ৰিলায়েন্স কমিউনিকেশ্যনৰ মুৰব্বী অনিল আম্বানি ঋণৰ মাজত ডুবি থকাৰ সময়তে আহিছে আৰু এক বিপদ।
মাত্ৰ ২১ দিনৰ ভিতৰত চীনৰ তিনিটা বেংকৰ প্ৰায় ৫হাজাৰ ৪৪৮কোটি টকাৰ ঋণ পৰিশোধ কৰিব লাগিব অনিল আম্বানিয়ে।
ইতিমধ্যে অনিল আম্বানিৰ কোম্পানীয়ে নিজকেই দেউলীয়া ঘোষণা কৰিছে।
ৰিলায়েন্স কমিউনিকেশ্যনৰ মুৰব্বী অনিলে সম্পত্তি বিক্ৰী কৰি ধাৰ মৰাৰ কাম আৰম্ভ কৰিছে যদিও সমস্যা কমা নাই।
ব্ৰিটেইনৰ এখন আদালতে ২০১২চনৰ ‘পাৰ্ছনেল গেৰান্টি’ গোচৰত দিয়া নিৰ্দেশৰ পাছত অনিল আম্বানি এইবাৰ আকৌ শলঠেকত পৰিছে।
এই মুহূৰ্তত অনিল আম্বানিৰ বাবে ইমান টকাৰ ঋণ পৰিশোধ কৰাটো অসম্ভৱ।
চীনৰ ৰাষ্ট্ৰীয়কৃত বেংক চাইনা ডেভেলপমেন্ট বেংক, ইণ্ডাষ্ট্ৰীয়েল এণ্ড কমাৰ্ছিয়েল বেংক অফ চাইনা আৰু এক্সিম বেংক অফ চাইনাই অনিল আম্বানিৰ কোম্পানীক কেইবা হাজাৰ কোটি টকা ঋণ দিয়া বুলি দাবি কৰিছে।
ইয়াৰ ভিতৰত চাইনা ডেভেলপমেন্ট বেংকে অনিল আম্বানিক দিছে ৯হাজাৰ ৮৬০কোটি টকা, এক্সিম বেংক অফ চাইনাই দিছে ৩হাজাৰ ৩৬০ কোটি টকা।
আনহাতে, ইণ্ডাষ্ট্ৰীয়েল এণ্ড কমাৰ্ছিয়েল বেংক অফ চাইনাই অনিল আম্বানিৰ পৰা ১হাজাৰ ৫৫৪কোটি টকা পাবলগীয়া আছে বুলি দাবী কৰিছে।
অনিল আম্বানিয়ে এই ঋণসমূহ হেনো ব্যক্তিগত গেৰান্টিত লৈছিল।
নিজৰ ব্যৱসায় ক্ৰমাৎ দুৰ্বল হৈ পৰাত বেংককেইটাৰ ঋণ আদায় দিবলৈ সক্ষম নহ’ল অনিল আম্বানি।
ইপিনে, বেংককেইটাই একে সময়তে ভাৰত আৰু ব্ৰিটেইনৰ আদালতত অনিল আম্বানিৰ বিৰুদ্ধে গোচৰ তৰে।
ব্ৰিটেইনৰ আদালতে শুকুৰবাৰে অনিল আম্বানিক ২১ দিনৰ ভিতৰত ভাৰতীয় মুদ্ৰাত প্ৰায় চাৰে পাঁচ হাজাৰ কোটি টকা আদায় দিবলৈ নিৰ্দেশ দিয়ে।
আদালতখনে স্পষ্ট কৰিছে যে অনিল আম্বানিয়ে এই ঋণ যিহেতু নিজৰ ব্যক্তিগত গেৰান্টিত লৈছিল, গতিকেই তেওঁৰ দেউলীয়া হোৱা কোম্পানীৰ লগত ইয়াৰ কোনো সম্পৰ্ক নাই আৰু এই ঋণ পৰিশোধ কৰিবই লাগিব।
ইপিনে. অনিলৰ মুখপাত্ৰই ব্যক্তিগত গেৰান্টিত ঋণ লোৱাৰ কথা অস্বীকাৰ কৰিছে আৰু এয়া পৰিশোধ কৰিবলৈ বাধ্য নহয় বুলি কয়।
ইয়াৰ পূৰ্বেও ভাৰতৰ কেইবাটাও বেংকৰ ঋণৰ গোচৰত বিপদত পৰিছিল অনিল আম্বানি। কিন্তু অৱশেষত জ্যেষ্ঠ ভাতৃ মুকেশ আম্বানিয়ে তেওঁক উদ্ধাৰ কৰে।
