নৱবৰ্ষৰ আৰম্ভণিতে এটা চাঞ্চল্যকৰ খৱৰে উজনি অসমৰ চৰাইদেউ অঞ্চলৰ ৰাইজৰ মাজত প্ৰতিক্ৰিয়াৰ সৃষ্টি কৰিছে। চৰাইদেউৰ বৰহাট লাকিলী গাঁৱৰ পৰা যোৱা ১৮ ডিচেম্বৰৰ পৰা অৰুণাভ গগৈ নামৰ যুৱকজন সন্ধানহীন হৈ আছে। ইপিনে, অৰুণাভৰ পিতৃয়ে পুত্ৰ আলফা স্বাধীনলৈ যোৱাৰ সন্দেহৰ খৱৰটো আৰক্ষীৰ পৰা লাভ কৰা বুলি জানিবলৈ দিয়ে।
উল্লেখযোগ্য যে অৰুণাভে কামৰ উদ্দেশ্যেৰে মৰাণৰ এটা ভাড়াঘৰত থাকিবলৈ লৈছিল। অৰুণাভৰ চৰাইদেও জিলাৰ গৃহ গাঁও লাকিলী অসম-অৰুণাচল সীমান্তত অৱস্থিত। আৰক্ষীয়ে অৰুণাভে সংযুক্ত মুক্তি বাহিনী অসম(স্বাধীন)ত যোগদান কৰা বুলি সন্দেহ প্ৰকাশ কৰিছে।
ইপিনে, অৰুণাভৰ পৰিয়ালে আৰক্ষীৰ পৰা এই বিষয়ে জানিব পৰাৰ পাছতেই চৰাইপুং আৰক্ষী থানাত এটা পুত্ৰ সন্ধানহীন হোৱাৰ গোচৰ দাখিল কৰিছে।
আনহাতে, অৰুণাভ সন্ধানহীন হোৱাৰ কথা প্ৰথমৱাস্থাত তেওঁৰ পিতৃ-মাতৃয়ে জানিব পৰ নাছিল। আৰক্ষীয়ে জনোৱাৰ পাছতহে তেওঁলোকে পুত্ৰ সন্ধানহীন হোৱা সম্পৰ্কে অৱগত হয়। স্থানীয় আৰক্ষীৰ পৰা অৰুণাভ সন্ধানহীন হোৱাৰ খৱৰ পোৱাৰ পাছত তেওঁৰ পিতৃয়ে প্ৰকাশ কৰে যে যদি তেওঁলোকৰ পুত্ৰ আলফা (স্বা:)লৈ গৈছে, তেনেহ’লে তেওঁ ঘৰলৈ উভতি আহিব লাগে।
অৱশ্যে, অৰুণাভ আলফা (স্বা:)লৈ যোৱা কথাটোত আশ্চৰ্য প্ৰকাশ কৰি তেওঁৰ পিতৃয়ে কয় যে যোৱা ১৮ ডিচেম্বৰৰ পৰাই অৰুণাভক তেওঁলোকে ফোনত পোৱা নাছিল। কিন্তু কিবা কামত ব্যস্ত থকা বুলি ভাবি তেওঁলোকে অইন চিন্তা কৰা নাছিল। তদুপৰি, তেওঁলোকৰ পুত্ৰই এনেকুৱা এটা সিদ্ধান্ত ল’ব পাৰে বুলি তেওঁলোকে কেতিয়াও ভাবিব পৰা নাছিল।
যোৱা ৩১ ডিচেম্বৰত আৰক্ষীয়ে আহি পৰিয়ালক অৰুণাভ সন্ধানহীন হোৱাৰ খৱৰটোৰ লগতে তেওঁ আলফা (স্বা:) লৈ যোৱাৰ সন্দেহৰ কথা জনাইছিল।
