অক্তোবৰৰ প্ৰথম সপ্তাহৰ পৰা সমগ্ৰ অসমতে আধাৰ পঞ্জীয়নৰ কাম আৰম্ভ হ’ব। ৰাজ্যৰ ৩৩ জিলাত আৰম্ভ হ’ব লগীয়া এই প্ৰক্ৰিয়াটো কামৰূপ মহানগৰ জিলাতো একে সময়তে আৰম্ভ হ’ব।
এই উপলক্ষে ২৫ ছেপ্তেম্বৰত গুৱাহাটী আৱৰ্ত ভৱনত অনুষ্ঠিত এখন সভাত উপায়ুক্তজনে আধাৰৰ কামৰ লগত জড়িত বিষয়াসকলক কিছুমান দিহা-পৰামৰ্শ দিয়ে।
তেওঁ আধাৰ পঞ্জীয়ন কেন্দ্ৰত বিশেষভাৱে সক্ষম লোক, বৃদ্ধ, মহিলা, গৰ্ভৱতী মহিলা আৰু শিশুক অগ্ৰাধিকাৰ দিবলৈ আহ্বান জনায়।
ইয়াৰ উপৰি আধাৰ পঞ্জীয়ন কেন্দ্ৰবোৰত অনবৰতে বিদ্যুৎ যোগান, খোৱাপানী, শৌচালয় আৰু চকী-মেজ আদিৰ ব্যৱস্থা থকাটো নিশ্চিত কৰিবলৈ সকলোকে নিৰ্দেশ দিয়ে।
উল্লেখযোগ্য যে কামৰূপ মহানগৰ জিলাখনত মুঠ ২২টা গাঁও পঞ্চায়তৰ অধীনত ২২টা আধাৰ পঞ্জীয়ন কেন্দ্ৰ আৰু মহানগৰত ২০টা আধাৰ পঞ্জীয়ন কেন্দ্ৰ থাকিব। এই কেন্দ্ৰবোৰ পুৱা ৯-৩০ বজাৰ পৰা বিয়লি ৫ বজালৈ খোলা থাকিব।
এই প্ৰক্ৰিয়াটোত যাতে কোনো বিশৃংখলাৰ সৃষ্টি নহয় তাৰ ওপৰত গুৰুত্ব আৰোপ কৰিবলৈ আহ্বান জনায় উপায়ুক্তজনে।
উপায়ুক্তজনে কয় যে এই পঞ্জীয়ন সম্পূৰ্ণ বিনামূলীয়া। তেওঁ লগতে কয় নাগৰিকসকলে নিজৰ আধাৰ পঞ্জীয়নৰ বাবে পৰিচয় আৰু বাসস্থানৰ প্ৰমাণ হিচাপে পাৰপত্ৰ, পান কাৰ্ড, চালকৰ অনুজ্ঞা-পত্ৰ, বিদ্যুৎ বিল, টেলিফ’ন বিল, বেংকৰ পাছবুক, তহচিলদাৰৰ প্ৰমাণ-পত্ৰ, বীমা পলিচি, মিউনিচিপালটিৰ ৰচিদ, জন্মৰ প্ৰমাণ-পত্ৰ আদিৰ মূল প্ৰমাণ-পত্ৰ লগত লৈ আহিব লাগিব।
উল্লেখযোগ্য যে দেশৰ প্ৰায়বোৰ ৰাজ্যতে ইতিপূৰ্বে আধাৰ পঞ্জীয়নৰ কাম সম্পূৰ্ণ হৈ উঠিছে। জম্মু আৰু কাশ্মীৰ, অসম, মেঘালয়কে ধৰি কেইখনমান ৰাজ্যত এই কাম বাদ পৰি আছিল।
