আই আই টিৰ জইণ্ট এন্ট্ৰেঞ্চ টেষ্ট, বা মেডিকেল জইণ্ট এন্ট্ৰেঞ্চ টেষ্টৰ দৰে প্ৰৱেশ পৰীক্ষাৰ বাবে সমগ্ৰ দেশতে কোচিং চেণ্টাৰসমূহ কাঠফুলাৰ দৰে গজি উঠিছে। যোৱা কেইবছৰমানৰ পৰা এই কোচিং চেণ্টাৰত অধ্যয়ন কৰা ছাত্ৰ-ছাত্ৰীৰ মাজত আত্মহত্যাৰ সংখ্যা ভয়ংকৰভাৱে বৃদ্ধি পাইছে। দেশৰ এই প্ৰশিক্ষণ কেন্দ্ৰসমূহৰ লেকামহীন বৃদ্ধি ৰোধ কৰিবলৈ আৰু তেওঁলোকৰ স্বেচ্ছাচাৰীতা নিয়ন্ত্ৰণ কৰিবলৈ কেন্দ্ৰই নতুন নিৰ্দেশনা জাৰি কৰে।
এই নীতি-নিৰ্দেশনা জাৰি কৰাৰ পিছত এতিয়াৰে পৰা যেতিয়াই তেতিয়াই যিকোনো স্থানত ব্যক্তিগত কোচিং চেণ্টাৰ খুলিব নোৱাৰিব। তাৰ বাবে চৰকাৰী পঞ্জীয়ন কৰিব লাগিব। লগতে ১৬ বছৰৰ তলৰ শিশুক এই কোচিং চেণ্টাৰত ভৰ্তি কৰিব নোৱাৰিব। কোচিং চেণ্টাৰে ছাত্ৰ-ছাত্ৰীৰ পৰা অত্যধিক মাচুলো দাবী কৰিব নোৱাৰিব।
কোচিং চেণ্টাৰ সম্পৰ্কীয় এই নতুন গাইডলাইন ইতিমধ্যে ৰাজ্য আৰু কেন্দ্ৰীয় শাসিত অঞ্চললৈ প্ৰেৰণ কৰা হৈছে। কিছুমান ৰাজ্যত ইতিমধ্যে কোচিং চেণ্টাৰ নিয়ন্ত্ৰণৰ আইন আছে। কেন্দ্ৰৰ নতুন নিৰ্দেশনা অনুসৰি IIT JEE, MBBS, NEET ৰ দৰে পেছাদাৰী পাঠ্যক্ৰমৰ বাবে কোচিং চেণ্টাৰত অট্টালিকাৰ অগ্নিকাণ্ড আৰু অন্যান্য সুৰক্ষা সম্পৰ্কে ‘আপত্তিহীন প্ৰমাণ পত্ৰ’ থাকিব লাগিব।
লগতে পঢ়কঃ গুজৰাটৰ নাও দুৰ্ঘটনাত নিহতৰ সংখ্যা ১৪ জনলৈ বৃদ্ধিঃ সাহায্য ঘোষণা
সেইদৰে, পৰীক্ষাৰ মানসিক চাপ আৰু সফলতা সম্পৰ্কীয় সমস্যা দূৰ কৰিবলৈ ছাত্ৰ-ছাত্ৰীক মানসিক আৰু মানসিক স্বাস্থ্য সম্পৰ্কিত সহায় দিব লাগিব। কঠোৰ প্ৰতিযোগিতা আৰু ছাত্ৰ-ছাত্ৰীৰ ওপৰত শৈক্ষিক চাপৰ পৰিপ্ৰেক্ষিতত প্ৰশিক্ষণ কেন্দ্ৰসমূহে ছাত্ৰ-ছাত্ৰীৰ কল্যাণৰ বাবে প্ৰয়োজনীয় পদক্ষেপ গ্ৰহণ কৰিব লাগিব। ছাত্ৰ-ছাত্ৰীক মানসিক চাপ আৰু হতাশাৰ পৰা ৰক্ষা কৰাটো তেওঁলোকৰ দায়িত্ব। প্ৰয়োজন হ’লে অভিজ্ঞ মনোবিজ্ঞানীৰ সহায় ল’ব লাগিব।
