অৱশেষত ইৰানৰ আক্ৰমণৰ প্ৰত্যুত্তৰ দিবলৈ আৰম্ভ কৰিছে আমেৰিকাই। পশ্চিম এছিয়াত দায়িত্বপ্ৰাপ্ত আমেৰিকাৰ সেনাৰ চেণ্ট্ৰেল কমাণ্ডে দাবী কৰিছে যে তেওঁলোকে ইৰানৰ খাৰুৱা তেল কঢ়িওৱা পাঁচখন জাহাজত আক্ৰমণ চলাইছে। আমেৰিকাৰ সেনাই দাবী কৰা অনুসৰি এই পাঁচোখন জাহাজ সম্পূৰ্ণৰূপে ধ্বংস কৰা হৈছে। অৱশ্যে ইৰানৰ তৰফৰ পৰা এই বিষয়ত এতিয়ালৈকে কোনো আনুষ্ঠানিক বিবৃতি প্ৰকাশ কৰা হোৱা নাই।
হৰমুজ প্ৰণালীৰ সমীপত ইৰান আৰু আমেৰিকাৰ মাজত হোৱা আক্ৰমণ আৰু প্ৰতি-আক্ৰমণৰ ফলত পৰিস্থিতি পুনৰ উত্তপ্ত হৈ পৰিছে। ইৰানৰ বিৰুদ্ধে আমেৰিকাৰ সামৰিক ঘাটি লক্ষ্য কৰি বেলিষ্টিক ক্ষেপণাস্ত্ৰ নিক্ষেপ কৰাৰ গুৰুতৰ অভিযোগ উত্থাপন হৈছে। আমেৰিকাৰ সেনাই জানিবলৈ দিয়া মতে, তেহৰানে একেৰাহে দুদিন ধৰি আমেৰিকাৰ যুদ্ধজাহাজক লক্ষ্য কৰি ক্ষেপণাস্ত্ৰ নিক্ষেপ কৰিছিল। অৱশ্যে এই আক্ৰমণত আমেৰিকাৰ জাহাজসমূহৰ কোনো ক্ষয়-ক্ষতি হোৱা নাই। ইৰানৰ এই বিফল আক্ৰমণৰ উচিত প্ৰত্যুত্তৰ দিয়া হৈছে বুলি আমেৰিকাৰ সেনাই স্পষ্ট কৰি দিছে। তেওঁলোকৰ অভিযোগ অনুসৰি ইৰানৰ ৰেভলিউশ্যনাৰী গাৰ্ড বাহিনী তেল সৰবৰাহৰ অবৈধ কাৰ্যৰ সৈতে জড়িত থকাৰ বাবেই এই পাঁচখন তেলবাহী জাহাজক লক্ষ্য কৰি আক্ৰমণ চলোৱা হৈছে।
মূলতঃ ওমান উপসাগৰত আমেৰিকাৰ সেনাই ধাৰাবাহিকভাৱে ক্ষেপণাস্ত্ৰ আক্ৰমণ চলায়। তেওঁলোকে দাবী কৰা মতে, ওমান উপসাগৰত থকা এম টি কাভিজ, এম টি চাৰমিনাৰ, এম টি হৰাইজন আৰু এম টি ৰিস্কো নামৰ চাৰিখন তেলবাহী জাহাজক লক্ষ্য কৰি লোৱা হৈছিল। ইয়াৰ লগতে ইৰানৰ খাৰ্গ দ্বীপৰ সমীপত এম টি দৰিয়া নামৰ আন এখন জাহাজতো আক্ৰমণ চলোৱা হয়। আমেৰিকাৰ সেনাই দাবী কৰিছে যে তেওঁলোকে কোনো নাবিকৰ প্ৰাণহানি বিচৰা নাছিল। সেইবাবে আক্ৰমণৰ পূৰ্বেই জাহাজসমূহত থকা নাবিকসকলক নিৰাপদ স্থানলৈ আঁতৰি যাবলৈ সতৰ্কবাণী প্ৰেৰণ কৰা হৈছিল। নাবিকসকলে টেংকাৰ এৰি যোৱাৰ ফলত জাহাজসমূহে নিজৰ স্থান সলনি কৰিব নোৱাৰিলে। এই আক্ৰমণৰ ভয়ংকৰ ছবি আমেৰিকাৰ সেনাই নিজৰ এক্স হেণ্ডেলত প্ৰকাশ কৰিছে।
