গোৱালপাৰা জিলাৰ কৃষ্ণাই-বালিজানা যুগ্ম সংহত শিশু উন্নয়ণ প্ৰকল্পত “প্ৰাক শৈশৱকালীন শিশুৰ যতন আৰু শিক্ষা (ইচিচিই)” বিষয়ক প্ৰশিক্ষণৰ নামত ব্যাপক অনিয়ম সংঘটিত হোৱাৰ অভিযোগ উঠিছে৷ অভিযোগ অনুসৰি প্ৰশিক্ষণৰ দায়িত্বত থকা বিষয়াবৰ্গই প্ৰশিক্ষণৰ নামত বিভাগে আগবঢ়োৱা ধনৰ সামান্য অংশ খৰচ কৰি বাকী সমুদায় ধন আত্মসাৎ কৰাৰ অভিযোগ উত্থাপিত হৈছে।৷
উল্লেখ্য যে, সমাজ কল্যাণ বিভাগে ৰাজ্যখনৰ শিশুসকলৰ শাৰীৰিক-মানসিক উৎকৰ্ষ সাধনৰ লক্ষ্যেৰে এলানি কাৰ্যসূচী গ্ৰহণ কৰিছে৷ ইয়াৰ ভিতৰত প্ৰাক শৈশৱকালীন শিশুৰ যতন আৰু শিক্ষা বিষয়টোও অন্যতম৷
এই কাৰ্যসূচী সাফল্যমণ্ডিত কৰাৰ উদ্দশ্যৰে প্ৰতিটো উন্নয়ন প্ৰকল্পৰ অধীনস্থ অংগনবাদী কেন্দ্ৰৰ কৰ্মীসকলক লৈ ৬দিনীয়া এক প্ৰশিক্ষণৰ ব্যৱস্থা কৰা হয়৷ এই কাৰ্যসূচী ৰূপায়ণৰ বাবে সমাজ কল্যাণ বিভাগে গোৱালপাৰা জিলাৰ মুঠ ৭ টা প্ৰকল্পৰ বাবে ৪৩,১৩,৮০০ লাখ টকা মোকলাই দিছে৷ কৃষ্ণাই-বালিজানা যুগ্ম সংহত শিশু উন্নয়ন প্ৰকল্পই লাভ কৰে ৮,১৭,৮০০ টকা৷ জানিব পৰা মতে, কৃষ্ণাই-বালিজানা প্ৰকল্পই যোৱা ২ নৱেম্বৰৰ পৰা ৪ ডিচেম্বৰলৈ ইচিচিই প্ৰশিক্ষণৰ আয়োজন কৰে৷
এই প্ৰশিক্ষণত মুঠ ৪৬১ গৰাকী কৰ্মীয়ে অংশগ্ৰহণ কৰে৷ উল্লেখ্য যে, কৃষ্ণাই-বালিজানা প্ৰকল্পৰ অধীনত মুঠ কেন্দ্ৰৰ সংখ্যা ৪৭৯ যদিও ইয়াৰে ১৮ কেন্দ্ৰত বৰ্তমানে কৰ্মী নাই৷ যাৰ পৰিপ্ৰেক্ষিতত প্ৰশিক্ষণত মুঠ ৪৬১ কৰ্মীয়ে যোগদান কৰে৷
প্ৰশিক্ষণৰ সুবিধাৰ বাবে কৰ্মীসকলক মুঠ ১১ দলত ভাগ কৰি লোৱা হয়৷ এই খিনিলৈ সকলো ঠিকেই আছিল৷ বিশৃংখলতাই দেখা দিয়ে প্ৰশিক্ষণ চলা সময়ত। কাৰণ বিভাগীয় নিয়ম মতে এই প্ৰশিক্ষণ আছিল ৬দিনীয়া কিন্তু কৃষ্ণাই-বালিজানা প্ৰকল্পৰ প্ৰশিক্ষণৰ দায়িত্বত থকা বিষয়াবৰ্গই অতিৰিক্ত লাভ কৰাৰ স্বাৰ্থত মাত্ৰ দুটা দলক ছয় দিনকৈ প্ৰশিক্ষণ আগবঢ়োৱাৰ বিপৰীতে বাকী ৯টা দলক মাত্ৰ পাঁচ দিনকৈহে প্ৰশিক্ষণ প্ৰদান কৰে৷
আনহাতে প্ৰশিক্ষণ কালত যোগান ধৰা খাদ্যৰ ক্ষেত্ৰতো নানান অভিযোগ উত্থাপিত হৈছে৷ বিভাগীয় নিৰ্দেশনা অনুসৰি, ৰাতিপুৱাৰ জলপানত দিব লাগে সিদ্ধ কণী আৰু ব্ৰেড৷ কিন্তু তাৰ সলনি কৃষ্ণাই-বালিজানা প্ৰকল্পত যোগান ধৰা হয় পেটিছ আৰু চাহ৷ সেইদৰে আবেলিৰ চাহৰ লগত পেটিছ দিব লাগে যদিও দিয়া হৈছে বিস্কুট ৷ দুপৰীয়াৰ ভাত সাজো বিভাগীয় নিয়ম মতে আগবঢ়োৱা হোৱা নাই ৷
পাঁচ দিনৰ এদিন নাম মাত্ৰ ব্ৰয়লাৰ মাংস,এদিন সামান্য মাছ আৰু এদিন এটাকৈ কণী দিয়াৰ বিপৰীতে বাকী দুদিন নিৰামিষ আহাৰ আগবঢ়ায়ে দায়িত্ব সামৰে কৰ্তৃপক্ষই ৷ লজ্জাজনক বিষয়টো হ’ল কিছু কৰ্মীৰ লগত সন্তান চোৱা চিতাৰ বাবে অহা যুৱতী মহিলা সকলক একাপ চাহ আগবঢ়োৱাৰ মানৱীয় দৃষ্টিকোন প্ৰকাশ কৰাৰ পৰাও বিৰত থাকে বিষয়াসকল ৷
সেই সকল কৰ্মীয়ে নিজৰ ধনেৰে খাদ্য কিনি খুৱাবলগীয়া হয় সহায়কাৰী মহিলা যুৱতী সকলক ৷ আনহাতে কৰ্মী সকলক প্ৰশিক্ষণৰ নামত ভ্ৰমণ বানচ দিব লাগে যদিও আজিলৈকে কোনো কৰ্মীকে সেই বানচৰ ধন প্ৰদান কৰা নাই বুলি একাংশ কৰ্মীয়ে অভিযোগ তুলিছে ৷