তুলিৰাম ৰংহাং। হিমন্ত বিশ্ব শৰ্মাৰ এ.টি.এম। কাৰ্বি আংলংৰ ৰাস্তা – ঘাট এবাৰ ঘূৰিলেই গম পোৱা যায় তুলিৰাম ৰংহাং কিমান দুৰ্নীতিৰ সম্ৰাট। তুলিৰাম ৰংহাঙে এইবাৰ কাৰ্বি আংলংৰ ৰংখাঙ সমষ্টিৰ পৰা নিৰ্বাচনত প্রতিদ্বন্দ্বিতা কৰিছিল। কিছুদিন আগত অসমৰ ৰাজনীতিত এটা ভয়াবহ ঘটনা সংঘটিত হৈছিল। তুলিৰামৰ নিজৰ অৰ্থাৎ ৰংখাঙ সমষ্টিৰ ঘৰটো শ শ মানুহে জ্বলাই দিছিল। কিমান ভয়ানক ক্ষোভ হ‘লে তুলিৰামৰ দৰে প্রবল প্রতাপী এজনৰ ঘৰ ৰাইজে জ্বলাই দিবলৈ সাহস কৰে! এই ক্ষোভৰ উমান পায়েই হয়তো ঘৰ জ্বলোৱা কাকো অসম চৰকাৰে পিছত গ্রেপ্তাৰ কৰা পৰ্যন্ত দেখা নগল।
কিন্তু এইবাৰৰ বিধানসভা নিৰ্বাচনত তুলিৰামে এইটো সমষ্টিৰ পৰা ৭৫.৭২ % ভোট লাভ কৰিছে। অসমৰ ভিতৰত সৰ্বাধিক। হিমন্ত বিশ্ব শৰ্মাই আনকি নিজৰ সমষ্টিত ভোট লাভ কৰিছে ৭৪.৪২% । যোৱাবাৰৰ লোকসভা নিৰ্বাচনত (সমষ্টি পুন:নিৰ্ধাৰণৰ পিছত) এইটো সমষ্টিত বিজেপিয়ে লাভ কৰিছিল ৫৭,২৬১ টা ভোট , এইবাৰ বিজেপিয়ে লাভ কৰিছে ৮২,৬৩৪ টা ভোট।
জন ইংতি কাথাৰ। পাহাৰত জনপ্রিয় নাম জে. আই. কাথাৰ। আই.এ.এছ বিষয়া আছিল।পাহাৰৰ ৰাজনীতিৰ বিষয়ে সামান্য খবৰ ৰখা যিকোনো মানুহৰেই জে. আই. কাথাৰৰ জনপ্রিয়তা আৰু সুদৃঢ় সাংগঠনিক ভেটিৰ বিষয়ে জ্ঞাত। অন্তত: কাৰ্বি অধ্যুষিত অঞ্চলত। কাথাৰ আৰু কাথাৰৰ পাৰ্টী এ.পি.এইচ.এল.চিৰ কাৰ্যসূচী থাকিলে প্রশাসনেও সাত তাপ মাৰে। হাজাৰ হাজাৰ মানুহ হয় আৰু সকলো নিজৰ পইচাৰেই আন্দোলনত আহে। আদৰ্শৰ যুঁজ, স্ব- শাসিত ৰাজ্যৰ কাৰণে যুঁজ। বিশেষকৈ কাৰ্বি অধ্যুষিত অঞ্চলত বুথভিত্তিত কাথাৰৰ সকলোতে সংগঠন আছে। এ.পি.এইচ.এল.চিৰ শক্তিশালী আন্দোলনৰ কাৰণে কাৰ্বি আংলংত এতিয়াও কেইবাটাও বৃহৎ বৃহৎ কৰ্প‘ৰেট প্রজেক্ট আগবাঢ়িব পৰা নাই, যাৰ ফলত ১ লাখৰো অধিক জনজাতীয় মানুহৰ মাটি – ভেটি এতিয়াও উচ্ছেদ হোৱা নাই। এইটো অন্তত: আজিৰ দিনত কাথাৰৰ শক্তি।
বিৰোধীৰ কষ্ট আৰু সাংগঠনিক ভেটিৰ বিষয়ে ফেচবুকত আলোচনা চলি আছে। মই যোৱা প্রায় ডেৰ বছৰ ধৰি কাৰ্বি আংলংৰ বিভিন্ন আন্দোলনত সক্রিয় হৈ আছো। এই ডেৰ বছৰত কাথাৰ ১০ দিনো গুৱাহাটীৰ নিজৰ বাসভৱনত থকা দেখা নাই। তেওঁ কাৰ্বি আংলংত থাকে আৰু সদায় মানুহক লগ কৰে। অথচ ডিফু বিধানসভা সমষ্টিত কাথাৰ নিজেই প্রায় ৫০ হাজাৰ ভোটৰ ব্যৱধানত পৰাজিত হৈছে। যোৱবাৰৰ লোকসভা নিৰ্বাচনত ডিফু বিধানসভাত এই ব্যৱধান আছিল প্রায় ১১ হাজাৰ। অথচ তেতিয়া এলায়েন্সো নাছিল।
এইবাৰ কাৰ্বি আংলংত শ কোটিৰ অধিক পইচা কেৱল নিৰ্বাচনৰ দিনকেইটাত খৰচ কৰা হৈছে। বুথভিত্তিত ১৫ লাখকৈ টকা দিয়া বুলি আমাৰ হাতত খবৰ আছে।
কাৰ্বি আংলংত কৰ্প‘ৰেটৰ বৃহৎ বৃহৎ Investment আছে। গতিকে নিৰ্বাচনত বিজেপিৰ সপক্ষত টকাৰ উজান অহাতো স্বাভাবিক কথা। কিন্তু ইমান অস্বাভাবিক ফলাফলৰ কাৰণ কেৱল টকা নে অন্য বেলেগ। বিজেপিৰ সাংগঠনিক ভেটিও টকাৰ ওপৰতেই নিৰ্ভৰশীল। বিষয় আৰু তথ্যখিনি আপোনালোকলৈ এৰিলো।