আনহাতে, কোনো কাৰণতে বিদ্যালয়লৈ যোৱা ছাত্ৰ-ছাত্ৰীক তেওঁলোকৰ বিদ্যালয়ৰ সময়ত কোচিং ক্লাছ কৰিব দিয়া নহ’ব। দিনটোত ৫ ঘণ্টাৰ অধিক সময় ক্লাছ ল’ব নোৱাৰিব। পুৱা সোনকালে বা গভীৰ নিশা কোনো ক্লাছ ল’ব নোৱাৰিব। উৎসৱৰ সময়ত ছাত্ৰ-ছাত্ৰী আৰু শিক্ষকসকলে এসপ্তাহৰ ছুটী লাভ কৰিব। কোচিং চেণ্টাৰসমূহে ছাত্ৰ-ছাত্ৰীসকলক পৰিয়ালৰ সৈতে সংযোগ স্থাপনৰ পৰ্যাপ্ত সুযোগ প্ৰদান কৰিব লাগিব।
তদুপৰি, পাঠ্যক্ৰমৰ সময়ত মাচুল বৃদ্ধি কৰিব নোৱাৰিব। যদি কোনো ছাত্ৰই সম্পূৰ্ণ ধন পৰিশোধ কৰাৰ পিছত পাঠ্যক্ৰমটো মাজভাগত এৰি দিবলৈ বিচাৰে, তেন্তে পাঠ্যক্ৰমৰ বাকী অংশৰ ধন ঘূৰাই দিব লাগিব। লগতে হোষ্টেল আৰু মেছৰ মাচুলো ঘূৰাই দিব লাগিব।
লগতে পঢ়কঃ কেন্দ্ৰৰ ঘোষণাঃ ৰাম মন্দিৰৰ উদ্বোধনীৰ বাবে ২২ জানুৱাৰীত অৰ্ধছুটী
যদি কোনো কোচিং চেণ্টাৰে গাইডলাইন অনুসৰি নাম পঞ্জীয়ন নকৰে আৰু অন্যান্য চৰ্ত উলংঘা কৰে তেন্তে কোচিং চেণ্টাৰসমূহে যথেষ্ট জৰিমনা ভৰিব লাগিব। প্ৰথমে নিয়ম উলংঘা কৰাৰ বাবে ২৫ হাজাৰ টকা দিব লাগিব। দ্বিতীয়বাৰৰ বাবে ভুল হ’লে ১ লাখ টকা। আৰু যদি তেওঁলোকে তৃতীয়বাৰৰ বাবে নিয়ম ভংগ কৰে তেন্তে তেওঁলোকৰ পঞ্জীয়ন বাতিল কৰা হ’ব।
শেহতীয়াকৈ ৰাজস্থানৰ কোটা কোচিং মাৰ্কেট আৰু অন্যান্য প্ৰধান কোচিং চেণ্টাৰত অভিযান্ত্ৰিক আৰু চিকিৎসা পৰীক্ষাৰ বাবে প্ৰস্তুতি চলোৱা ছাত্ৰ-ছাত্ৰীৰ মাজত আত্মহত্যাৰ ধাৰাবাহিকতা দেখা গৈছে। কেৱল ২০২৩ চনত কোটাত ২৬টা আত্মহত্যাৰ ঘটনা সংঘটিত হৈছে। পিছত একাংশ অভিভাৱক আৰু এন জি অ’ৰ হৈ উচ্চতম ন্যায়ালয়ত আবেদন দাখিল কৰা হয়। ইয়াৰ পিছতে কেন্দ্ৰীয় চৰকাৰে এই নতুন গাইডলাইন জাৰি কৰিছে।
