লকডাউনৰ মাজতে সোমবাৰৰ দিনটোত ৰাজ্যত সবাতোকৈ বেছি পৰিমাণে বিক্ৰী হ’ল সুৰা, আবকাৰী বিভাগৰ উচ্চস্তৰীয় এক সূত্ৰই জনাইছে এই কথা।
সূত্ৰটোৱে জনোৱা মতে আজিৰ দিনটোত ৰাজ্যত বিক্ৰী হ’ল ৫০ কোটিৰো অধিক টকাৰ সুৰা।
সূত্ৰটোৱে দাবী কৰা মতে কামৰূপ মহানগৰ জিলাতে ৩ কোটিৰো অধিক টকাৰ সুৰা বিক্ৰী হৈছে।
ইয়াৰোপৰি, যোৰহাটত ২কোটিৰো অধিক টকাৰ সুৰা বিক্ৰী হৈছে।
অৱশ্যে আবকাৰী বিভাগে সুৰা বিক্ৰীৰ তথ্য এতিয়াও আনুষ্ঠানিকভাৱে প্ৰকাশ কৰা নাই।
সুৰাৰ বাবে আজি মহানগৰীৰ বিপণীসমূহত গ্ৰাহকৰ দীঘলীয়া সাৰি দেখা গৈছিল।
আবকাৰী বিভাগে পুৱা ১০ বজাৰ পৰা বিয়লি ৫ বজালৈকে বিপণীসমূহ খুলিবলৈ অনুমতি দিছে।
লকডাউনৰ মাজতে অসমৰ সকলো সুৰা বিপণী, গুদাম, বটলিং প্লেট, উৎপাদন কাৰখানা মুকলিৰ বাবে ৰাজ্য চৰকাৰে দেওবাৰে নিৰ্দেশ দিছিল।
লকডাউনৰ বাবে যোৱা প্ৰায় তিনি সপ্তাহধৰি সুৰাৰ বিপণীসমূহ বন্ধ হৈ আছিল।
