অৰুণাচল প্ৰদেশৰ ইটানগৰ পৌৰ নিগমে একক ব্যৱহাৰৰ প্লাষ্টিক আৰু ১২০ মাইক্ৰনৰ তলৰ প্লাষ্টিকৰ কেৰী বেগৰ ব্যৱহাৰত কঠোৰ নিষেধাজ্ঞা আৰোপ কৰিছে। ইটানগৰ পৌৰ নিগমৰ যুটীয়া আয়ুক্ত খোদা লাছাই জাৰি কৰা নিৰ্দেশ অনুসৰি দোকান, ব্যৱসায়িক প্ৰতিষ্ঠান, ছুপাৰ মাৰ্কেট, হোটেল, ৰেষ্টুৰেণ্ট আৰু পথৰ কাষৰ ব্যৱসায়ীসকলক নিষিদ্ধ প্লাষ্টিকৰ সামগ্ৰী ব্যৱহাৰ বন্ধ কৰি পৰিৱেশ অনুকূল আৰু জৈৱ-বিয়োজ্য সামগ্ৰী ব্যৱহাৰ কৰিবলৈ নিৰ্দেশ দিয়া হৈছে।
নিষিদ্ধ কৰা সামগ্ৰীৰ ভিতৰত প্লাষ্টিকৰ ডালযুক্ত কাণ পৰিষ্কাৰ কৰা কাঠি, বেলুনৰ ষ্টিক, প্লাষ্টিকৰ পতাকা, টফী আৰু আইচক্ৰীমৰ কাঠি, থাৰ্ম’কলৰ সজ্জাৰ সামগ্ৰী, প্লাষ্টিকৰ প্লেট, কাপ, চামুচ-কাঁটাচামুচ, ষ্ট্ৰ’, পেকেট মেৰিওৱা প্লাষ্টিক ফিল্ম, পানীয় বা খাদ্যৰ সৈতে ব্যৱহাৰ কৰা ষ্টিৰাৰ আৰু ১০০ মাইক্ৰনৰ তলৰ পিভিচি বেনাৰ আদি আছে।
ইয়াৰ উপৰি ১২০ মাইক্ৰনৰ তলৰ প্লাষ্টিকৰ কেৰী বেগ আৰু জৈৱ-বিয়োজ্য নোহোৱা পেকেজিং ছেচে উৎপাদন, মজুত, বিতৰণ, বিক্ৰী আৰু পৰিবহণতো নিষেধাজ্ঞা আৰোপ কৰা হৈছে। প্লাষ্টিক পেকেজিঙৰ ব্যৱসায়ৰ সৈতে জড়িত ব্যৱসায়ীসকলক ২০১৬ চনৰ প্লাষ্টিক বর্জ্য ব্যৱস্থাপনা নিয়ম অনুসৰি সামগ্ৰীত বাধ্যতামূলক লেবেল লগোৱাৰ নিয়ম মানি চলিবলৈ কোৱা হৈছে।
ইটানগৰ পৌৰ নিগমে জনাইছে যে নিষেধাজ্ঞা কাৰ্যকৰী কৰিবলৈ নিয়মীয়া পৰিদৰ্শন, আকস্মিক তালাচী আৰু বিশেষ অভিযান চলোৱা হ’ব। লগতে পথ, নলা, উদ্যান, বজাৰ আৰু জলাশয়ত প্লাষ্টিকৰ আৱৰ্জনা পেলোৱা বা ভুল ধৰণে নিষ্পত্তি কৰা লোকসকলৰ বিৰুদ্ধেও ব্যৱস্থা গ্ৰহণৰ সতৰ্কবাণী দিয়া হৈছে।
পৌৰ নিগমে অৰুণাচল প্ৰদেশৰ জনসাধাৰণ আৰু ব্যৱসায়ীসকলক এই উদ্যোগত সহযোগিতা কৰিবলৈ আহ্বান জনাইছে। পৰিৱেশ সুৰক্ষা আৰু প্লাষ্টিক প্ৰদূষণ হ্ৰাস কৰাৰ লক্ষ্যৰে গ্ৰহণ কৰা এই পদক্ষেপ সফল কৰিবলৈ সকলোৰে সহযোগিতা অতি গুৰুত্বপূৰ্ণ বুলি পৌৰ নিগমে উল্লেখ কৰিছে।
