ডিব্ৰ্ৰুগড়ৰ অসম চিকিৎসা মহাবিদ্যালয় চিকিসালয়ৰ চিকিৎসকৰ বৃহৎ সাফল্য। চিকিৎসা মহাবিদ্যালয় খনৰ চিকিৎসকৰ দল এটাই এগৰাকী ১৬ বছৰীয়া যুৱতীৰ দেহৰ পৰা কাটি উলিয়ালে ৩০ কিলোগ্ৰাম ওজনৰ এটা টিউমাৰ।
অত্যন্ত জটিল এটা অস্ত্ৰোপচাৰৰ মাধ্যমেৰে চিকিৎসকৰ দলটোৱে যুৱতীগৰাকীৰ ডিম্বাশয়ৰ পৰা এই বৃহৎ ওজনৰ টিউমাৰটো আঁতৰাই পেলাবলৈ সক্ষম হয়।
অসম চিকিৎসা মহাবিদ্যালয়ৰ অধ্যক্ষ তথা চিকিৎসালয় খনৰ মুখ্য অধীক্ষক সঞ্জীৱ কাকতিয়ে প্ৰকাশ কৰা মতে ইমান ওজনৰ টিউমাৰ এটা দেহত থকাৰ বাবেই যুৱতীগৰাকীৰ অৱস্থা সংকটজনক হৈ পৰিছিল যদিও জ্যেষ্ঠ চিকিৎসক ডাঃ কৰুণা দাসৰ প্ৰচেষ্টা আৰু চিকিৎসা মহাবিদ্যালয় চিকিৎসালয় খনৰ আন চিকিৎসক-চিকিৎসা কৰ্মীৰ সহযোগত টিউমাৰটো কাটি উলিয়াব পৰা হয়।
অস্ত্ৰোপচাৰৰ পিছত যুৱতীগৰাকীৰ সকলো অংগই সুন্দৰভাবে কাম কৰি থকাৰ লগতে যুৱতীগৰাকীৰ অৱস্থা বৰ্তমান সুস্থিৰ বুলি কাকতিয়ে সাংবাদিকৰ আগত প্ৰকাশ কৰিছে।
কাকতিয়ে লগতে কয় যে অসম চিকিৎসা মহাবিদ্যালয়ৰ ইতিহাসত এয়া এক বিশেষ সাফল্য হিচাবে পৰিগণিত হ’ব।
এনে এটা জটিল অস্ত্ৰোপচাৰ সফলতাৰে সম্পন্ন কৰাৰ বাবে তেওঁ চিকিৎসা মহাবিদ্যালয় খনৰ সংশ্লিষ্ট চিকিৎসকসকলক ধন্যবাদ জ্ঞাপন কৰে।
যুৱতীগৰাকীৰ দেহৰ পৰা ৩০ কিলোগ্ৰাম ওজনৰ টিউমাৰটো আঁতৰাই পেলাবলৈ বহু সময় ধৰি অস্ত্ৰোপচাৰ কৰিবলগীয়া হৈছিল বুলিও তেওঁ মন্তব্য কৰে।
চিকিৎসা মহাবিদ্যালয় খনৰ প্ৰফেচৰ ডাঃ আৰ সোণোৱাল,ডাঃ প্ৰণতি দত্ত আৰু ডাঃ ঐশ্বৰ্য লক্ষ্মীৰ প্ৰচেষ্টাত এই অস্ত্ৰোপচাৰ সফলতাৰে সমপন্ন কৰা হয়।
অস্ত্ৰোপচাৰৰ সময়ত উপস্থিত আছিল এনাছথেছিয়া বিশেষজ্ঞ সহযোগী অধ্যাপক ডাঃ কেকে দাস, ডাঃ অমৰেন্দ্ৰ ডেকা,ডাঃ আৰ গিৰি প্ৰশান্ত,ডাঃ কুশল বিজলানি,ডাঃ সুদীপা পাল,ডাঃচিৰদীপ সেনগুপ্তা আৰু নাৰ্চ ৰেখা জ্যোতি।
