ভাৰতৰ তাৰকা অফ স্পিনাৰ ৰবিচন্দ্ৰন অশ্বিনে টেষ্ট কেৰিয়াৰত স্পৰ্শ কৰিছে ৫০০ উইকেটৰ ঈৰ্ষণীয় মাইলষ্ট’ন। ৰাজকোটত ইংলেণ্ডৰ বিৰুদ্ধে চলি থকা তৃতীয়খন টেষ্টত জেক ক্ৰ’লীৰ উইকেট দখল কৰি এই অনন্য কৃতিত্ব অৰ্জন কৰে অশ্বিনে।
কেৰিয়াৰৰ ৯৮ সংখ্যক টেষ্টত ২৩.৯৩ গড়ে ৫০০ উইকেট সম্পূৰ্ণ কৰে অভিজ্ঞ তাৰকাগৰাকীয়ে। ইয়াৰ লগে লগে অশ্বিন এই কৃতিত্ব অৰ্জন কৰা দ্বিতীয় ভাৰতীয় আৰু সামগ্ৰিকভাৱে বিশ্বম নৱমগৰাকী ক্ৰিকেটাৰ হিচাপে পৰিগণিত হয়।
তৃতীয় টেষ্ট আৰম্ভ হোৱাৰ পূৰ্বে অশ্বিনক ৫০০ উইকেটৰ বাবে মাত্ৰ এটা উইকেটৰ প্ৰয়োজন হৈছিল। ইংৰাজ অপেনাৰ ক্ৰ’লীক বিদায় দি অশ্বিনে বল তথা মেচৰ হিচাপত এই অনন্য সাফল্য অৰ্জন কৰা দ্বিতীয় দ্ৰুততম বলাৰ হিচাপেও ইতিহাস ৰচে।
সামগ্ৰিকভাৱে অশ্বিনে ২৫৭১৫ টা বল আৰু ৯৮ সংখ্যক মেচত ৫০০ উইকেটৰ গৰাকী হয়। অষ্ট্ৰেলিয়ান কিংবদন্তি গ্লেন মেকগ্ৰাথে ২৫৫২৮ টা বল আৰু শ্ৰীলংকান কিংবদন্তি মুত্তিয়া মুৰলীধৰণে মাত্ৰ ৮৭ খন টেষ্টত ৫০০ উইকেট দখলেৰে অনন্য অভিলেখ স্থাপন কৰি থৈছে।
লক্ষণীয়ভাৱে অশ্বিনৰ পূৰ্বে ভাৰতৰ হৈ কেৱল অনিল কুম্বলেৰ নামত আছিল ৫০০ উইকেটৰ কৃতিত্ব। ৬১৯ টা উইকেট দখলেৰে কুম্বলে টেষ্ট ইতিহাসত চতুৰ্থ সৰ্বাধিক উইকেটৰ গৰাকী। অশ্বিন এতিয়া টেষ্টত সৰ্বাধিক উইকেট দখলকাৰী বলাৰৰ তালিকাত নৱম স্থানত আছে।
মুৰলীধৰণ ৮০০ উইকেটেৰে এই তালিকাৰ শীৰ্ষত থকাৰ বিপৰীতে অষ্ট্ৰেলিয়ান কিংবদন্তি শ্বেন ৱাৰ্ণ ৭০৮ উইকেটেৰে দ্বিতীয় স্থানত আছে। ইয়াৰ পিছতে আছে ক্ৰমে ইংলেণ্ডৰ জেমছ এণ্ডাৰছন (৬৯৬), কুম্বলে (৬১৯), মেকগ্ৰাথ (৫৬৩), ৱেষ্ট ইণ্ডিজৰ কৰ্টনী ৱালছ (৫১৯) আৰু অষ্ট্ৰেলিয়াৰ নাথান লায়ন (৫১৭)।
উল্লেখ্য যে, মুৰলীধৰণৰ পিছতে অশ্বিন ১০০ খনতকৈও কম টেষ্টত ৫০০ উইকেট দখল কৰা মাত্ৰ দ্বিতীয়জন বলাৰ হিচাপে পৰিগণিত হয়। দ্ৰুততম ভাৰতীয় বলাৰ হিচাপে ৫০, ১০০, ১৫০, ২০০, ৩৫০, ৪০০ আৰু ৪৫০ টেষ্ট উইকেট দখল কৰা অশ্বিনে বিশ্বৰ দ্ৰুততম বলাৰ হিচাপে ২৫০ আৰু ৩০০ টেষ্ট উইকেট দখল কৰিছিল।
