ক’বলৈ গ’লে এতিয়া দুই ‘ক’ৰ আতংকই খেদি ফুৰিছে মহানগৰবাসীক। এফালে যদি সমগ্ৰ ৰাজ্যবাসীক মাৰাত্মক ক’ৰ’না ভাইৰাছে আতংকিত কৰি ৰাখিছে তাৰ সমান্তৰালকৈ বাৰিষাৰ কৃত্ৰিম বানপানীৰ কবলত পৰাৰ আশংকা মহানগৰবাসীৰ।
এজাক বৰষুণতে ভৰ্তি হয় মহানগৰীৰ নলা-নৰ্দমা সমূহ। যাৰ ফলত গেলা ভৰলুৰ বিষাক্ত পানীয়ে বুৰাই পেলাই ৰাজপথ, ঘৰ-দুৱাৰ। কৃত্ৰিম বানপানীয়ে যেন দিশহাৰা কৰি তোলে মহানগৰবাসীক।
ইপিনে, মহামাৰী ক’ৰ’নাৰ বিৰুদ্ধে যুঁজ দিবলৈ সমগ্ৰ দেশতে চলি আছে লকডাউন। যাৰ ফলত দেশৰ অৰ্থনীতিলৈ অশণি সংকেত অহাৰ সম্ভাৱনা প্ৰকট হৈ পৰিছে। বহু ক্ষুদ্ৰ ব্যৱসায়ী বা দৈনিক হাজিৰা কৰা লোক হতাশাৰ সন্মুখীন হৈছে। ব্যক্তিগত প্ৰতিষ্ঠানত কৰ্মৰত বহু লোক এতিয়া কাৰ্য্যালয় বন্ধ হৈ থকাৰ বাবে লাভ কৰা নাই মাহেকীয়া দৰমহা। যাৰ বাবে দিশহাৰা হৈ পৰিছে বহু লোক। এনে এক পৰিস্থিতিৰ মাজত কৃত্ৰিম বানপানীৰ কবলত পৰিলে এইসকল লোক কেনে এক অৱস্থাৰ সন্মুখীন হ’ব সেয়া কল্পনাৰো অতীত।
তদুপৰি, দীৰ্ঘদিন ধৰি মহানগৰীৰ বিভিন্ন ঠাইৰ নলা-নৰ্দমাসমূহ চাফা নকৰাৰ অভিযোগ উত্থাপিত হৈছে। লেতেৰা জাবৰ জোথৰে ভৰি পৰিছে নলাসমূহ, বন্ধ হৈ পৰিছে পানীৰ চলাচল। এজাক মুখলধাৰ বৰষুণ দিলেই নলাৰ গেলা পানী মিশ্ৰিত হয় খোৱা পানীৰ টেংকিৰ লগত। যাৰ ফলত লেতেৰা তথা বিষাক্ত পানী সেৱন কৰিবলগীয়া হয় মহানগৰবাসীয়ে। ইয়াৰোপৰি নলাত পানী জমা হোৱাৰ ফলত মহৰ প্ৰকোপত থাকিব পৰা নাই মহানগৰবাসী।
ইপিনে, মহানগৰীৰ ডাউন-টাউনৰ কৃষ্ণকান্ত সন্দিকৈ উপপথৰ একেই দুৰৱস্থা। বাৰিষাৰ দিনকেইটা অনবৰতে পথৰ ওপৰত পানী জমা হৈ থকাৰ ফলত সৃষ্টি হয় যাতায়তৰ সমস্যা। গুৱাহাটী উন্নয়ন বিভাগে বানপানীৰ পৰা সকাহ দিবলৈ নলাসমূহ বহল কৰাৰ পৰিকল্পনা কৰিছিল যদিও লকডাউনৰ ফলত আধাতে সামৰিলে কাম-কাজ। নলাসমূহত পানী জমা হ’বলৈ আৰম্ভ কৰিছে, উন্মুক্ত হৈ থাকে নলাসমূহ, নাই কোনো ঢাকনি। যাৰ বাবে কৃত্ৰিম বানপানীৰ ফলত আন এক নতুন সমস্যাৰ সন্মুখীন হ’ব পাৰে পথচাৰী।