আমেৰিকাৰ সেনাৰ অভিযোগ অনুসৰি, ইৰানৰ ৰেভলিউশ্যনাৰী গাৰ্ড বাহিনীয়ে এই তেল টেংকাৰসমূহক কেইবা হাজাৰ কোটি ডলাৰৰ এক গোপন নেটৱৰ্কৰ অংশ হিচাপে ব্যৱহাৰ কৰিছিল। ইয়াৰ পৰা পোৱা ধনেৰে বাহিনীটোৱে নিজৰ আৰু পৰোক্ষ সমৰ্থকসকলৰ পুঁজি যোগান ধৰিছিল। আমেৰিকাৰ সেনাই দাবী কৰা মতে, এই আক্ৰমণ প্ৰতিহত কৰাৰ ক্ষমতা ইৰানৰ হাতত নাই। উল্লেখযোগ্য যে, মাত্ৰ তিনিদিন পূৰ্বেও আমেৰিকাৰ সেনাই ইৰানৰ আন তিনিখন তেলবাহী জাহাজত একেদৰেই আক্ৰমণ চলাইছিল।
আমেৰিকাৰ আক্ৰমণৰ প্ৰত্যুত্তৰ দি ইৰানেও জৰ্ডানত থকা আমেৰিকাৰ সামৰিক ঘাটি লক্ষ্য কৰি ক্ষেপণাস্ত্ৰ আক্ৰমণ চলায়। অৱশ্যে জৰ্ডানে পাছত জানিবলৈ দিয়ে যে তেওঁলোকৰ আকাশী প্ৰতিৰক্ষা ব্যৱস্থাই ইৰানৰ এই আক্ৰমণ বিফল কৰিছে। কিন্তু ইৰানে স্পষ্ট কৰি দিছে যে তেওঁলোক নীৰৱে বহি নাথাকে। কুৱেইট আৰু বাহৰেইনতো আক্ৰমণ চলোৱাৰ হুংকাৰ দিছে তেহৰানে। ইয়াৰ উপৰিও কুৱেইট আৰু বাহৰেইনৰ বন্দৰত থকা আমেৰিকাৰ তেলবাহী জাহাজৰ নাবিকসকলক ইৰানৰ সেনাই কঠোৰ সকিয়নি প্ৰদান কৰিছে।
হৰমুজ প্ৰণালী দীৰ্ঘদিন ধৰি দুয়োখন দেশৰ বিবাদৰ মূল কেন্দ্ৰবিন্দু হৈ আছে। যোৱা ফেব্ৰুৱাৰী মাহত আমেৰিকা আৰু ইজৰাইলৰ যৌথ বাহিনীয়ে ইৰানত আক্ৰমণ চলাই দেশখনৰ সৰ্বোচ্চ নেতা আয়াতোল্লাহ আলী খামেনেইক হত্যা কৰিছিল। তাৰ পাছৰ পৰাই এই সংঘাত তীব্ৰতৰ হৈ পৰিছে। পশ্চিম এছিয়াৰ বিভিন্ন দেশত থকা আমেৰিকাৰ ঘাটিসমূহক ধাৰাবাহিকভাৱে লক্ষ্য কৰি লৈছে ইৰানে। হৰমুজ প্ৰণালীত একাধিক বাণিজ্যিক সামগ্ৰী কঢ়িওৱা জাহাজ আক্ৰমণৰ বলি হৈছে। আমেৰিকাৰ মূল লক্ষ্য হৈছে ইৰানক আৰ্থিক আৰু সামৰিকভাৱে ইমানেই দুৰ্বল কৰি তোলা যাতে তেওঁলোকে পুনৰ পাৰমাণৱিক অস্ত্ৰ নিৰ্মাণ কৰিব নোৱাৰে। ইয়াৰ লগতে আমেৰিকাৰ ৰাষ্ট্ৰপতি ডনাল্ড ট্ৰাম্পে ইৰানৰ নেতৃত্ব সলনি কৰাৰো দাবী জনাইছে। আন্তঃৰাষ্ট্ৰীয় পৰ্যায়ত দুয়োখন দেশৰ সংঘাত দূৰ কৰিবলৈ মধ্যস্থতাৰ প্ৰচেষ্টা চলি আছে যদিও যোৱা কেইদিনমান ধৰি হৰমুজৰ তীৰত পুনৰ নতুনকৈ উত্তেজনা বৃদ্ধি পাইছে।
