সোমবাৰে লেখিকা অৰুন্ধতী ৰয়ৰ ‘মাদাৰ মেৰী কমছ টু মি’ নামৰ কিতাপখনৰ বিৰুদ্ধে দাখিল কৰা গোচৰ খাৰিজ কৰিছে কেৰালা উচ্চ ন্যায়ালয়ে। ৰয়ৰ শেহতীয়া গ্ৰন্থ ‘মাদাৰ মেৰী কমছ টু মি’ বেটুপাতত ধূমপান কৰা এগৰাকী মহিলাৰ ছবিৰ ব্যৱহাৰ কৰিছিল। এই সন্দৰ্ভত লেখিকাগৰাকীৰ বিৰুদ্ধে গোচৰ ৰুজু কৰিছিল।
আবেদনকাৰী অধিবক্তা ৰাজসিংহনে এই ছবিখনে ধঁপাতজাতীয় সামগ্ৰীৰ প্ৰচাৰ কৰা বুলি দাবী কৰিছে। তেওঁ গ্ৰন্থখনত স্বাস্থ্য সতৰ্কবাণী ব্যৱহাৰ নকৰাৰ বাবে কিতাপখনৰ বিক্ৰী বন্ধ কৰিবলৈ আদালতক অনুৰোধ জনাইছিল।
মুখ্য ন্যায়াধীশ নীতিন জামদাৰ আৰু ন্যায়াধীশ বসন্ত বালাজীৰ নেতৃত্বৰ বিচাৰপীঠে এই আবেদন খাৰিজ কৰি কয় যে প্ৰকাশক পেংগুইন ৰেণ্ডম হাউছ ইণ্ডিয়াই ইতিমধ্যে, এই কিতাপখনত ধূমপানৰ যিকোনো চিত্ৰণ কেৱল প্ৰতীকী উদ্দেশ্যৰ বাবে ব্যৱহাৰ কৰা বুলি স্পষ্ট কৰি দিছে। আৰু পেংগুইন ৰেণ্ডম হাউছ ইণ্ডিয়াই ধঁপাত সেৱনৰ প্ৰচাৰ বা সমৰ্থন নকৰে বুলি মত প্ৰকাশ কৰিছে
পূৰ্বৰ শুনানিত আদালতে আবেদনকাৰীক সংশ্লিষ্ট কৰ্তৃপক্ষৰ সৈতে তদন্ত কৰিবলৈ নিৰ্দেশ দিছিল যে কভাৰটোৱে চিগাৰেট আৰু অন্যান্য ধঁপাতজাত সামগ্ৰী আইন, ২০০৩ (চিঅ’টিপিএ)ৰ ৫ নং ধাৰা উলংঘা কৰিছে নেকি, যিয়ে ধঁপাতৰ বিজ্ঞাপন নিষিদ্ধ কৰে।
ন্যায়ালয়ে বিচাৰপীঠে উল্লেখ কৰে আবেদনকাৰীয়ে গোচৰ দাখিল কৰাৰ পূৰ্বে সবিশেষ পৰ্যালোচনা কৰা নাছিল। জনস্বাৰ্থ জড়িত গোচৰ আত্মপ্ৰচাৰ বা ব্যক্তিগত উদ্দেশ্যত ব্যৱহাৰ কৰিব নোৱাৰি বুলি উল্লেখ কৰি ন্যায়ালয়ে এই আবেদন খাৰিজ কৰে।
