“অসমৰ খিলঞ্জীয়া জাতি জনগোষ্ঠী সমূহৰ সামূহিক নিৰাপত্তাৰ স্বাৰ্থত বিজেপি, অগপ আৰু বিপিএফ ঐক্যবদ্ধ হৈছিল। বিজেপিৰ সৈতে এই মিত্ৰতা আগন্তুক সময়তো অটুট থাকিব। আগন্তুক সময়ত কংগ্ৰেছ আৰু এ আই ইউ ডি এফৰ দৰে শক্তি কেতিয়াও ক্ষমতা লৈ নাহে,”-এই মন্তব্য বিটিচি প্ৰধান হাগ্ৰামা মহিলাৰীৰ।
আজি নগাঁও জিলাৰ বটদ্ৰৱা সমষ্টিৰ চহৰীয়াত নগাঁও জিলা বড়ো সাহিত্য সভাৰ ৩০ সংখ্যক বাৰ্ষিক অধিবেশনৰ এক বিশেষ অনুষ্ঠানত মুখ্য অতিথি হিচাপে উপস্থিত থাকি বিটিচি প্ৰধান গৰাকীয়ে নিজৰ ভাষণ প্ৰসংগত উল্লেখ কৰে যে বড়ো স্বায়ত্ত শাসিত পৰিষদে অতি সোনকালে বিটিচি এলেকাৰ বাহিৰত থকা বড়ো জনগোষ্ঠীয় লোকসকলক সামৰি ল’ব।
মহিলাৰীয়ে অনাগত সময়ত জনজাতীয় ৰাইজক বিজেপিৰ পক্ষত ভোট দিয়াৰ আহ্বান জনায়। নগাঁও জিলা বড়ো সাহিত্য সভাৰ সভাপতি প্ৰশান্ত বড়োৰ পৌৰোহিত্যত অনুষ্ঠিত সভাত বড়ো সাহিত্য সভাৰ প্ৰাক্তন উপ সভাপতি বিশ্বেশ্বৰ বসুমতাৰী,বড়ো মহিলা নেত্ৰী বিভাৰাণী বসুমতাৰী, বটদ্ৰৱা সমষ্টিৰ বিধায়িকা আঙুৰলতা ডেকাৰ উপস্থিতি থাকে।
স্থানীয় বিধায়িকাগৰাকীৰ উপস্থিতিত অনুষ্ঠিত সভাত হাগ্ৰামাই বড়ো সকলৰ বাথৌ মন্দিৰৰ উন্নয়ন কল্পে তিনি লক্ষ টকা, বড়ো মাধ্যমৰ চহৰীয়া জনজাতি হাইস্কুলৰ উন্নয়ন কল্পে তিনি লক্ষ টকা আৰু গুৰু জনাৰ জন্মস্থান বটদ্ৰৱা থানৰ বাবে তিনি লক্ষ টকাৰ আৰ্থিক অনুদান আগবঢ়োৱাৰ কথাও নিজৰ ভাষণত উল্লেখ কৰে।
উক্ত সভাতে স্থানীয় বিধায়িকা আঙুৰলতা ডেকাই চহৰীয়া জনজাতীয় হাইস্কুলৰ চাৰিসীমাৰ দেৱাল নিৰ্মাণৰ বাবে দহ লক্ষ টকাৰ অনুদান ঘোষণা কৰে।