তেলেংগানাত অঘৰী কুকুৰ হত্যাৰ ঘটনাৰ অৱসান ঘটা নাই। পুনৰ বিষাক্ত দ্ৰব্য প্ৰয়োগ কৰি ২০০ টা অঘৰী কুকুৰক হত্যা কৰাৰ অভিযোগ উত্থাপন হৈছে। এইবাৰ এই ঘটনা সংঘটিত হৈছে হানমকোণ্ডাত।
সূত্ৰ অনুসৰি যোৱা বছৰৰ ডিচেম্বৰৰ পৰা ৰাজ্যখনত ১১০০ৰো অধিক কুকুৰৰ অস্বাভাৱিকভাৱে মৃত্যু হৈছে। সোমবাৰে পশুপ্ৰেমী সংগঠনৰ কৰ্মী আদিলাপুৰম গৌতমে ছায়ামপেট থানাত লিখিত এজাহাৰ দাখিল কৰিছে।
কৰিমনগৰত থকা ‘ষ্ট্ৰে এনিমেল ফাউণ্ডেশ্যন অৱ ইণ্ডিয়া’ স্বেচ্ছাসেৱী সংগঠনৰ প্ৰতিনিধি আদিলাপুৰম গৌতমে কয় যে তেওঁলোকৰ সংগঠনে অঘৰী কুকুৰৰ মৃত্যুৰ ঘটনাত কেইবাটাও স্থানত তদন্ত চলাইছিল। গাঁওবাসীৰ লগত কথা পতাৰ পাছত তেওঁলোকে গম পালে যে পঞ্চায়ত সভাপতিৰ প্ৰৰোচনাত অঘৰী কুকুৰক এইদৰে হত্যা কৰা হৈছে।
আদিলাপুৰম গৌতমে লগতে কয় যে বিগত বৰ্ষৰ ডিচেম্বৰৰ পৰা অঘৰী কুকুৰৰ মৃত্যুৰ ঘটনা পোহৰলৈ আহিছে। অভিযোগ অনুসৰি মৃত কুকুৰকেইটাৰ মৃতদেহ মাটিৰ তলত পুতি থোৱা হৈছে। এই ঘটনাৰ দোষীক কঠোৰ শাস্তি প্ৰদানৰ দাবী জনাইছে গৌতমে।
নতুনকৈ দাখিল কৰা এজাহাৰৰ সমান্তৰালকৈ পূর্বৰ ঘটনাৰ তদন্তও অব্যাহত আছে বুলি প্রকাশ কৰে ছায়ামপেট থানাই৷ ইয়াৰ পূৰ্বে হানমকোণ্ডা জিলাৰ ছায়াম্পেট আৰু আৰেপল্লী গাঁৱত প্ৰায় ৩০০টা অঘৰী কুকুৰ হত্যাৰ গোচৰত এফআইআৰ দাখিল কৰা হৈছিল। ইতিমধ্যে সেই ঘটনাত দুগৰাকী মহিলা চৰপঞ্চ আৰু তেওঁলোকৰ স্বামীকে ধৰি মুঠ ৯জন লোকৰ বিৰুদ্ধে গোচৰ ৰুজু কৰা হৈছে। ইতিমধ্যে অভিযুক্তক বিচাৰি উলিয়াবলৈ আৰম্ভ কৰা হৈছে তালাচী অভিযান।
তেলেংগানাৰ বিভিন্ন অঞ্চলৰ পৰা এটাৰ পিছত এটাকৈ অঘৰী কুকুৰ হত্যাৰ অভিযোগ পোৱা গৈছে। বিগত বৰ্ষৰ ডিচেম্বৰ মাহত গাঁও পঞ্চায়ত নিৰ্বাচনৰ সময়ত অঞ্চলটোৰ জনপ্ৰতিনিধিয়ে গাঁওবাসীক অঘৰী কুকুৰৰ ভাবুকি বন্ধ কৰাৰ প্ৰতিশ্ৰুতি দিছিল। এতিয়া সেই প্ৰতিশ্ৰুতি পূৰণৰ বাবে সু-পৰিকল্পিতভাৱে এই হত্যাকাণ্ড সংঘটিত কৰা হৈছে।
উল্লেখ্য যে ইয়াৰ পূৰ্বেও ইয়চাৰাম গাঁৱত এশটা কুকুৰ হত্যা কৰাৰ অভিযোগত চৰপঞ্চ আৰু পঞ্চায়ত সচিবৰ বিৰুদ্ধে গোচৰ ৰুজু কৰা হৈছে। আনহাতে, কামাৰেড্ডী জিলাত প্ৰায় ২০০টা কুকুৰ হত্যা কৰাৰ অভিযোগত পাঁচজন চৰপঞ্চকে ধৰি ছয়জন লোকৰ বিৰুদ্ধে গোচৰ ৰুজু কৰা হৈছে।
জগটিয়াল জিলাৰ পেগাদাপল্লী গাঁৱতো একেধৰণে বিষাক্ত বেজী ব্যৱহাৰ কৰি ৩০০টা কুকুৰক হত্যা কৰাৰ অভিযোগ উত্থাপন হৈছে। তাতো আৰক্ষীয়ে চৰপঞ্চ আৰু পঞ্চায়ত সচিবৰ বিৰুদ্ধে গোচৰ ৰুজু কৰিছে। প্ৰতিটো ক্ষেত্ৰতে বিষাক্ত বেজী ব্যৱহাৰ কৰা বুলি কোৱা হৈছে।
