প্ৰেম বিবাহ যিমানেই বাঢ়ি গৈছে সিমানেই বিবাহ বিচ্ছেদো বাঢ়ি গৈছে। প্ৰেম বিবাহতে সম্পৰ্কত আটাইতকৈ বেছি সমস্যা হয়। সেয়ে এলাহাবাদ উচ্চ ন্যায়ালয়ে হিন্দু বিবাহ আইন সংশোধনৰ প্ৰয়োজনীয়তা অনুভৱ কৰিছে। এটা বিবাহ বিচ্ছেদৰ গোচৰত সংশ্লিষ্ট আদালতে এই পৰ্যবেক্ষণ কৰে। উচ্চ ন্যায়ালয়ে এই সন্দৰ্ভত কেন্দ্ৰক পৰামৰ্শও দিছে।
৩০ বছৰ ধৰি ভাৰতীয় সেনাবাহিনীত কৰ্মৰত এজন চিকিৎসকে বিবাহ বিচ্ছেদৰ বাবে আবেদন জনাইছিল। পত্নীও পেছাত চিকিৎসক। ২০০৭ চনত দুয়ো প্ৰেমত পৰে আৰু হিন্দু আইন অনুসৰি বিবাহপাশত আবদ্ধ হয়। যিটো আছিল সেনা বাহিনীৰ চিকিৎসকগৰাকীৰ দ্বিতীয় বিবাহ। কিন্তু বিয়াৰ কিছুদিন পিছতে আৰম্ভ হ’ল অশান্তি। যাৰ বাবে স্বামীয়ে ২০১৫ চনত পৰিয়াল আদালতত বিবাহ বিচ্ছেদৰ বাবে আবেদন কৰিছিল।
বিবাহ বিচ্ছেদৰ বাবে আবেদন দাখিল কৰাৰ পিছত চিকিৎসক পত্নীয়ে তেওঁক এৰি আন ঠাইলৈ গুচি যায়। সেই সময়ত পৰিয়াল আদালতে স্বামীৰ আবেদন খাৰিজ কৰিছিল। পৰিয়াল আদালতৰ ৰায়ক প্ৰত্যাহ্বান জনাই ২০১৯ চনত এলাহাবাদ উচ্চ ন্যায়ালয়ৰ কাষ চাপিছিল চিকিৎসক স্বামীয়ে।
লগতে পঢ়কঃ বিজেপিৰ ১৯৫ জন প্ৰাৰ্থীৰ ভিতৰত একমাত্ৰ মুছলমান প্ৰাৰ্থী আব্দুল চালাম! কোন তেওঁ, কি তেওঁৰ পৰিচয়?
ন্যায়াধীশ বিবেক কুমাৰ বিৰলা আৰু ন্যায়াধীশ ডোনাদী ৰমেশৰ বিভাগীয় বিচাৰপীঠে শেহতীয়াকৈ এই গোচৰৰ শুনানি গ্ৰহণ কৰি পৰ্যবেক্ষণ কৰে যে প্ৰেম বিবাহে সদায় সুখী বৈবাহিক জীৱনৰ সূচনা নকৰে।
তেওঁলোকে এইটোও ভাবে যে বৈবাহিক বিবাদৰ বাবে স্বামী বা পত্নী কোন সঁচাকৈয়ে দায়ী সেয়া বিবেচ্য নহয়। দৰাচলতে খণ্ড বিচাৰপীঠৰ ন্যায়াধীশ দুগৰাকীয়ে কয় যে বিগত সময়ত কেইবাটাও গোচৰত ৰায়দান দিওঁতে তেওঁলোকৰ এই অভিজ্ঞতা হৈছে।
ইয়াৰ পিছতে উচ্চ ন্যায়ালয়ে হিন্দু বিবাহ বিচ্ছেদ সম্পৰ্কীয় প্ৰচলিত আইনখনৰ ভিত্তি সংশোধন কৰাত গুৰুত্ব আৰোপ কৰে। খণ্ড বিচাৰপীঠখনৰ মতে, সাম্প্ৰতিক পৰিস্থিতিৰ প্ৰতি লক্ষ্য ৰাখি বিবাহ বিচ্ছেদ আইনখন সলনি কৰিব লাগে।
কিয়নো, আদালতে কয় যে, ১৯৯৫ চনত যেতিয়া হিন্দু বিবাহ আইন প্ৰণয়ন কৰা হৈছিল, তেতিয়া বিবাহক এক গুৰুত্বপূৰ্ণ বিষয় হিচাপে গণ্য কৰা হৈছিল। কিন্তু এতিয়া সময়ৰ লগে লগে পৰিস্থিতি সলনি হৈছে। সেয়ে খণ্ড বিচাৰপীঠে কয় যে আইনখন সলনি কৰাৰ প্ৰয়োজন আছে।
লগতে পঢ়কঃ বিশিষ্ট সমাজকৰ্মী, শ্ৰীমন্ত শংকৰ একাডেমী ছ’চাইটিৰ প্ৰতিষ্ঠাপক উপ সভাপতি দেবানন্দ চৌধুৰীৰ দেহাৱসান
কিন্তু ইয়াতেই শেষ নহয়, সেনা বাহিনীৰ চিকিৎসকৰ চিকিৎসক পত্নী বহুদিনৰ পৰা স্বামীৰ পৰা বিচ্ছিন্ন হৈ আছে। উচ্চ ন্যায়ালয়ে কয় যে পত্নীয়ে যে বৈবাহিক সম্পৰ্ক স্থাপন কৰিব নিবিচাৰে সেয়া স্পষ্ট। যিটো উচ্চ ন্যায়ালয়ে স্বামীৰ প্ৰতি নিষ্ঠুৰতা বুলি গণ্য কৰে। ইয়াৰ পিছত স্বামীৰ অনুৰোধ অনুযায়ী বিবাহ বিচ্ছেদ মঞ্জুৰ কৰা হয়।
