পিয়ংইয়ং বিৰোধী লিফলেট সংক্ৰান্তীয় বিবাদে নতুন মোৰ লৈছে চিৰ বৈৰী দুই ৰাষ্ট্ৰ দক্ষিণ কোৰিয়া আৰু উত্তৰ কোৰিয়াৰ মাজত।
উত্তৰ কোৰিয়াৰ শাসক কিম জং উনে ছিউলক সতৰ্ক কৰি দিছে যে যদি দক্ষিণ কোৰিয়াই কিম বিৰোধী লিফলেট প্ৰচাৰ বন্ধ নকৰিলে দুই ৰাষ্ট্ৰৰ মাজৰ সম্পৰ্ক আৰু অধিক অৱনিত ঘটিব।
পিয়ংইয়ঙে এইবুলিও ছিউলক সতৰ্ক কৰি দিছে কিম উনৰ বিৰোধী আন্দোলনকাৰীৰ কণ্ঠৰোধ নকৰিলে উত্তৰ কোৰিয়াই দক্ষিণ কোৰিয়াৰ সৈতে বাৰ্তালাপ বন্ধ কৰি দিব।
উল্লেখ্য যে, দক্ষিণ কোৰিয়াৰ কিম বিৰোধী আন্দোলনকাৰীয়ে উত্তৰ কোৰিয়াৰ সীমান্তত কিম বিৰোধী লিফলেট সম্বলিত বেলুন উৰুৱাইছিল।
উত্তৰ কোৰিয়াৰ চৰকাৰী সংবাদ মাধ্যম কোৰিয়ান চেন্ট্ৰেল নিউজ এজেঞ্চি(কেচিএনএ) জনাইছে যে লিফলেট ইছ্যুটোৰ বাবে এক দুই দিনৰ ভিতৰতে দক্ষিণ কোৰিয়াৰ আন্তঃৰাষ্ট্ৰীয় সীমান্তত দুই দেশৰ মাজৰ যোগাযোগ বিচ্ছিন্ন কৰা হ’ব।
‘অপ্ৰয়োজনীয় বিষয় বৰ্জন কৰি দক্ষিণ কোৰিয়াৰ সৈতে সকলোধৰণৰ যোগাযোগ সম্পূৰ্ণৰূপে ছিন্ন কৰাৰ ই হৈছে প্ৰথম পদক্ষেপ।’ কেচিএনএ-ত প্ৰকাশ।
কেচিএনএ-এ অভিযোগ কৰি কয় যে, ‘উত্তৰ কোৰিয়াৰ বিৰুদ্ধে অনভিপ্ৰেতভাৱে পৰোক্ষ বৈৰী আচৰণত লিপ্ত হৈছে দক্ষিণ কোৰিয়াৰ শাসক। এনেবোৰ নকৰাত্মক অজুহাত দেখুৱাই দক্ষিণ কোৰিয়াই বৃহত্তৰ দায়িত্ব এৰাই চলিছে।’
উল্লেখ্য যে, দক্ষিণ কোৰিয়াৰ কিম বিৰোধীসকলে পূৰ্বেও এনেধৰণৰ আন্দোলনত অংশগ্ৰহণ কৰিছিল। ২০১৪ চনতো কিমৰ পৰমাণু নীতিৰ বিৰুদ্ধে এইধৰণে বিশাল বেলুন উৰুৱা হৈছিল, যিবোৰ বেলুন উত্তৰ কোৰিয়াৰ সেনাবাহিনীয়ে গুলী কৰি ফুটাই দিছিল। সেই কাণ্ডত উত্তৰ কোৰিয়াৰ দলত্যাগীসকলেও যোগ দিছিল।
ইফালে দক্ষিণ কোৰিয়াই কিম বিৰোধী আন্দোলকাৰীৰ বিৰুদ্ধে আইনী পদক্ষেপ লোৱাৰ কথা ঘোষণা কৰিছে।
অৱশ্যে দক্ষিণ কোৰিয়াৰ এই পদক্ষেপত সন্তুষ্ট হোৱা নাই উত্তৰ কোৰিয়া।
উত্তৰ কোৰিয়াই এই প্ৰক্ৰিয়াত দক্ষিণ কোৰিয়াৰ শাসকপক্ষই আন্তৰিকতাশূন্য ভাৱে কাম কৰা বুলিও অভিযোগ কৰিছে।
