আইপিএল নীলামৰ পূৰ্বে এক দুৰ্দান্ত প্ৰদৰ্শনেৰে সকলোৰে দৃষ্টি কাঢ়িলে অৰ্জুন তেণ্ডুলকাৰে। বেটে-বলে উজলি উঠা অৰ্জুনৰ প্ৰদৰ্শনেৰে এমআইজি ক্ৰিকেট ক্লাৱে বিজয়ো সাৱ্যস্ত কৰিলে।
পুলিচ শ্বিল্ডত ইছলাম জিমখানাৰ বিৰুদ্ধে খেলা মেচখনত অৰ্জুনে এটা অভাৰত অফ স্পিনাৰ হাছিৰ দাফেদাৰৰ বলত ৫টা ছয় কোবায়।
অৰ্জুনে ২৬টা বলতে ৭৭ ৰাণ কৰি অপৰাজিত থাকে। তেওঁৰ বিস্ফোৰক ইনিংছটোত মুঠতে ৫টা চাৰি আৰু ৮টা ছয় কোবায়। আনহাতে, সুন্দৰ বলিং কৰি ৪১ ৰাণৰ বিনিময়ত ৩টা উইকেটো দখল কৰে।
মেচখনত টচত জিকি প্ৰথমে বেটিং কৰি এমআইজি ক্ৰিকেট ক্লাৱে নিৰ্দ্ধাৰিত ৪৫ অভাৰত ৭টা উইকেট হেৰুৱাই ৩৮৫ৰাণ কৰে।
প্ৰত্যুত্তৰত ইছলাম জিমখানাই ৪১.৫ অভাৰত ১৯১ৰাণত অল আউট হৈ যায়। এমআইজিয়ে মেচখনত ১৯৪ৰাণৰ বিশাল ব্যৱধানত জয়লাভ কৰে।
ইপিনে, আইপিএলৰ নীলামত প্ৰথমবাৰৰ বাবে নিজৰ নাম নথিভুক্ত কৰিছে অৰ্জুন তেণ্ডুলকাৰে। অৰ্জুনৰ ন্যুনতম মূল্য হৈছে ২০ লাখ।
উল্লেখ্য যে চলিত বছৰৰ মুস্তাক আলী টী-২০ ট্ৰফীত মুম্বাইৰ হৈ ছিনিয়ৰ ক্ৰিকেটত আত্মপ্ৰকাশ কৰাৰ পাছতে জুনিয়ৰ তেণ্ডুলকাৰে আইপিএলৰ নীলামত অংশ লোৱাৰ অনুমতি লাভ কৰে।
