এন আৰ চিক লৈ দেশজুৰি তোলপাৰ লাগি থকাৰ পৰতে অসমকে ধৰি দেশত থকা হিন্দু বাংলাদেশীক ‘অনুপ্ৰৱেশকাৰী’ নহয়, ‘শৰণাৰ্থী’ বুলিহে অভিহিত কৰি এজনো শৰণাৰ্থীক ভাৰতৰ পৰা ঘূৰাই পঠোৱা নহয় বুলি শনিবাৰে ক’লকাতাত অংগীকাৰ কৰিছে বিজেপিৰ ৰাষ্ট্ৰীয় সভাপতি অমিত শ্বাহে।
এন আৰ চিক প্ৰধান মন্ত্ৰী ৰাজীৱ গান্ধীয়ে স্বাক্ষৰ কৰা অসম চুক্তিৰ ‘আত্মা’ আৰু ‘হিম্মত’ থকা বিজেপিয়েহে এন আৰ চি উন্নীত কৰি দেখুৱাই দিলে বুলি কৃতিত্ব দাবী কৰা নেতাজনৰ চতুৰ ৰাজনীতি ক’লকাতাৰ মাটিত ভৰি দিয়াৰ লগে লগে এই মন্তব্যৰে যেন উদং খাই পৰিল।
‘এন আৰ চি অবৈধ অনুপ্ৰৱেশকাৰী চিনাক্তকৰণৰ প্ৰক্ৰিয়াহে, শৰণাৰ্থী চিনাক্তকৰণৰ প্ৰক্ৰিয়া নহয়,’ ক’লকাতা মহানগৰৰ বুকুত শনিবাৰৰ বিশাল জনসভাত উচ্চতম ন্যায়ালয়ৰ নিৰীক্ষণত হৈ থকা এন আৰ চি উন্নীতকৰণক লৈ ওলোটা খৰ বিজেপিৰ শীৰ্ষতম নেতাজনৰ।
বিদেশীক ধৰ্মৰ ভিত্তিত ‘শৰণাৰ্থী’ সজোৱাৰ বাবে অসমৰ সকলো খিলঞ্জীয়া সংগঠনে সৰ্বাত্মক বিৰোধিতা কৰা বিতৰ্কিত নাগৰিকত্ব বিধেয়কখন গৃহীত কৰিবলৈ বিজেপি প্ৰতিজ্ঞাবদ্ধ বুলিও ঘোষণা কৰিলে অমিত শ্বাহে।
‘সেই দেশসমূহৰ (বাংলাদেশ, পাকিস্তান, আফগানিস্তান) পৰা অহা সংখ্যালঘুৰ সুৰক্ষাৰ বাবে এই বিধেয়ক আনিবলৈ আমি প্ৰতিজ্ঞাবদ্ধ। আমি সকলো প্ৰকৃত শৰণাৰ্থীকে সুৰক্ষা দিম,’ শ্বাহৰ ঘোষণা।
আসন্ন নিৰ্বাচনত পশ্চিম বংগ দখলৰ লক্ষ্য স্থিৰ কৰা বিজেপিৰ চতুৰ ৰাজনীতিকজনে এন আৰ চিক লৈ তৃণমূল কংগ্ৰেছ নেত্ৰী তথা পশ্চিম বংগৰ মুখ্য মন্ত্ৰী মমতা বেনাৰ্জীক আক্ৰমণৰ সুযোগো পুৰামাত্ৰাই গ্ৰহণ কৰে।
‘তেওঁলোকে (তৃণমূলে) আমাক বাঙালী বিৰোধী সজাব খুজিছে। কিন্তু তাত কোনো সত্যতা নাই,’ ক’লে অমিত শ্বাহে।
শ্বাহে অভিযোগ কৰে যে তৃণমূল এন ডি এ’ৰ অংশীদাৰী দল হৈ থাকোতে মমতা বেনাৰ্জীয়ে অবৈধ অনুপ্ৰৱেশৰ বিৰোধিতা কৰিছিল।
‘২০০৫ চনত তেওঁ সংসদত সজোৰে এই বিষয়টো উত্থাপন কৰিছিল, কিন্তু এতিয়া তেওঁ অবৈধ অনুপ্ৰৱেশকাৰীৰ সুৰক্ষা দিব বিচাৰিছে,’ ‘কিয়’ বুলি মমতাক প্ৰশ্ন কৰি মন্তব্য শ্বাহৰ।
