বিজেপি চৰকাৰে ‘ৰাফেল’ যুদ্ধ বিমান ক্ৰয়ত দুৰ্নীতিত লিপ্ত হোৱাৰ প্ৰতিবাদত যি প্ৰতিবাদ চলি আছে তাত অসম যুৱ কংগ্ৰেছৰ কৰ্মকৰ্তাসকলেও যোগ দিছে।
এই প্ৰতিবাদী কাৰ্যসূচীত যোগদান কৰিছে ভাৰতীয় যুৱ কংগ্ৰেছৰ ৰাষ্ট্ৰীয় সভাপতি কেশৱ চন্দ্ৰ যাদব, ৰাষ্ট্ৰীয় উপসভাপতি শ্ৰীনিৱাস বি ভিয়ে। অসম যুৱ কংগ্ৰেছৰ সভাপতি কামৰুল ইছলাম চৌধুৰীৰ নেতৃত্বত প্ৰায় ২০০ যুৱ কংগ্ৰেছৰ কৰ্মীয়ে প্ৰতিবাদী কাৰ্যসূচীত যোগদান কৰে।
বৃহস্পতিবাৰে ভাৰতীয় যুৱ কংগ্ৰেছৰ কৰ্মকৰ্তাসকলে প্ৰধান মন্ত্ৰী নৰেন্দ্ৰ মোদীৰ ৭ ৰেচকোৰ্ছত অৱস্থিত বাসভৱনটেো ঘেৰি ৰাখে। অৱশ্যে প্ৰধান মন্ত্ৰী মোদীয়ে ইয়াৰ পূৰ্বেই দুদিনীয়া ভ্ৰমণসূচী লৈ নেপাললৈ উৰা মাৰিছিল।
সমবেত সকলক সম্বোধন কৰি যুৱ কংগ্ৰেছৰ নেতাসকলে অভিযোগ কৰে যে বিজেপি নেতৃত্বাধীন এনডিএ চৰকাৰে যুক্তিহীন আৰু কল্পনাপ্ৰসুত তথ্য দি জাতিটোক ভুলপথে পৰিচালিত কৰিছে। ৰাফেল চুক্তি হৈছে সৰ্ববৃহৎ কেলেংকাৰি। কেন্দ্ৰীয় চৰকাৰে বিষয়টোৰ অনুসন্ধান কৰিবলৈ এখন যুটীয়া সংসদীয় কমিটী গঠন নকৰে কিয়? বুলি ভাৰতীয় যুৱ কংগ্ৰেছৰ ৰাষ্ট্ৰীয় সভাপতি কেশৱ চন্দ্ৰ যাদবে প্ৰশ্ন কৰে।
বাতৰিত প্ৰতিৱেদনত প্ৰকাশ হোৱা মতে ভাৰতীয় যুৱ কংগ্ৰেছৰ ৫০ গৰাকীমান কৰ্মকৰ্তাক আৰক্ষী আটক কৰি মন্দিৰ মাৰ্গ আৰু টোঘলক ৰোড আৰক্ষী থানালৈ লৈ যায়। এখন সংবাদ বিজ্ঞপ্তিযোগে এই কথা জনাইছে অসম যুৱ কংগ্ৰেছৰ সমন্বয়ক কৃদীপ বৰ্মনে।
উল্লেখ্য যে ৰাফেল চুক্তিৰ বিষয়ত চৰকাৰক সন্মুখৰ পৰা আক্ৰমণ কৰা কংগ্ৰেছে সমগ্ৰ ভাৰত ব্যাপি জনসাধাৰণক এই চুক্তি সম্পৰ্কে অৱগত কৰাৰ বাবে এটা অভিযান আৰম্ভ কৰিব।
দলৰ কৰ্মকৰ্তাসকলে ভাৰতৰ বিভিন্ন স্থানত বিষয়টো বিয়পাই দিয়াৰ উদ্দেশে দিহাদিহি গৈছে। সংবাদমেল অনুষ্ঠিত কৰি আছে। এই বিষয়টোৰ ওপৰত জিলা আৰু ৰাজ্যিক পৰ্যায়ত আন্দোলন গঢ়ি তোলাৰ পৰিকল্পনা কৰিছে দলটোৱে।
