অৱশেষত লক্ষ্যত উপনীত হৈছে ভাৰত। এছিয়াডত শতকৰ লক্ষ্য আজি পূৰ্ণ কৰিছে হাংঝ’ত। এছিয়ান গেমছৰ ইতিহাসত প্ৰথমবাৰৰ বাবে এইবাৰ ১০০ পদকৰ নিশ্চিত কৰিছে ভাৰতে। এইপৰ্যন্ত ভাৰতৰ তালিকাত ৯১ টা পদক সংযোগ হৈছে যদিও ইতিমধ্যে নিশ্চিত হৈ আছে ১০ টা পদক।
ইতিপূৰ্বে ভাৰতৰ সৰ্বশ্ৰেষ্ঠ এছিয়াড ৰেকৰ্ড আছিল জাকাৰ্টাত। ২০১৮ বৰ্ষৰ জাকাৰ্টা এছিয়াডত ভাৰতে লাভ কৰিছিল ৭০ টা পদক। এইবাৰৰ অদমনীয় প্ৰদৰ্শন অটুট ৰাখি আজি শতকীয় সংখ্যা স্পৰ্শ কৰে। আজি ভাৰতৰ বিশেষ সফলতা আহিছে কাবাডীত।
দেশৰ পুৰুষ আৰু মহিলা দুয়োটা দলে আজি ফাইনেলত প্ৰৱেশ কৰিছে । মহিলাৰ ছেমি ফাইনেলত ভাৰতীয় দলে নেপালক ৬১-১৭ ব্যৱধানত পৰাস্ত কৰি ফাইনেলত উপনীত হয়। আনহাতে পুৰুষৰ কাবাডী ছেমি ফাইনেলত ভাৰতে পাকিস্তানক ৬১-১৪ ব্যৱধানত পৰাস্ত কৰি গতি কৰে ফাইনেললৈ।
আনহাতে মল্লুযুঁজত মহিলাৰ ৬২ কেজি ফ্ৰীষ্টাইলত চীনৰ জিয়া লংক পৰাস্ত কৰি সোণমে ব্ৰঞ্জৰ পদক লাভ কৰে। আৰ্চাৰীত পুৰুষৰ ৰিকাৰ্ভ দলে ৰূপৰ পদক লাভ কৰাৰ বিপৰীতে মহিলাৰ ৰিকাৰ্ভ দলে ব্ৰঞ্জৰ পদক লাভ কৰে।
ছেপাকটাক্ৰ’ত ভাৰতীয় মহিলা দলে লাভ কৰিছে ব্ৰঞ্জৰ পদক। আনহাতে বেডমিণ্টনত এইচ এছ প্ৰণয় ছেমিফাইনেলত পৰাস্ত হোৱাৰ ফলশ্ৰুতিত ব্ৰঞ্জৰ পদকতে সন্তুষ্ট থাকে। লক্ষণীয়ভাৱে ১৯৮২ চনৰ পিছত এছিয়াড বেডমিণ্টনত পুৰুষৰ শাখাত এয়া প্ৰথমটো ব্যক্তিগত পদক।
ইতিপূৰ্বে পুৱাৰ ভাগত ৰুতুৰাজ গাইকোৱাড নেতৃত্বাধীন পুৰুষ ক্ৰিকেট দলে বাংলাদেশক পৰাস্ত কৰি ফাইনেলত প্ৰৱেশ কৰিছে। অহা শনিবাৰে অনুষ্ঠিত হ’বলগীয়া ফাইনেলত ভাৰত আফগানিস্তানৰ সন্মুখীন হ’ব।
