অসমত শাসকীয় দলৰ শেহতীয়া ফেচীবাদী কামকাজ আৰু আচৰণৰ সন্দৰ্ভত অসমৰ বিৰোধী ৰাজনৈতক দল তথা নাগৰিক সমাজকে ধৰি সচেতন ৰাইজক ইয়াৰ বিৰুদ্ধে থিয় হ’বলৈ আহ্বান জনাই অসম নাগৰিক সমাজৰ সভাপতি অজিত কুমাৰ ভূঞা আৰু সাধাৰণ সম্পাদক পৰেশ মালাকাৰে এক বিবৃতি প্ৰেৰণ কৰিছে। ইয়াত এই বিবৃতিটোৰ পূৰ্ণপাঠ হুবহু দাঙি ধৰা হ’ল-
‘অসমত এতিয়া পাঠ্যপুথিত বৰ্ণোৱাৰ দৰে এক ফেচিবাদী প্ৰৱণতা আমি প্ৰত্যক্ষ কৰা নাইনে? ধৰ্মীয় সংখ্যালঘুৰ একাংশক বাংলাদেশী বুলি অভিহিত কৰি আৰু কিমান দিনলৈ তেওঁলোকক অত্যাচাৰ আৰু অপমান কৰি থকা হ’ব? এনে এটা ধাৰণা দিব বিচৰা হয় যেন এই লোকসকলেই আমাৰ সকলো সমস্যাৰ কাৰক আৰু আমাৰ অস্তিত্বৰ প্ৰতি ভাবুকি। বলিসকল কেনেকৈ বিজয়ী হ’ব পাৰে? বিকৃত যুক্তিৰ কি এক ধ্ৰুপদী উদাহৰণ?
বাংলাদেশী বিদেশীৰ পৰা মুক্তি পাবলৈ ছবছৰীয়া অসম আন্দোলন হৈছিল। তাৰ পিছত ৰাতিটোৰ ভিতৰতে আছুৰ পৰা হোৱা অগপই দহ বছৰ অসম শাসন কৰিলে। ইয়াৰ পিছত অসমত ১৫ বছৰ ধৰি কংগ্ৰেছৰ চৰকাৰ চলিল আৰু তেতিয়া বৰ্তমানৰ মুখ্যমন্ত্ৰীগৰাকীয়েই অসম চুক্তি ৰূপায়ণৰ দায়িত্বত আছিল।
তাৰ পাছত আহিল মোডীৰ সেই বিখ্যাত ঘোষণা: ১৬ মে’, ২০১৪ৰ ভিতৰত সকলো বাংলাদেশীয়ে টালি-টোপোলা বান্ধি অসম এৰি যাব লাগিব। এতিয়া যোৱা দহ বছৰ ধৰি ক্ষমতাত আছে বিজেপি। কিন্তু তেওঁলোকে একো নকৰিলে৷ বৰং ভাষিক সংখ্যালঘুৰ একাংশক নাগৰিকত্ব প্ৰদানৰ বাবে ‘কা’’ আনিলে।
যেতিয়াই এটা নিৰ্বাচন আহে, ধৰ্মীয় সংখ্যালঘুসকলক বলিৰ পঠা সজাই সকলো অপযশ তেওঁলোকৰ ওপৰত জাপি দি সংখ্যাগৰিষ্ঠসকলৰ ভোট আদায় কৰিবলৈ বিচৰা হয়। ধৰ্মীয় সংখ্যালঘু লোসকলক ভাবুকি হিচাপে ব্যৱহাৰ কৰাটো বিজেপিৰ এটা চিৰাচৰিত ৰণকৌশল হৈ পৰিছে।
এতিয়া আৰু এখোপ আগুৱাই গৈ সাম্প্ৰদায়িক উত্তেজনা বিয়পাবলৈ খিলঞ্জীয়াৰ হাতত মাৰণাস্ত্ৰ তুলি দিয়াৰ কথা কোৱা হৈছে। কিন্তু আমি অসমৰ ক’ৰবাত গৃহযুদ্ধসদৃশ পৰিস্থিতি দেখা পাইছোঁ নেকি? তেন্তে কিয় এই সাম্প্ৰদায়িক ঘৃণাক প্ৰসাৰিত কৰি সাধাৰণ মানুহৰ মাজত উত্তেজনা সৃষ্টি কৰিবলৈ বিচৰা হৈছে?
আশাৰ কথা যে অ’ত ত’ত ঘটা দুই এটা সৰু-সুৰা ঘটনাৰ বাহিৰে সাধাৰণভাৱে অসমৰ জনসাধাৰণে ৰাজ্যৰ সকলো ঠাইতে নিজৰ মাজত শান্তি আৰু সৌহাৰ্দ্যৰ পৰিবেশ বজাই ৰাখিছে।
আমি বিৰোধী ৰাজনৈতিক দল আৰু নাগৰিক সমাজকে ধৰি শুভবুদ্ধিসম্পন্ন সকলো লোককে শাসকীয় দলৰ এই কুৎসিৎ চক্ৰান্তক গৰিহণা দিবলৈ আৰু ইয়াৰ বিৰোধিতা কৰিবলৈ আহ্বান জনাওঁ।‘
