APCC Files Case Against Kangana ভাৰতৰ স্বাধীনতা আন্দোলনৰ বীৰ শ্বহীদসকলক কেন্দ্ৰ কৰি অপমানসূচক মন্তব্য কৰাৰ গুৰুতৰ অভিযোগ তুলি বলিউডৰ অভিনেত্ৰী কংগনা ৰানাৱটৰ বিৰুদ্ধে গোচৰ তৰিছে অসম প্ৰদেশ কংগ্ৰেছ কমিটিয়ে।
ইপিনে, কিছুদিন পূৰ্বে কংগনাই কৈছিল যে ২০১৪ চনত নৰেন্দ্ৰ মোদীয়ে দেশৰ শাসনভাৰ লোৱাৰ পৰাহে ভাৰতে স্বাধীনতা লাভ কৰিছে। ইয়াৰ পূৰ্বে ১৯৪৭ চনৰ স্বাধীনতা আছিল ব্ৰিটিছৰ পৰা লোৱা এক ভিক্ষাহে!
তদুপৰি, কংগনাই কৈছিল যে কংগ্ৰেছ হৈছে ব্ৰিটিছৰাজৰেই এটা সম্প্ৰসাৰণ আৰু ২০১৪ চনতহে ভাৰতে প্ৰকৃত স্বাধীনতা লাভ কৰিছে।
ইয়াৰ পাছতে কংগনাৰ বিৰুদ্ধে সৰৱ হৈ পৰিছে কংগ্ৰেছ। বৃহস্পতিবাৰে দিচপুৰ থানাত কংগনাৰ বিৰুদ্ধে এজাহাৰ দাখিল কৰে প্ৰদেশ কংগ্ৰেছৰ সাধাৰণ সম্পাদক তথা মুখপাত্ৰ ৰমেন বৰঠাকুৰ, উপ সভাপতি দ্বীজেন শৰ্মা, মুখপাত্ৰ মীৰা বৰঠাকুৰ আৰু মনজিত মহন্তই।
অসম আন্দোলনৰ শ্বহীদক অপমান কৰি কাৰাগাৰত কংগ্ৰেছী বিধায়ক শ্বেৰমান আলী। বিজেপি চৰকাৰে শ্বহীদক অপমান কৰা কংগনা ৰানাৱটৰ বিৰুদ্ধে ব্যৱস্থা গ্ৰহণ কৰিবলৈ সাহস হ’ব নে?
এই প্ৰশ্ন প্ৰদেশ কংগ্ৰেছৰ জ্যেষ্ঠ মুখপাত্ৰ তথা সাধাৰণ সম্পাদক ৰমেন বৰঠাকুৰৰ।
উল্লেখযোগ্য যে, আজৱ আৰু পক্ষপাতদুষ্ট মন্তব্যৰে সততে চৰ্চাত থকা অভিনেত্ৰী কংগনা ৰানাৱটে পূৰ্বেও বহুকেইটা বিতৰ্কিত মন্তব্য কৰিছিল।
Also Read: পঞ্চতাৰকা যুক্ত হোটেলত বহি থকা সকলে প্ৰদূষণৰ বাবে দোষাৰোপ কৰে কৃষকক: উচ্চতম ন্যায়ালয়
ভাৰতৰ স্বাধীনতা আন্দোলনৰ বীৰ শ্বহীদক কেন্দ্ৰ কৰি কংগনাই কৰা শেহতীয়া এটা মন্তব্যৰ ওপৰত ভিত্তি কৰি তেওঁৰ বিৰুদ্ধে এখন অভিযোগ পত্ৰ দাখিল কৰিছে আম আদমী পাৰ্টিৰ নেত্ৰী প্ৰীতি মেননে।
মুম্বাই আৰক্ষীক দিয়া অভিযোগ পত্ৰখনত কংগনাৰ ওপৰত ৫০৪, ৫০৫ আৰু ১২৪এ ধাৰাৰ অধীনত এটা দেশদ্ৰোহীতাৰ গোচৰ ৰুজু কৰিবলৈ আবেদন কৰা হৈছে।