খেলখন টাইব্ৰেকাৰত পেণ্ডুলামৰ দৰে ডুলি থাকিল। এলিনা ৰাইবাকিনাই এবাৰ মেচ পইণ্ট লাভ কৰিছে যদি পিছৰ মুহূৰ্ততে আন্না ব্লিংকোভাই মেচ পইণ্টত কাঢ়ি নিলে। গ্ৰেণ্ড শ্লেমত মহিলা টেনিছৰ আটাইতকৈ দীঘলীয়া টাইব্ৰেকাৰৰ সাক্ষী হ’ল অষ্ট্ৰেলিয়ান অ’পেন। শেষত ৰেংকিঙত নথকা ব্লিংকোভাই যুদ্ধ জয় কৰিলে। মহিলাৰ তৃতীয় স্থানৰ ৰাইবাকিনাক পৰাস্ত কৰি অষ্ট্ৰেলিয়ান অ’পেনৰ তৃতীয় ৰাউণ্ডত প্ৰৱেশ কৰে ব্লিংকোভাই।
ৰাইবাকিনাৰ বিৰুদ্ধে প্ৰথম ছেটত জয়লাভ কৰে ব্লিংকোভাই (৬-৪)। তেতিয়াই অঘটনৰ ইংগিত পোৱা গ’ল। কিন্তু পৰৱৰ্তী ছেটত পিছ পৰি থকাৰ পিছতো ৰাইবাকিনাই শক্তিশালী প্ৰত্যাৱৰ্তন কৰে। তেওঁ ৩-৫ ব্যৱধানত পিছ পৰি থাকিও ৬-৪ ব্যৱধানত ছেটটো জয় কৰে। খেলখন টাইব্ৰেকাৰলৈ যায়।
কাজাখস্তানৰ ৰাইবাকিনা তাতো পিছ পৰিল। ৰাছিয়াৰ ব্লিংকোভাই ৪-১ ব্যৱধানত আগবাঢ়ি যায়। ১০ পইণ্টৰ টাইব্ৰেকাৰত প্ৰথমেই ১০ পইণ্ট লাভ কৰে ব্লিংকোভাই। কিন্তু দুটা পইণ্টৰ ব্যৱধান নথকাৰ বাবে খেলখন আগবাঢ়িল। তাৰপিছতে নাটক।
এবাৰ ৰাইবাকিনা আগবাঢ়িল, তাৰ পিছত ব্লিংকোভা। কোনেও কাকো হাৰ মনাব পৰা নাছিল। টাইব্ৰেকাৰৰ সময় লাহে লাহে আগবাঢ়িছিল। এটা সময়ত এনে লাগিছিল যেন কোনো এজন জয়ী হ’ব। কিন্তু কোনো সময়তে দুটা পইণ্টৰ ব্যৱধান নাছিল। শেষত ২০-২১ ব্যধানত পিছ পৰি থকাৰ সময়তে ৰাইবাকিনাই আনফ’ৰ্ছড এৰ’ৰ কৰে। সহজ শ্বট এটা বাহিৰলৈ মাৰিলে। টাইব্ৰেকাৰত ২২-২০ ব্যৱধানত ব্লিংকোভাই মেচখনত জয়লাভ কৰে।
ইয়াৰ পূৰ্বে গ্ৰেণ্ড শ্লেমত আটাইতকৈ দীঘলীয়া টাইব্ৰেকাৰ আছিল যোৱা বছৰ উইম্বলডনৰ তৃতীয় ৰাউণ্ডত। ইউক্ৰেইনৰ লেছিয়া চুৰেংকোৱে ৰোমানিয়াৰ এন বোগডানক ২০-১৮ পইণ্টেৰে পৰাস্ত কৰে। সেই অভিলেখ ভংগ হ’ল অষ্ট্ৰেলিয়ান অ’পেনত। মহিলা টেনিছত ইতিহাস গঢ়ি উঠিল।
