যিসময়ত দেশখনৰ স্বাস্থ্যখণ্ডই ক’ভিড-১৯ৰ দ্বিতীয় ঢৌৰ বাবে ভয়াৱহ পৰিস্থিতিৰ মুখামুখি হৈছে, সেই সময়ত আইপিএলৰ নামত খৰচ কৰা হৈছে কোটি কোটি টকা।
শেহতীয়াকৈ দেশৰ সচেতন লোকসকলৰ মুখত এই আক্ষেপ চৰ্চিত হৈ পৰিছে।
কেৱল সাধাৰণ জনতাই নহয়, খোদ আইপিএলৰ ক্ৰিকেটাৰৰ মুখতো শুনা গ’ল একে বক্তব্য।
ৰাজস্থান ৰয়েলছৰ পেচাৰ এণ্ড্ৰিউ টায়েই ক’ভিড-১৯ৰ বাবে চলিত চিজনৰ আইপিএল আধাতে এৰি নিজ দেশ অষ্ট্ৰেলিয়ালৈ ঘূৰি গৈছে।
যোৱাৰ পূৰ্বে সোমবাৰে সংবাদমাধ্যমৰ আগত তেওঁ এক গুৰুত্বপূৰ্ণ বক্তব্য আগবঢ়াই গৈছে।
তেওঁ কয় যে ভাৰতীয় দৃষ্টিভংগীৰে ইয়াক লক্ষ্য কৰিবলৈ গ’লে প্ৰশ্ন উত্থাপন হয় যে কিদৰে এইসমূহ কোম্পানী আৰু ফ্ৰেঞ্চাইজিয়ে আইপিএলৰ নামত বিপুল পৰিমাণৰ টকা খৰচ কৰিছে, যিসময়ত চিকিৎসালয়সমূহে ৰোগীক ভৰ্তি কৰিবলৈ অক্ষম হৈ পৰিছে।
অৱশ্যে, তেওঁ কয় যে আইপিএল চলি থাকিব লাগে যদিহে মহামাৰিত আক্ৰান্ত লোকসকলক আইপিএলে দুঃশ্চিন্তাৰ পৰা মুক্ত কৰিছে অথবা আশাৰ ৰেঙনি প্ৰদান কৰিছে।
তেওঁ কয় যে আইপিএলৰ খেলুৱৈসকল সুৰক্ষিতভাৱেই আছে।
উল্লেখযোগ্য যে ৰাজস্থান ৰয়েলছে এক কোটি টকাত চুক্তিবদ্ধ কৰা ফাষ্ট বলাৰজনে এতিয়ালৈকে আইপিএলৰ চলিত চিজনত এখনো মেচত অৱতীৰ্ণ হোৱা নাই।
