দেওবাৰে আম আদমী পাৰ্টিৰ মুৰব্বী অৰবিন্দ কেজৰিৱালে অহা দুদিনৰ ভিতৰত দিল্লীৰ মুখ্যমন্ত্ৰীৰ পদৰ পৰা পদত্যাগ কৰিব বুলি প্ৰকাশ কৰিছে।
অৰবিন্দ কেজৰিৱালে কয় যে আগন্তুক দিল্লী বিধানসভা নিৰ্বাচনত ৰাইজে তেওঁক সততাৰ প্ৰমাণ দিলেহে মুখ্যমন্ত্ৰীৰ পদ গ্ৰহণ কৰিব। তেওঁ কয়, ‘’আমি নিজৰ নিৰ্দোষতা প্ৰমাণ কৰিবলৈ মানুহৰ আদালতলৈ যাম।’’
তেওঁ লগতে ২০২৫ চনৰ ফেব্ৰুৱাৰী মাহৰ পৰিৱৰ্তে ২০২৪ চনৰ নৱেম্বৰ মাহত নিৰ্বাচন অনুষ্ঠিত কৰিবলৈও দাবী জনায়।
‘উচ্চতম ন্যায়ালয়ে আৰোপ কৰা নিষেধাজ্ঞাৰ বাবে আমি কাম কৰিব নোৱাৰিম বুলি একাংশ লোকে কয়। আনকি তেওঁলোকে আমাৰ ওপৰত নিষেধাজ্ঞা আৰোপ কৰিবলৈ চেষ্টাৰ কোনো ত্ৰুটি কৰা নাছিল… যদি আপোনালোকে মোক সৎ বুলি ভাবে তেন্তে মোক বৃহৎ সংখ্যক ভোট দিয়ক। মই নিৰ্বাচিত হোৱাৰ পিছতহে মুখ্যমন্ত্ৰীৰ চকীত বহিম। ফেব্ৰুৱাৰী মাহত নিৰ্বাচন অনুষ্ঠিত হোৱাৰ কথা। মই মহাৰাষ্ট্ৰৰ নিৰ্বাচনৰ সৈতে নৱেম্বৰ মাহত নিৰ্বাচন অনুষ্ঠিত কৰিবলৈ দাবী জনাইছো… নিৰ্বাচন নোহোৱালৈকে দলৰ আন কোনোবা এজন মুখ্যমন্ত্ৰী হ’ব। অহা ২-৩ দিনত বিধায়কসকলৰ এখন বৈঠক অনুষ্ঠিত হ’ব, য’ত পৰৱৰ্তী মুখ্যমন্ত্ৰী নিৰ্বাচিত হ’ব।’
তেওঁ দাবী কৰে যে বিজেপিয়ে দলটো ভাঙি চৰকাৰ গঠন কৰিব বিচাৰিছে। তেওঁ কয় যে তেওঁলোকে তেওঁৰ মনোবল ধ্বংস কৰিব বিচাৰিছিল যদিও বিফল হৈছিল।
তেওঁ কয়, “তেওঁলোকে দল ভাঙিব বিচাৰিছিল, কেজৰিৱালৰ সাহস আৰু মনোবল ভাঙিব বিচাৰিছিল… তেওঁলোকে এটা সূত্ৰ বনাইছে– দল ভাঙি, বিধায়ক ভাঙি, নেতাক জেললৈ পঠিয়াব। ভাবিছিল কেজৰিৱালক জেললৈ পঠিয়াই দিল্লীত চৰকাৰ গঠন কৰিব.. .কিন্তু তেওঁলোকে আমাৰ দলটো ভাঙিব নোৱাৰিলে… দলীয় কৰ্মীৰ পৰাও বিচ্ছিন্ন হ’ব নোৱাৰিলে।”
অৰবিন্দ কেজৰিৱালে দিল্লীৰ মুখ্যমন্ত্ৰী পদৰ পৰা কিয় পদত্যাগ নকৰিলে সেই সন্দৰ্ভতো সদৰী কৰিছে।
তেওঁ লগতে কয় যে দেশৰ গণতন্ত্ৰক ৰক্ষা কৰিব বিচৰাৰ বাবেই মই পদত্যাগ কৰা নাছিলো… তেওঁলোকে এটা নতুন সূত্ৰ তৈয়াৰ কৰিছে — য’তেই পৰাস্ত হয়, তাতেই মুখ্যমন্ত্ৰীক জেললৈ পঠিয়াই নিজৰ চৰকাৰ গঠন কৰে।
লগতে পঢ়কঃ চাকৰিৰ প্ৰলোভন দি যুৱতীক মাতি আনি হোটেলত ধৰ্ষণ! জিমৰ মালিকৰ বিৰুদ্ধে ৰুজু গোচৰ
অৰবিন্দ কেজৰিৱালে বিৰোধী দলৰ সকলো মুখ্যমন্ত্ৰীক মিছা অভিযোগত জেললৈ প্ৰেৰণ কৰিলে পদত্যাগ নকৰিবলৈ আবেদন জনায়।
যোৱা সপ্তাহত জামিনত মুকলি কৰি দিয়া হৈছিল কেজৰিৱালক। যোৱা ১১ মাৰ্চত দিল্লী আবকাৰী নীতিৰ গোচৰত ইডিয়ে গ্ৰেপ্তাৰ কৰিছিল।
