আজি পুৱা অহা এজাক বৰষুণত পুনৰ কৃত্ৰিম বানত বুৰ গ’ল গুৱাহাটী মহানগৰ। মহানগৰীৰ যোৰাবাট, খানাপাৰা, মথুৰানগৰ, গণেশগুৰি-লালগণেশ সংযোগী পথ, খ্ৰিষ্টানবস্তি, এ বি চি, অনিলনগৰ, নবিননগৰ ইত্যাদি অঞ্চলত পুৱাৰ এজাক বৰষুণতে বুৰ যায়।
স্মাৰ্ট চিটী হিচাপে গুৱাহাটী মহানগৰক গঢ় দিবলৈ প্ৰয়াস কৰা পৰিৱৰ্তনকামী চৰকাৰে কৃত্ৰিম বানপানীক প্ৰত্যাহ্বান হিচাপে গ্ৰহণ কৰিছিল যদিও এইক্ষেত্ৰত কোনো পৰিৱৰ্তন আনিব পৰা নাই বিজেপি চৰকাৰে। যাৰ বাবে এতিয়া ক্ষুভিত হৈ পৰিছে মহানগৰবাসী।
বহুবছৰ ধৰি কৃত্ৰিম বানৰ কবলত ভুগি অহা মহানগৰৰ অনিলনগৰ নিবাসী প্ৰশান্ত বৰ্মনে ক্ষোভ প্ৰকাশ কৰি নৰ্থ-ইষ্ট নাওৰ আগত কয় “মাত্ৰ ৪৫ মিনিটৰ বৰষুণতে ফুটপাথৰ ওপৰলৈকে পানী উঠিছে। এয়াই আছিল নেকি পৰিৱৰ্তন?”
আনহাতে,পথৰ কাষত থকা নলা-নৰ্দামা সমূহ চাফা নকৰা বুলি গুৱাহাটী পৌৰ নিগমৰ ওপৰত অভিযোগ আনি ইয়াৰ বাবেই কৃত্ৰিম বানপানীৰ সমস্যা দেখা গ’ল বুলি আন এগৰাকী লোকে মন্তব্য কৰে।
ইপিনে, খানাপাৰাৰ পৰা নমাইললৈকে ভিন্ন ঠাইত ৰাষ্ট্ৰীয় ঘাইপথৰ ওপৰত কৃত্ৰিম বানপানী হোৱাৰ ফলত এই পথেদি চলাচল কৰা যান-বাহন সমূহৰ চালকৰ লগতে যাত্ৰী সকলো কিছু সময়ৰ বাবে বিভিন্ন ধৰণৰ সমস্যাৰ সন্মুখীন হ’ব লগীয়া হয়।
বৰষুণ দিয়াৰ ফলত জাৱৰ ভৰ্তি নলা সমূহেৰে পানী সৰকি যাব নোৱাৰাৰ বাবে ঘাই পথৰ ওপৰতে এনেদৰে কৃত্ৰিম বানপানীৰ সৃষ্টি হয়।
অৱশ্যে, মহানগৰীত বাৰিষাৰ দিনকেইটাত কৃত্ৰিম বানপানী কোনো নতুন সমস্যা নহয়। বছৰ বছৰ ধৰি মহানগৰবাসীয়ে কৃত্ৰিম বানপানীত জীয়াতু ভুগিবলগীয়া হৈ আহিছে যদিও এই পৰ্যন্ত কোনো এখন চৰকাৰে ইয়াৰ স্থায়ী সমাধান সম্ভৱ কৰিব পৰা নাই।