বিজেপি নেত্ৰীৰ ঘনিষ্ঠক অবৈধভাৱে বজাৰ গতোৱাৰ অভিযোগ শিৱসাগৰ জিলা প্ৰশাসন আৰু পৌৰ প্ৰশাসনৰ বিৰুদ্ধে। এই অভিযোগ উত্থাপন কৰিছে বীৰ লাচিত সেনা আৰু আহোম সেনাই।
সংগঠন দুটাৰ অভিযোগ শিৱসাগৰ বিজেপিৰ সভানেত্ৰী সুৰভি ৰাজকোঁৱৰীৰ ঘনিষ্ঠ ব্যক্তিক নিবিদা অবিহনেই গতোৱা হৈছে কেন্দ্ৰীয় বজাৰ।
সংগঠন দুটাই কৰা অভিযোগ অনুসৰি গুৱাহাটী উচ্চ ন্যায়ালয় আৰু পৌৰ সঞ্চালকালয়ৰ নিৰ্দেশকো অংগুষ্ঠ প্ৰদৰ্শন কৰি শিৱসাগৰ জিলা প্ৰশাসন আৰু পৌৰসভাৰ কাৰ্যবাহী বিষয়াই বিজেপিৰ শিৱসাগৰ জিলা সভানেত্ৰী সুৰভি ৰাজকোঁৱৰীক তুষ্টিকৰণৰ বাবেই এইদৰে অবৈধভাৱে শিৱসাগৰৰ কেন্দ্ৰীয় বজাৰ গতাই দিছে বিজেপি নেত্ৰীৰ ঘনিষ্ঠক।
কেৱল বিজেপিৰ এগৰাকী নেত্ৰীক তুষ্টিকৰণ কৰিবলৈকে এইদৰে ন্যায়ালয়ৰ ৰায়কো অৱমাননা কৰি নিবিদা নকৰাকৈয়ে তেওঁৰ ঘনিষ্ঠ ব্যক্তিক কেন্দ্ৰীয় বজাৰ গতোৱা কাৰ্যত আজি বীৰ লাচিত সেনাই শিৱসাগৰ জিলা উপায়ুক্তক স্মাৰকপত্ৰ প্ৰদান কৰাৰ লগতে অতিশীঘ্ৰে কেন্দ্ৰীয় বজাৰ আৰু ষ্ট্যেচন চাৰিআলি বজাৰৰ নিবিদা প্ৰক্ৰিয়া আৰম্ভ কৰিবলৈ দাবী জনায়। অন্যথা তীব্ৰ প্ৰতিবাদ কৰা হ’ব বুলি সকিয়াই দিয়ে সংগঠন দুটাই।
উল্লেখ্য যে অসম চৰকাৰৰ Directorate of Municipal Administration ৰ কাৰ্যালয়ৰ পৰা ২৯ ফেব্ৰুৱাৰী ২০২০ তাৰিখে নং ডি এম এ ৪৯/২০০৫/পিটি আই/৪৫৫ পত্ৰ যোগে শিৱসাগৰৰ কেন্দ্ৰীয় বজাৰৰ নিবিদা প্ৰত্ৰিয়া তৎকালীনভাৱে আৰম্ভ কৰিবলৈ নিৰ্দেশ দিছিল। কিন্তু পৌৰ সঞ্চালকৰ নিৰ্দেশক বুঢ়া আঙুলি দেখুৱাই পৌৰসভাৰ কাৰ্যবাহী বিষয়াই বৰ্তমানো নিবিদা প্ৰক্ৰিয়া আৰম্ভ নকৰাকলৈ তীব্ৰ প্ৰতিক্ৰিয়াৰ সৃষ্টি হৈছে।
আনহাতে পৌৰ সঞ্চালকালয়ৰ নিবিদা আৰম্ভ কৰাৰ নিৰ্দেশনাৰ পাছতেই গুৱাহাটী উচ্চ ন্যায়ালয়ৰ দ্বাৰস্থ হৈছিল পূৰ্বৰ লেচী জন। কিন্তু ন্যায়ালয়েও (কেচ নং wpc 2060/2020) গোচৰৰ ৰায়দান কৰি ২০ মাৰ্চ তাৰিখেই নিবিদা প্ৰক্ৰিয়া চলাই নিবলৈ পৌৰসভাক নিৰ্দেশ দিছিল। কিন্তু উচ্চ ন্যায়ালয়ৰ ৰায়কো গুৰুত্ব প্ৰদান নকৰি পৌৰসভাৰ কাৰ্যবাহী বিষয়া গৰাকীয়ে আজি পৰ্যন্ত আৰম্ভ নকৰিলে নিবিদা প্ৰক্ৰিয়া।
এনে সময়তেই শিৱসাগৰ জিলাৰ বিজেপিৰ সভানেত্ৰী সুৰভি ৰাজকোঁৱৰী ঘনিষ্ঠ তথা পূৰ্বৰ লেচীক বজাৰখনৰ ম্যাদ বৃদ্ধিৰ স্বাৰ্থত নিবিদা প্ৰক্ৰিয়া আৰম্ভ নকৰাৰ অভিযোগ কৰিছে সংগঠন দুটাই। ইয়াকেলৈ তীব্ৰ প্ৰতিক্ৰিয়াৰ সৃষ্টি হৈছে শিৱসাগৰত।
