তিনিচুকীয়া জিলাৰ লেখাপানী থানাৰ জাগুনৰ কথা কাষৰণি গাঁৱত ২৪ ছেপ্তেম্বৰৰ নিশা ভাৰতীয় সেনা বাহিনী আৰু সন্দেহযুক্ত আলফা স্বাধীন উগ্ৰপন্থীৰ মাজত সংঘটিত সংঘৰ্ষৰ পিছত নিৰাপত্তা ব্যৱস্থা কটকটীয়া কৰি আজি পুৱাৰে পৰা অঞ্চলটোত সেনা বাহিনীয়ে অভিযান আৰম্ভ কৰিছে।
সেনাৰ ৯ নং ৰাজপুটানা ৰাইফলছ আৰু অসম ৰাইফলছৰ দলে চলোৱা এই অভিযানৰ সময়ত সেনাই আলফা স্বাধীনে কথা সংৰক্ষিত বনাঞ্চলৰ মাজত পেলাই যোৱা এটা বেগ উদ্ধাৰ কৰে। বেগটোৰ পৰা এটা শক্তিশালী আই এ ডি, গুলী, ডিটেনেটৰ, আন বিস্ফোৰক সামগ্ৰী, দৰৱ আৰু এজোৰ জুটা উদ্ধাৰ কৰে।
উল্লেখযোগ্য যে কালি নিশা প্ৰায় ৮ বজাত সূত্ৰপাত হোৱা উক্ত সংঘৰ্ষত আলফা (স্বা)ৰ টাইগাৰ অসম নামৰ এজন কেডাৰ আঘাতপ্ৰাপ্ত হোৱা বুলি সেনাৰ এক প্ৰেছ বাৰ্তা প্ৰকাশ যদিও আলফা (স্বা)ৰ ফালৰ পৰা এই সম্পৰ্কত এতিয়ালৈকে কোনো ধৰণৰ প্ৰতিক্ৰিয়া প্ৰকাশ পোৱা নাই।
ঘটনা সম্পৰ্কে জানিব পৰা মতে, সন্দেহযুক্ত আলফা (স্বা)ৰ এটা সশস্ত্ৰ দলে ৰুপম অসম আৰু জান অসমৰ নেতৃত্বত অঞ্চলটোত বাহৰ পাতি থকাৰ সম্ভেদ লাভ কৰি সেনা-আৰক্ষীৰ দলে কালি পুৱাৰ ভাগত সমগ্ৰ অঞ্চলটো ঘেৰাও কৰি অভিযান আৰম্ভ কৰে যদিও সেই সময়ছোৱাত কোনো সংঘৰ্ষ ঘটা নাছিল।
কিন্তু নিশা প্ৰায় ৮ বজাত স্থানীয় ৰাইজে প্ৰচণ্ড গুলীয়াগুলীৰ শব্দ শুনিবলৈ পায়। নিশা ৯ বজালৈকে অব্যাহত থকা উক্ত গুলীয়াগুলীত গাওঁখনৰ দুই এক ঘৰৰ টিনপাত গুলীয়ে ফুটা কৰে বুলিও জানিব পৰা গৈছে।
এক সূত্ৰৰ পৰা পোৱা খবৰ অনুসৰি আলফা (স্বা)ৰ ২২ জনীয়া এটা দলে ম্যানমাৰ সীমান্ত পাৰ হৈ অৰুণাচল প্ৰদেশৰ চাংলাং জিলাৰ দুৰ্গম অঞ্চল অতিক্ৰম কৰি জাগুনৰ এই অঞ্চলৰে সুৰক্ষিত এলেকালৈ যাবৰ বাবে কুচকাৱাজ চলাওঁতেই সেনাৰে কালি নিশা সংঘৰ্ষৰ সূত্ৰপাত হয়।
উল্লেখযোগ্য যে পূৰ্বেও উক্ত অঞ্চলটোত সেনা আৰু আলফা (স্বা)ৰ মাজত গুলীয়াগুলী হৈছিল। তদুপৰি এই অঞ্চলসমূহত আলফা উগ্ৰপন্থী বিচৰাৰ নামত ভাৰতীয় সেনাই পূৰ্বতেও গাঁওবাসীৰ ওপৰত অত্যাচাৰ চলোৱাৰ অভিযোগ আছে।