ৰাহুল গান্ধীৰ বিৰুদ্ধে তেওঁৰ ভাৰতীয় নাগৰিকত্বক প্ৰশ্ন কৰি বিজেপি নেতা ভিগনেশ শিশিৰে দাখিল কৰা গোচৰটো খাৰিজ কৰে এলাহাবাদ উচ্চ ন্যায়ালয়ে। বিজেপি নেতাজনে দাবী কৰিছিল যে ৰাহুল গান্ধীৰ ব্ৰিটিছ নাগৰিকত্ব আছে আৰু তেওঁৰ হাতত প্ৰমাণ আছে, কিন্তু গোপনীয়তাৰ কাৰণে সকলো তথ্য প্ৰকাশ কৰা নাছিল। আদালতে কেন্দ্ৰক ৫ মে’ ২০২৫ৰ ভিতৰত ব্ৰিটিছ চৰকাৰৰ পৰা তথ্য দাখিল কৰিবলৈ নিৰ্দেশ দিছিল, কিন্তু কেন্দ্ৰই কোনো উত্তৰ দিব নোৱাৰিলে। এলাহাবাদ উচ্চ ন্যায়ালয়ৰ বিচাৰপীঠে জনোৱা মতে, কেন্দ্ৰই এই বিষয়ত কি ব্যৱস্থা ল’ব পাৰে তাৰ কোনো নিশ্চয়তা নাই, সেয়ে গোচৰটো খাৰিজ কৰা হ’ল।
ভিগনেশ শিশিৰে আদালতত কৈছিল যে ৰাহুলৰ নাগৰিকত্বৰ তথ্যৰ বাবে তেওঁ ব্ৰিটিছ চৰকাৰৰ সৈতে যোগাযোগ কৰিছে আৰু এই বিষয়ত চিবিআই তদন্তৰ প্ৰয়োজন। তেওঁ দাবী কৰিছিল যে ৰাহুল যদি ব্ৰিটিছ নাগৰিক হয়, তেন্তে তেওঁ ভাৰতত নিৰ্বাচনত অংশ ল’ব পাৰে নে আৰু লোকসভাত বিৰোধী দলৰ নেতা হোৱাৰ অধিকাৰো হেৰুৱাব, কাৰণ ভাৰতীয় আইনত দ্বৈত নাগৰিকত্বৰ ব্যৱস্থা নাই। কেন্দ্ৰই জনাইছিল যে তেওঁলোকে ব্ৰিটিছ চৰকাৰলৈ পত্ৰ প্ৰেৰণ কৰিছে, কিন্তু উত্তৰ নোপোৱাৰ বাবে আদালতে আবেদন খাৰিজ কৰিলে। আদালতে লগতে ভৱিষ্যতে আবেদনকাৰীয়ে আইনী পদক্ষেপ ল’বলৈ স্বাধীন বুলিও উল্লেখ কৰিছে।
উলেখ্য যে ইয়াৰ পূৰ্বেও ৰাহুল গান্ধীৰ নাগৰিকত্বক লৈ প্ৰশ্ন উত্থাপন হৈছে। বিজেপি নেতা সুব্ৰমণিয়াম স্বামীয়ে দিল্লী উচ্চ ন্যায়ালয়ত দাবী কৰিছিল যে ২০০৫-২০০৬ চনত ব্ৰিটিছ কোম্পানী বেকপছ লিমিটেডৰ নথিত ৰাহুলে নিজকে ব্ৰিটিছ নাগৰিক বুলি উল্লেখ কৰিছিল। বিজেপি নেতাসকলে বাৰে বাৰে ৰাহুলক বিদেশী নাগৰিক বুলি প্ৰমাণ কৰিবলৈ চেষ্টা কৰি অহিছে আৰু তেওঁৰ মনোনয়ন নাকচ কৰাৰ দাবীও উত্থাপন কৰিছে। কিন্তু এলাহাবাদ উচ্চ ন্যায়ালয়ৰ সাম্প্ৰতিক সিদ্ধান্তই ৰাহুল গান্ধীক সকাহ প্ৰদান কৰিলে, যদিও ভৱিষ্যতে এই বিষয়ত নতুন গোচৰ উত্থাপনৰ সম্ভাৱনা নুই কৰিব নোৱাৰি।
