অখিল গগৈ স্ব-ইচ্ছাৰে GMCH ত থাকিব বিচাৰিছে তথা অখিল গগৈৰ একোৱেই বেমাৰ নাই বুলি মন্ত্ৰী হিমন্ত বিশ্ব শৰ্মাই কোৱাৰ পাছত তেওঁক উভতি ধৰিছে অনুসুচিত জাতি যুৱ ছাত্ৰ পৰিষদে।
পৰিষদৰ সভাপতি ৰুবুল দাসে নৰ্থ ইষ্ট নাওলৈ প্ৰেৰণ কৰা এটা ভিডিঅ’ত মন্ত্ৰীগৰাকীৰ এই মন্তব্যক ‘উদ্ভট যুক্তি’ আখ্যা দি লগতে কয়,‘মন্ত্ৰীগৰাকীয়ে হাঁহি উঠা কথা ক’লে। যি অখিল গগৈক NIA আৰু ৰাজ্য চৰকাৰে আদালতৰ জৰিয়তে বন্দী কৰি ৰাখিছে আৰু ক’ৰ’নাত আক্ৰান্ত হৈ চিকিৎসা মহাবিদ্যালয়ত চিকিৎসাধীন কৰি ৰাখিছে। এগৰাকী বন্দী মানুহ স্ব-ইচ্ছাৰে হাস্পতালত থাকিব পাৰে নেকি?’
‘মোৰ সন্দেহ হৈছে সৰ্বানন্দ সোণোৱাল আৰু হিমন্ত বিশ্ব শৰ্মাই কূটিল ৰাজনীতি কৰাৰ স্বাৰ্থত অখিল গগৈক হাস্পতালত বন্দী কৰি ৰাখি এখন নাটক সৃষ্টি কৰিছে। গোটেই সংগ্ৰামখন মষিমূৰ কৰিবৰ বাবে তেওঁলোকে চেষ্টা কৰিছে।‘ দাসে লগতে কয়।
দাসে লগতে দাবী কৰি কয়, ‘যদি অখিল গগৈৰ কোনোধৰণৰ ৰোগ-ব্যাধি নাই তেন্তে তেওঁক পুনৰ জেইললৈ প্ৰেৰণ কৰিব লাগে। বিনা ৰোগত যদি অখিল গগৈক চিকিৎসালয়ত ৰাখিছে তাৰ বাবে চৰকাৰ দায়বদ্ধ।‘
হিমন্ত বিশ্ব শৰ্মাৰ এনে কুটিল ৰাজনীতিৰ দ্বাৰা জাতি উদ্ধাৰ নহয় বুলিও দাসে উল্লেখ কৰে।
উল্লেখযোগ্য যে, অখিল গগৈৰ স্বাস্থ্যৰ সন্দৰ্ভত মন্ত্ৰী হিমন্তক সাংবাদিকে প্ৰশ্ন কৰাত তেওঁ কৈছিল ‘‘অখিল গগৈ আছে কাৰণে আছে আৰু। চিকিৎসকসকলে কৈছে তেওঁৰ বেমাৰ বুলি একো নাই। ইয়াতে থাকক বুলি আছে আৰু। ইয়াত টিভিৰ আগতো তেওঁ সাক্ষাৎকাৰ দিছে। চিকিৎসকৰ ফালৰ পৰা দায়িত্ব শেষ। তেওঁ যদি যাব খোজে যাব পাৰে।‘
