চেল্ফি ভিডিওৰ জৰিয়তে ৰাইজক নিজৰ সমস্যাসমূহ দাঙি ধৰিবলৈ ৰাইজক আহ্বান জনাইছে প্ৰদেশ কংগ্ৰেছে।
এই সন্দৰ্ভত আজি ৰাজীৱ ভৱনত এক গুৰুত্বপূৰ্ণ সংবাদমেল সম্বোধন কৰে সাংসদ গৌৰৱ গগৈ আৰু প্ৰদেশ কংগ্ৰেছ কমিটিৰ সভাপতি ৰিপুন বৰাই।
সংবাদমেলত সাংসদ গৌৰৱ গগৈয়ে কয়, “এটা সমস্যাৰ সমাধানৰ পথত দিবলগীয়া প্ৰথমটো পদক্ষেপ হৈছে সমস্যাটোৰ কথা স্বীকাৰ কৰা আৰু সেইটো ভালকৈ বুজি লোৱা। এই অভিযান চলাব খোজা হৈছে সেই প্ৰথমটো পদক্ষেপৰ বাবেই।”
তেওঁ লগতে কয়, “এই অভিযানত ৰাইজে দিয়া মতামতে আমাক ক’ব আমাৰ ইস্তাহাৰত অন্তৰ্ভুক্ত কৰিবলগীয়া সবাতোকৈ জৰুৰী সমস্যা কোনবোৰ হ’ব। কংগ্ৰেছ দলৰ ইস্তাহাৰত ঠিক সেইবোৰ সমস্যাৰেই সমাধান আগবঢ়োৱা হ’ব।”
তেওঁ লগতে জানিবলৈ দিয়ে যে শ্ৰেষ্ঠ ভিডিঅ’ স্ৰষ্টাসকলক I-Phone ৰ পৰা আৰম্ভ কৰি আকৰ্ষণীয় উপহাৰ প্ৰদান কৰা হ’ব।
ইপিনে, ৰাইজে ভিডিঅ’বোৰ ফেচবুক, টুইটাৰ ইত্যাদি অগ্ৰণী ছ’চিয়েল মেডিয়াত #AssamBachao ৰ সৈতে পোষ্ট কৰি সেই পোষ্টৰ লিংক www.AssamBachao.in ৱেবচাইটৰ জৰিয়তে দাখিল কৰিব লাগিব বুলি গগৈয়ে জনায়।
আনহাতে, এই উদ্যমৰ শলাগ লৈ প্ৰদেশ কংগ্ৰেছৰ সভাপতি ৰিপুন বৰাই কয়, “এইটো মাত্ৰ প্ৰথম পদক্ষেপ। কংগ্ৰেছ দল এতিয়া সাজু হৈছে এটা উদ্ভাৱনমূলক প্ৰচাৰ অভিযানৰ বাবে, যিটো অভিযানে বিজেপিৰ অপশাসনৰ বিৰুদ্ধে ৰাইজৰ অসন্তুষ্টিৰ প্ৰকাশ সম্ভৱ কৰি তুলিব।”
“ভীতি প্ৰদৰ্শন আৰু আতংকৰ এটা পৰিবেশ সৃষ্টি কৰি ৰাইজৰ কণ্ঠ চেপি ধৰিবলৈ বিজেপিয়ে চলোৱা প্ৰচেষ্টাসমূহ ভোটগ্ৰহণৰ দিনলৈকে চলি থাকিব নোৱাৰে। #AssamBachao অভিযানৰ জৰিয়তে ৰাইজে দেখুৱাব কিমান অধীৰ আগ্ৰহেৰে অসমে অপেক্ষা কৰিছে এই পৰিস্থিতিৰ পৰিৱৰ্তন ঘটালৈ,” ৰিপুন বৰাই লগতে কয়।