ভাৰতৰ ওপৰত পুনৰ ১২.৫ শতাংশ অতিৰিক্ত শুল্ক জাপি দিয়াৰ প্ৰস্তাৱ কৰিছে আমেৰিকাই। আমেৰিকাৰ এই পদক্ষেপক দিল্লীয়ে সহজভাৱে লোৱা নাই। এক চমু প্ৰতিক্ৰিয়াত কেন্দ্ৰীয় বাণিজ্য মন্ত্ৰালয়ে জনাইছে যে এই বিষয়টোক লৈ বৰ্তমান আমেৰিকাৰ সৈতে আলোচনা চলি আছে। দুইখন দেশৰ মাজত বাণিজ্যিক চুক্তি সন্দৰ্ভত বিভিন্ন স্তৰত বাৰ্তালাপ অব্যাহত আছে আৰু শুল্কৰ এই বিষয়টো এতিয়াও চূড়ান্ত হোৱা নাই।
আমেৰিকাৰ আইনৰ ৩০১ ধাৰাক ব্যৱহাৰ কৰি ভাৰতকে ধৰি মুঠ ৬০খন দেশৰ ওপৰত এই শুল্ক আৰোপ কৰাৰ পৰিকল্পনা কৰিছে ট্ৰাম্প প্ৰশাসনে। আমেৰিকাৰ বাণিজ্য বিভাগৰ মতে, জোৰ-জবৰদস্তি কৰা শ্ৰমৰ বিনিময়ত উৎপাদিত সামগ্ৰীৰ আমদানি বন্ধ কৰাৰ বাবেই এই পদক্ষেপ লোৱা হৈছে। মধ্যপ্ৰাচ্যৰ যুদ্ধৰ বাবে বিশ্বজুৰি চলি থকা অৰ্থনৈতিক সংকটৰ মাজতে আমেৰিকাৰ এই ঘোষণাই ভাৰতৰ বাবে এক নতুন চিন্তাৰ সৃষ্টি কৰিছে।
এই সন্দৰ্ভত ভাৰত চৰকাৰৰ বাণিজ্য মন্ত্ৰালয়ে কয় যে ৩০১ ধাৰা কাৰ্যকৰী কৰাৰ সন্দৰ্ভত আমেৰিকাৰ লগত নিয়মীয়া আলোচনা চলাই থকা হৈছে। ইয়াৰ উপৰিও অলপতে প্ৰকাশ পোৱা যৌথ বিবৃতি অনুসৰি দুই দেশৰ মাজত এক স্থায়ী বাণিজ্যিক চুক্তি চূড়ান্ত কৰাৰ দিশে কাম চলি আছে। কেন্দ্ৰীয় মন্ত্ৰালয়ে লগতে জানিবলৈ দিয়ে যে পূৰ্বৰ ২৩২ ধাৰাৰ শুল্কৰ অধীনত থকা সামগ্ৰীৰ উপৰিও আন কিছুমান বিশেষ সামগ্ৰীক এই নতুন শুল্কৰ পৰা ৰেহাই দিয়া হৈছে। অৱশ্যে সমগ্ৰ বিষয়টো এতিয়াও কেৱল আলোচনাৰ পৰ্যায়তে আছে।
আমেৰিকাৰ বাণিজ্য দপ্তৰৰ তথ্য অনুসৰি, যি ৬০খন দেশৰ ওপৰত ১২.৫ শতাংশ অতিৰিক্ত শুল্ক জাপি দিয়াৰ প্ৰস্তাৱ কৰা হৈছে, তাৰ ভিতৰত ভাৰত, চীন, জাপান, দক্ষিণ কোৰিয়া আৰু ব্ৰিটেইনৰ দৰে প্ৰভাৱশালী দেশবোৰো আছে। ৱাশ্বিংটনৰ দাবী যে যিবোৰ দেশে জোৰপূৰ্বক কৰোৱা শ্ৰমৰ দ্বাৰা উৎপাদিত সামগ্ৰীৰ বিৰুদ্ধে কঠোৰ আইন প্ৰয়োগ কৰাত ব্যৰ্থ হৈছে, তেওঁলোকৰ বিৰুদ্ধেই এই ব্যৱস্থা লোৱা হ’ব। যিবোৰ দেশে এনে সামগ্ৰীৰ ওপৰত আংশিক নিষেধাজ্ঞা লগাইছে তেওঁলোকৰ ওপৰত ১০ শতাংশ আৰু যিবোৰ দেশে একো পদক্ষেপ লোৱা নাই তেওঁলোকৰ ওপৰত ১২.৫ শতাংশ শুল্ক বহিব পাৰে। অৱশ্যে জনসাধাৰণৰ মতামত লোৱা আৰু পৰ্যালোচনা কৰাৰ পিছতহে আমেৰিকা চৰকাৰে এই সন্দৰ্ভত চূড়ান্ত সিদ্ধান্ত ল’ব।
