বাংলাদেশত পুনৰ মৰিয়াই হত্যা কৰা হৈছে এজন হিন্দু যুৱকক। এইবাৰ ঘটনাৰ স্থান আছিল ৰাজবাৰী। মৃত যুৱকজনৰ নাম অমৃত মণ্ডল। অঞ্চলটোত তেওঁ সম্ৰাট নামেৰেও পৰিচিত আছিল।
বুধবাৰে নিশা ১১ বজাৰ আশেপাশে নৃশংসভাৱে হত্যা কৰা হয় ২৯ বছৰীয়া যুৱকজনক। কিছুদিন পূৰ্বে মৌলবাদীয়ে মৈমনচিঙৰ ভালুকাত ২৭ বছৰীয়া হিন্দু যুৱক দিপু চন্দ্ৰ দাসকো হত্যা কৰিছিল। সেই ঘটনাৰ ৰেশ এতিয়াও মাৰ যোৱা নাই। ইয়াৰ মাজতে পোহৰলৈ আহিল এই ঘটনা।
ডেইলী ষ্টাৰত প্ৰকাশিত এক বাতৰি অনুসৰি স্থানীয় আৰক্ষী থানাৰ বিষয়া দেবব্ৰত সৰকাৰে এই মৃত্যুৰ খবৰ নিশ্চিত কৰিছে। তেওঁ কয় যে যোৱা নিশা আৰক্ষীয়ে এই খবৰ লাভ কৰিছিল। খবৰ পোৱাৰ পিছতে সেই স্থানলৈ যায় বৃহৎ আৰক্ষী বাহিনী। মৃতদেহটো উদ্ধাৰ কৰা হৈছে। মৰণোত্তৰ পৰীক্ষাৰ বাবে মৃতদেহটো মৰ্গলৈ প্ৰেৰণ কৰা হৈছে।
ডেইলী ষ্টাৰৰ প্ৰতিবেদনত লগতে প্ৰকাশ পাইছে যে আৰক্ষীয়ে সম্ৰাটৰ এজন সহযোগী মহম্মদ চেলিমক গ্ৰেপ্তাৰ কৰিছে। তেওঁৰ পৰা উদ্ধাৰ হৈছে দুটা আগ্নেয়াস্ত্ৰ যাৰ ভিতৰত আছে এটা পিষ্টল আৰু স্থানীয় ৱান শ্বুটাৰ বন্দুক।
আৰক্ষী বিষয়াসকলে জনোৱা মতে, সম্ৰাটৰ বিৰুদ্ধে কমেও দুটা গোচৰ আছে। তাৰে এটা হত্যাকাণ্ডৰ গোচৰ। স্থানীয় ৰাইজে আৰক্ষীক জনোৱা মতে, সম্ৰাটে আগতে এটা অপৰাধী চক্ৰ চলাইছিল। ধন দাবী আৰু অন্যান্য অবৈধ কামত জড়িত আছিল। তেওঁলোকৰ দাবী, শেহতীয়াকৈ গাঁওখনলৈ উভতি অহাৰ পূৰ্বে যুৱকজনে দীৰ্ঘদিন ধৰি ভাৰতত আত্মগোপন কৰি আছিল।
স্থানীয় বাসিন্দা শ্বাহিদুল ইছলামৰ পৰা সম্ৰাটে ধন দাবী কৰা বুলি গাঁওবাসীয়ে অভিযোগ উত্থাপন কৰে। কিন্তু মানুহজনে ধন দিবলৈ অস্বীকাৰ কৰাত সম্ৰাট আৰু তেওঁৰ দলটো তেওঁৰ ঘৰলৈ আহিল। তেনেতে শ্বাহিদুলৰ ঘৰৰ মানুহে তেওঁক ডকাইত বুলি চিঞৰিবলৈ ধৰে। গেংটোৰ আন সদস্যসকল পলায়ন কৰে। অৱশ্যে সম্ৰাট গণপ্ৰহাৰৰ বলি হয়। উক্ত দলটোৱে চেলিমক অস্ত্ৰ-শস্ত্ৰসহ আৰক্ষীক গতাই দিয়ে।
উল্লেখ্য যে মহম্মদ ইউনুছৰ অধীনত বাংলাদেশত হিন্দুসকলৰ ওপৰত হোৱা অত্যাচাৰ আটাইতকৈ বেছি। শ্বেখ হাছিনাই দেশ এৰি যোৱাৰ পাছত হিন্দু হত্যা আৰম্ভ হয়। মৌলবাদীসকলে বহু সংখ্যালঘুক অত্যাচাৰ আৰু লুণ্ঠন কৰিছে। মন্দিৰ ভাঙি-ছিঙি পেলোৱাৰ ঘটনাও পোহৰলৈ আহিছে। শেহতীয়াকৈ কাপোৰ কাৰখানাৰ শ্ৰমিক দিপু চন্দ্ৰ দাসক উগ্ৰপন্থীয়ে হত্যা কৰিছিল। সেই ঘটনাৰ পুনৰাবৃত্তি ঘটিছে।
