মাজুলী জিলাত ড্ৰাগছ, সুৰাকে ধৰি বিভিন্ন প্ৰকাৰৰ মাদক দ্ৰব্যৰ প্ৰচলনৰ বিৰূদ্ধে জনসজাগতা সৃষ্টি আৰু সামাজিক পৰিবেশৰ বাবে অতি ক্ষতিকাৰক এনেধৰণৰ অনৈতিক কাৰ্য নিৰ্মূল কৰাৰ বাবে এগৰাকী ‘অবৈতনিক নিবাৰণী সংগঠক’(এইচ পিঅ) নিযুক্তিৰ প্ৰক্ৰিয়া আৰম্ভ কৰিছে ৰাজ্যিক নিচাযুক্ত আৰু মাদকদ্ৰব্য নিবাৰণী পৰিষদে।
মাহে অনুদানমূলকভাবে আগবঢ়োৱা ২,৭০০ টকা পাৰিতোষিকৰ এই অবৈতনিক পদটোৰ বাবে মাজুলীৰ ২৫ বছৰৰ উৰ্ধৰ আগ্ৰহী লোকৰ পৰা অতি শীঘ্ৰে আবেদন পত্ৰ আহ্বান কৰিছে যোৰহাটৰ আৱকাৰী অধীক্ষকৰ কাৰ্যালয়ে।
অবিভক্ত যোৰহাট জিলাৰ আৱকাৰী অধীক্ষকে জনোৱা মতে মাজুলীত খালী হৈ থকা এইচ পি অ’ পদটোৰ বাবে আবেদন কৰিব বিচৰা মাজুলীৰ আগ্ৰহী আবেদনকাৰীৰ ক্ষেত্ৰত কেতবোৰ যোগ্যতাৰ মাপকাঠি ধাৰ্য কৰা হৈছে।
সেইমৰ্মে আবেদনকাৰীয়ে ড্ৰাগছ তথা আন নিচাযুক্ত-মাদক দ্ৰব্য নিবাৰণৰ ক্ষেত্ৰত নিজস্ব দায়বদ্ধতা থকাৰ লগতে এইবিষয়ত সভা, আলোচনা চক্ৰ, আদি আয়োজন কৰা আৰু বক্তৃতা দিয়াৰ অভিজ্ঞতা থকাটো বাধ্যতামূলক।
তদুপৰি, আবেদনকাৰীগৰাকী নিচাযুক্ত তথা মাদকদ্ৰব্য নিবাৰণৰ বিষয়ে জ্ঞান থকা আৰু সমাজসেৱাৰ লগত জড়িত লোক হ’ব লাগিব। প্ৰাৰ্থীগৰাকী ন্যূনতম হাইস্কুল শিক্ষান্ত পৰীক্ষা উত্তীৰ্ণ হোৱাৰ লগতে মাজুলী জিলাৰ বিভিন্ন অঞ্চলত জনসজাগতা কাৰ্যসূচী ৰূপায়নৰ বাবে সঘনাই ভ্ৰমণ কৰিবলৈ প্ৰাৰ্থীগৰাকী সাজু থাকিব লাগিব।
আনহাতে, সম্পূৰ্ণৰূপে অস্থায়ী পদটোৰ বাবে শাৰীৰিক সক্ষমতা থকা অৱসৰপ্ৰাপ্ত চাকৰিয়াল প্ৰাৰ্থীয়েও আবেদন দাখিল কৰিব পাৰিব। আগ্ৰহীসকক অতি শীঘ্ৰে যোৰহাটৰ আৱকাৰী অধীক্ষকৰ কাৰ্য্যালয়ত নিজৰ আবেদন পত্ৰ দাখিল কৰিবলৈ বিভাগটোৱে অনুৰোধ জনাইছে।
এইবিষয়ত অধিক তথ্যৰ বাবে মাজুলীৰ আৱকাৰী চক্ৰ পৰিদৰ্শকৰ কাৰ্যালয়ৰ লগতে যোৰহাটৰ আৱকাৰী অধীক্ষকৰ কাৰ্যালয়ৰ সতেও যোগাযোগ কৰিব পাৰিব।