৰুদ্ধে ৪-০ গ’লত বৃহৎ ব্যৱধানত জয়লাভ কৰে। গ্ৰুপ পৰ্যায়ৰ অন্তিমখন খেলত উৰুগুৱেৰ বিৰুদ্ধে ১-০ গ’লত জয়লাভ কৰি লা ফুয়েণ্টেৰ দলটোৱে গ্ৰুপৰ শীৰ্ষৰ পৰা পৰৱৰ্তী ৰাউণ্ডত প্ৰৱেশ কৰে।
নকআউট পৰ্যায়ত স্পেইনৰ প্ৰথমখন খেল আছিল অষ্ট্ৰিয়াৰ বিৰুদ্ধে। ৰাউণ্ড অফ ৩২-ত পেড্ৰৰ দলটোৱে বিপক্ষক ৩-০ গ’লত পৰাস্ত কৰে। তাৰ পিছত দলটোৱে ৰাউণ্ড অফ ৩২-ত পৰ্তুগালৰ বিৰুদ্ধে খেলিবলৈ নামিছিল। গোটেই মেচখনত ক্রিষ্টিয়ানো ৰোনাল্ডোৰ দৰে ছুপাৰষ্টাৰক নিষ্প্ৰভ কৰি স্পেইনে খেলখন ১-০ গ’লত জয়লাভ কৰে। ছুপাৰ চাব হিচাপে বিজয়ী গ’লটো দিয়ে মাইকেল মেৰিনোৱে।
কোৱাৰ্টাৰ ফাইনেলৰ প্ৰতিদ্বন্দ্বী আছিল বেলজিয়াম। লুকাকু আৰু ডি ব্ৰুইনৰ বিৰুদ্ধে কঠিন যুঁজত স্পেইনে ২-১ গ’লত জয়লাভ কৰে। এই মেচতো স্পেইনৰ ত্ৰাণকৰ্তা হিচাপে মাইকেল মেৰিনোৱে বিজয়ী গ’লটো দিয়ে।
অন্তিম চাৰিৰ যুঁজখনত স্পেইনে আটাইতকৈ শক্তিশালী দলটোৰ বিৰুদ্ধে খেলিছিল। সকলোৱে ভাবিছিল যে খেলখনত কাইলিয়ান এমবাপেৰ দলটো সহজেই জয়ী হ’ব। কিন্তু স্পেইনৰ ডিফেন্স আছিল দেৱালৰ দৰে শক্তিশালী। কাইলিয়ান এমবাপে আৰু অউছমেন ডেম্বেলক আৱদ্ধ কৰি ৰাখি প্ৰথমাৰ্ধত মাইকেল ভাৰ্জাবালৰ পেনাল্টি আৰু দ্বিতীয়াৰ্ধত পেড্ৰ’ পোৰোৰ এক দুৰ্দান্ত গ’লেৰে প্ৰথমাৰ্ধত স্পেইনে ফ্ৰান্সক ২-০ গ’লত পৰাস্ত কৰি ফাইনেল নিশ্চিত কৰে।
