নতুন দিল্লীৰ কমানি প্ৰেক্ষাগৃহত নিজৰ নতুন গ্ৰন্থ ‘মাদাৰ মেৰী কামছ টু মি’ সন্দৰ্ভত আয়োজিত এক অনুষ্ঠানত বিশিষ্ট লেখিকা অৰুন্ধতী ৰায়ে পশ্চিম এছিয়াৰ বৰ্তমানৰ যুদ্ধ সদৃশ পৰিস্থিতিক লৈ তীব্ৰ প্ৰতিক্ৰিয়া প্ৰকাশ কৰে। তেওঁ ইৰাণৰ ওপৰত আমেৰিকা আৰু ইজৰাইলৰ আক্ৰমণক তীব্ৰ গৰিহণা দি কয় যে এই আক্ৰমণ সম্পূৰ্ণৰূপে অবৈধ আৰু ই গাজাৰ গণহত্যাৰেই এক ধাৰাবাহিক অংশ। ৰায়ে ক্ষোভেৰে কয় যে যি দেশেই এসময়ত হিৰোশিমা আৰু নাগাচাকিত পাৰমাণৱিক বোমা নিক্ষেপ কৰিছিল, সেই একেই শক্তিয়ে আজি পৃথিৱীৰ অন্যতম প্ৰাচীন সভ্যতা ইৰাণক ধ্বংস কৰিবলৈ উঠি-পৰি লাগিছে। তেওঁ স্পষ্টকৈ কয় যে ইৰাণ-গাজাৰ দৰে সৰু নহয় আৰু এই যুদ্ধই সমগ্ৰ বিশ্বক পাৰমাণৱিক ধ্বংস তথা অৰ্থনৈতিক পতনৰ দিশলৈ ঠেলি দিব পাৰে। তেওঁ নিজকে ইৰাণৰ জনসাধাৰণৰ লগত থকা বুলি ঘোষণা কৰাৰ লগতে সাম্রাজ্যবাদী শক্তিবোৰক জনসাধাৰণে উচিত শিক্ষা দিয়াৰ প্ৰয়োজনীয়তাৰ কথা দোহাৰে।
এই ভাষণত অৰুন্ধতী ৰায়ে ভাৰত চৰকাৰৰ ভূমিকাক লৈও অতি কঠোৰ শব্দ ব্যৱহাৰ কৰে। তেওঁ কয় যে আমাৰ দেশৰ চৰকাৰখন বৰ্তমান কাপুৰুষ আৰু মেৰুদণ্ডহীন হৈ পৰিছে। তেওঁৰ মতে, পূৰ্বতে ভাৰত দৰিদ্ৰ দেশ আছিল যদিও দেশখনৰ এক নিজস্ব সন্মান আৰু মৰ্যাদা আছিল, যিটো বৰ্তমান হেৰাই গৈছে। বৰ্তমান চৰকাৰে দৰিদ্ৰ আৰু নিবনুৱা লোকসকলক প্ৰকৃত খাদ্যৰ সলনি ঘৃণা আৰু মিছাৰ বিষহে পৰিবেশন কৰিছে বুলি তেওঁ অভিযোগ উত্থাপন কৰে। আমেৰিকাৰ দৰে শক্তিৰ ওচৰত ভাৰতে নিজৰ আত্মসন্মান বিক্ৰী কৰা বুলি কৈ তেওঁ প্ৰশ্ন কৰে যে আমাৰ নিৰ্বাচিত চৰকাৰখনে আন দেশৰ ৰাষ্ট্ৰপ্ৰধানক হত্যা বা অপহৰণ কৰা কাৰ্যক গৰিহণা দিবলৈ কিয় সক্ষম হোৱা নাই। লগতে ইৰাণৰ ওপৰত আক্ৰমণ হোৱাৰ মাত্ৰ কেইদিনমান পূৰ্বে প্ৰধানমন্ত্ৰীয়ে ইজৰাইললৈ গৈ বেনিয়ামিন নেতানিয়াহুক সাৱটি ধৰা কাৰ্যকো তেওঁ তীব্ৰ সমালোচনা কৰে।
লেখিকাগৰাকীয়ে গাজাৰ যুদ্ধৰ সময়ত ইজৰাইললৈ হাজাৰ হাজাৰ ভাৰতীয় শ্ৰমিক পঠিওৱা সিদ্ধান্তকো লৈ প্ৰশ্ন তোলে। তেওঁ অভিযোগ কৰে যে যি সময়ত ইজৰাইলৰ লোকসকলে বংকাৰত আশ্ৰয় লৈছে, সেই সময়ত ভাৰতীয় শ্ৰমিকসকলক সেই সুৰক্ষিত স্থানত সোমাবলৈ দিয়া হোৱা নাই। চৰকাৰৰ বিভিন্ন বৈদেশিক নীতি আৰু আমেৰিকাৰ সৈতে কৰা বাণিজ্যিক চুক্তিয়ে আমাৰ কৃষক আৰু কাপোৰ উদ্যোগক ধ্বংস কৰিব বুলিও তেওঁ আশংকা প্ৰকাশ কৰে। তেওঁ কয় যে আমেৰিকাৰ ৰাজনীতিবিদসকলে প্ৰায়ে ভাৰতক উপহাস কৰে, কিন্তু আমাৰ প্ৰধানমন্ত্ৰীয়ে কেৱল তেওঁলোকক সাৱটি ধৰি হাঁহি থাকিবলৈহে জানে। ভাৰত বৰ্তমান সাম্রাজ্যবাদৰ এজন অনুগামী দেশত পৰিণত হৈছে বুলি কৈ তেওঁ দেশৰ সাম্প্ৰতিক সামাজিক অৱস্থাক লৈ গভীৰ উদ্বেগ প্ৰকাশ কৰে।
অনুষ্ঠানটোত তেওঁ নিজৰ ব্যক্তিগত জীৱন আৰু মাতৃ মেৰী ৰায়ৰ সৈতে থকা সম্পৰ্কৰ কথাও উল্লেখ কৰে। তেওঁ কয় যে তেওঁ যি সাহসেৰে কথা কৈছে, সেয়া তেওঁৰ মাতৃৰ পৰাই লাভ কৰা শিক্ষা। মাতৃ মেৰী ৰায়ৰ দৰেই স্পষ্টবাদী হোৱাৰ বাবে তেওঁ গৌৰৱবোধ কৰে বুলিও জানিবলৈ দিয়ে। ইয়াৰ উপৰিও তেওঁ কৃত্ৰিম মেধা বা এআইৰ নেতিবাচক দিশ আৰু ভাৰতৰ শিক্ষা ব্যৱস্থাৰ গেৰুৱাকৰণৰ বিষয়তো নিজৰ মত ব্যক্ত কৰে। তেওঁৰ মতে, ২০১৭ চনলৈ ভাৰতত কেৱল ফেচিবাদী চৰকাৰৰ বিৰুদ্ধে যুঁজ চলিছিল, কিন্তু এতিয়া সমগ্ৰ সমাজখনতেই ফেচীবাদৰ প্ৰভাৱ পৰিছে। শেষত তেওঁ দিল্লীৰ সংগ্রামী মনোভাৱৰ কথা উল্লেখ কৰি কয় যে তেওঁলোকে সদায় অন্যায়ৰ বিৰুদ্ধে ওভতি ধৰি যুঁজ দিব জানে। তেওঁৰ এই ভাষণৰ শেষত সমবেত দৰ্শকে থিয় হৈ তেওঁক হাত চাপৰিৰে সম্বৰ্ধনা জনাই একাত্মতা প্ৰকাশ কৰে।
