শিৱসাগৰত বৃহস্পতিবাৰে প্ৰদেশ কংগ্ৰেছৰ সভাপতি ৰিপুন বৰাই এক সংবাদ মেল সম্বোধন কৰে। সংবাদ মেলত ৰিপুন বৰাই বিজেপি দল আৰু একালৰ সতীৰ্থ হিমন্ত বিশ্ব শৰ্মাক তীব্ৰ সমালোচনা কৰে ।
বৰাই কয়, ‘হিমন্ত বিশ্ব শৰ্মা এতিয়া হতাশাত ভুগিছে। কংগ্ৰেছৰ ১৫ বছৰীয়া শাসন কালত ১৪ বছৰ তেওঁ মুখ্য মন্ত্ৰীৰ ঘনিষ্ঠ হৈ থকাৰ লগতে বহু গুৰুত্বপূৰ্ণ বিভাগৰ মন্ত্ৰী হৈ আছিল। তাৰ পিছতো তেওঁ সন্তুষ্ট নহল। তেওঁৰ মুখ্যমন্ত্ৰী হোৱাৰ সপোন সফল নহ’ল বাবে কংগ্ৰেছ এৰি বিজেপি গ’ল। আৰু এতিয়া বিজেপিত তেওঁৰ সেই সপোন পূৰণ নোহোৱাৰ বাবে তেওঁ হতাশগ্ৰস্ত হৈছে।‘
‘হিমন্ত বিশ্ব শৰ্মাই গল দিয়াৰ কথা কৈছে, তেওঁৰ গল আমাৰ গল পোষ্টত নোসোমাই। তেওঁ গল মাৰিব কিন্তু ব্যৰ্থ গল দিব। কংগ্ৰেছৰ গল কীপাৰে সেই গল ওফৰাই বাউণ্ডৰী পাৰ কৰি দিব,’- ৰিপুন বৰাই মন্তব্য কৰে।
মন্ত্ৰী হিমন্ত বিশ্বশৰ্মাই প্ৰতি সপ্তাহত এটাকৈ আঁচনি ঘোষণা কৰিব বুলি যি মন্তব্য কৰিছে সেই সম্পৰ্কত প্ৰদেশ কংগ্ৰেছৰ সভাপতি জনে কয়, ‘পূৰ্বতে তেওঁ বহু প্ৰতিশ্ৰুতি দিছিল। তেওঁ আঁচনি ঘোষণা কৰিব আৰু কংগ্ৰেছে পূৰ্বৰ প্ৰতিশ্ৰুতিৰ কথা সোৱৰাই দিব’।
এআইয়ুডিএফৰ লগত মিত্ৰতা সন্দৰ্ভতো গুৰুত্বপূৰ্ণ মন্তব্য কৰে ৰিপুন বৰাই।
এআইয়ুডিএফৰ লগত কংগ্ৰেছৰ মিত্ৰতা অকলশৰে নহয়। কংগ্ৰেছে অসমত যি মহাজোঁট বনাবলৈ গৈছে তাত এআইয়ুডিএফ কেৱল অংশীদাৰ দলহে হব বুলি মন্তব্য কৰে ৰিপুন বৰাই।
সদ্যপ্ৰয়াত শিৱসাগৰ বিধানসভা সমষ্টিৰ বিধায়ক প্ৰণৱ গগৈৰ পুত্ৰ সমীৰ গগৈ বিজেপিৰ সৈতে যোগাযোগ কৰা সন্দৰ্ভত ৰিপুন বৰাই কয়, ‘গণতান্ত্ৰিক দেশত সকলোৰে নিজা নিজা চিন্তা কৰাৰ অধিকাৰ আছে। যদি প্ৰণৱ গগৈৰ কোনো পুত্ৰ বিজেপিলৈ যায় তাত কংগ্ৰেছ দলৰ কবলগীয়া একো নাই।‘
কংগ্ৰেছত এইবাৰ যুৱ শক্তি আৰু নতুন মুখে অগ্ৰাধিকাৰ পাব বুলি মন্তব্য কৰে ৰিপুন বৰাই।
সংবাদমেলৰ শেষত এক যোগদান কাৰ্যসূচী অনুষ্ঠিত হয় আৰু বহুকেইজন ছাত্ৰ নেতাই কংগ্ৰেছত যোগদান কৰে।
