দেশৰ বিভিন্ন প্ৰান্তৰ চিকিৎসালয় সমূহত ক’ৰ’না আক্ৰান্ত সকলক চিকিৎসা আগবঢ়াই থকা চিকিৎসা কৰ্মীসকলৰ প্ৰতি ৩ মে’ত সন্মান প্ৰদৰ্শন কৰিব ভাৰতীয় সেনাবাহিনীয়ে।
ভাৰতীয় স্থল সেনা, নৌ সেনা আৰু বায়ু সেনাবাহিনীয়ে সহযোগিতাৰে চিকিৎসা কৰ্মী সকললৈ এই সন্মান আগবঢ়াব।
ভাৰতীয় বায়ু সেনা বাহিনীয়ে চিকিৎসালয় সমূহত হেলিকপ্তাৰ আৰু বিমানেৰে পুষ্পবৰ্ষণ কৰাৰ লগতে, নৌ সেনা বাহিনীয়ে সাগৰীয় যুদ্ধ জাহাজ সমূহ বিভিন্ন লাইটেৰে সজাই তুলিব আৰু স্থল সেনা বাহিনীয়ে মিলিটাৰী ব্যাণ্ড বজাই দেওবাৰে ক’ৰ’না যুদ্ধত আগশাৰীৰ যোদ্ধা হিচাপে কৰ্মৰত চিকিৎসা কৰ্মীসকলৰ প্ৰতি সন্মান প্ৰদৰ্শন কৰিব।
চীফ অফ ডিফেঞ্চ ষ্টাফ জেনেৰেল বিপিন ৰাৱাটে শুকুৰবাৰে এই কথা সদৰী কৰে।
উল্লেখযোগ্য যে, ভাৰতত বৰ্তমানলৈ ৩৭,২৫৭ গৰাকী ব্যক্তি ক’ৰ’না ভাইৰাছত আক্ৰান্ত হোৱাৰ বিপৰীতে ১২২৩ গৰাকী ব্যক্তিৰ এই ভাইৰাছৰ সংক্ৰমণৰ ফলত মৃত্যু হৈছে।
আনহাতে, বৰ্তমানলৈ ১০,০০৭ গৰাকী ব্যক্তি সম্পূৰ্ণৰূপে আৰোগ্য হৈ চিকিৎসালয়ৰ পৰা মুক্তি লাভ কৰিছে।
অসমততো ৪২ গৰাকী ব্যক্তি বৰ্তমানলৈ ক’ৰ’নাত আক্ৰান্ত হৈছে আৰু ইয়াৰ ভিতৰত এগৰাকী ব্যক্তিৰ মৃত্যু হোৱাৰ বিপৰীতে সুস্থ হৈ ঘৰলৈ উভতিছে মুঠ ৩২ গৰাকী ব্যক্তি।
