নেশ্যনেল এলিজিবিলিটি কাম এন্ট্ৰেন্স টেষ্ট (NEET) ছুপাৰ স্পেছিয়েলিটি বা NEET SS 2020ৰ বাবে নেশ্যনেল বোৰ্ড অফ এক্সামিনিশ্যনৰ ফালৰ পৰা আবেদন আহ্বান কৰা হৈছে।
ইয়াৰ বাবে অনলাইন প্ৰক্ৰিয়া ৩আগষ্টৰ পৰা আৰম্ভ হৈছে আৰু অহা ২৩ আগষ্টৰ নিশা ১১.৫৫বজালৈ খোলা থাকিব।
যোগ্যতাসম্পন্ন আগ্ৰহী প্ৰাৰ্থীসকলে nbe.edu.in ৱেবছাইটত গৈ আবেদন কৰিব পাৰিব। ১৫ ছেপ্টেম্বৰত পৰীক্ষা অনুষ্ঠিত হ’ব আৰু ২৫ ছেপ্টেম্বৰত ফলাফল ওলোৱাৰ সম্ভাৱনা আছে।
প্ৰাৰ্থীসকলক ২৪ আৰু ২৫ আগষ্টত ফৰ্মসমূহ সংশোধন কৰাৰ বাবে এটা উইণ্ডো দিয়া হ’ব। ২ আৰু ৩ ছেপ্টেম্বৰত আবেদনকাৰীয়ে তেওঁলোকৰ ছবি শুধৰণি কৰিব পাৰিব। সেইদৰে ৭ ছেপ্টেম্বৰত এডমিট কাৰ্ড প্ৰকাশ পাব।
আনহাতে, ১ ছেপ্টেম্বৰত প্ৰাৰ্থীসকলে অফিচিয়েল ৱেবছাইটত এটা ডেম’ পৰীক্ষা দিব পাৰিব।
পৰীক্ষা কম্পিউটাৰ ভিত্তিক পৰীক্ষাৰ ফৰ্মেটত অনুষ্ঠিত হ’ব। যিসকলে পৰীক্ষাত উত্তীৰ্ণ হ’ব তেওঁলোকে নিৰ্দিষ্ট মেডিকেল প্ৰতিষ্ঠানৰ কৰ্তৃপক্ষৰ নিৰ্দ্ধাৰিত নামভৰ্তিৰ মানদণ্ড তথা যোগ্যতা অনুসৰি মেডিকেল ফিটনেছকে ধৰি পৰীক্ষাত উত্তীৰ্ণ হ’ব লাগিব।
NEET SS 2020ৰ বাবে আবেদন মাছুল হৈছে ৩৭৫০টকা আৰু ইয়াত অতিৰিক্ত ৬৫৭টকাৰ জিএছটি থাকিব। অৰ্থাৎ প্ৰাৰ্থসকলৰ মুঠ আবেদন মাছুল হ’ব ৪৪২৫টকা।
আনহাতে, এগৰাকী প্ৰাৰ্থীয়ে সৰ্বাধিক দুটা ছুপাৰ স্পেছিয়েলিটি কোৰ্ছ পছন্দ কৰিব পাৰিব যাৰ বাবে বিশেষ যোগ্যতা থাকিব লাগিব।
পৰীক্ষাত ৪০শতাংশ প্ৰশ্ন থাকিব স্পেছিয়েলিটি কোৰ্ছৰ পৰা আৰু বাকী ৬০শতাংশ প্ৰশ্ন ছুপাৰ স্পেছিয়েলিটি কোৰ্ছৰ পৰা থাকিব।
প্ৰতিখন প্ৰশ্নকাকতত মুঠ ১০০টা প্ৰশ্ন আৰু ই দুটা ভাগত ভগোৱা থাকিব। প্ৰশ্নসমূহ পিজি এক্সিট পৰ্যায়ৰ হ’ব।
