মাতৃভাষাক ৰক্ষা কৰিবৰ বাবে অসম সাহিত্য সভাই লৈছে বহু পদক্ষেপ। আন্তৰ্জাতিক মাতৃভাষা দিৱস উপলক্ষে আজি অসম সাহিত্য সভাই কেতবোৰ ‘জংগী’ হোৱাৰ এক সংকল্প গ্ৰহণ কৰিছে। কাইলৈৰ পৰাই এই অভিযান আৰম্ভ কৰিব অসম সাহিত্য সভাই।
এই কথা সংবাদ মাধ্যমৰ আগত জানিবলৈ দি অসম সাহিত্য সভাৰ সভাপতি ড০ পৰমাননদ ৰাজবংশীয়ে কয়, ‘’কাইলৈৰ পৰা অসমৰ বচা বচা বিশ্ববিদ্যালয় আৰু প্ৰতিষ্ঠান তথা চৰকাৰী কাৰ্য্যালয়সমূহলৈ যাম। অসম সচিবালয়, জিলা উপায়ুক্তৰ কাৰ্য্যালয়লৈয়ো যোৱা হ’ব। আজিৰে পৰা সকলোকে সাৱধান কৰি দিছো আমি সকলোৱে অসমীয়া ভাষাত চিঠি লিখিম। চৰকাৰী টোকাসমূহতো অসমীয়া ভাষা লিখিবৰ বাবে আহ্বান জনাইছো।‘’
‘’কোনো বিষয়া কৰ্মচাৰীয়ে যদি নিলিখে আমি প্ৰথমতে আহ্বান জনাম। যদি এসপ্তাহ অথবা এমাহৰ পাছত আমাৰ এই কথা নুশুনে আমি অভদ্ৰামি কৰিমেই। সেইটো খাটাং।‘’ আন্তৰ্জাতিক মাতৃভাষা দিৱসৰ দিনাই এই হুংকাৰ দিছে অসম সাহিত্য সভাৰ সভাপতিগৰাকীয়ে।
ইপিনে মাতৃভাষাক শ্ৰদ্ধা কৰিবলৈ আহ্বান জনোৱাৰ বাবে যদি কোনোবাই তাৰ কাৰণে অপমান কৰে তেন্তে ‘আমি সাজু আছো‘ বুলিও তেওঁ কয়।
তেওঁ লগতে কয়, ‘‘ব্ৰহ্মপুত্ৰ উপত্যকাত অন্ততঃ অসমীয়া ভাষাত চিঠি অথবা চৰকাৰী টোকাসমূহ ব্যৱহাৰ কৰে তাৰ প্ৰতি দৃষ্টি ৰখা হ’ব। বৰাক উপত্যকাত বাংলা আৰু অসমীয়া,পাহাৰীয়া অঞ্চলসমূহত অসমীয়া আৰু ইংৰাজী ব্যৱহাৰ কৰিবৰ বাবে আহ্বান জনাইছো।‘’
প্ৰয়োজন সাপেক্ষে অসমীয়া ভাষা ব্যৱহাৰ নকৰা বিদ্যালয়-মহাবিদ্যালয়, চৰকাৰী কাৰ্য্যালয় অথবা অন্যান্য বিত্তীয় প্ৰতিষ্ঠানত তলা ওলোমাই দিয়াৰো হুংকাৰ দিয়ে ৰাজবংশীয়ে।
আনহাতে, অসমৰ হিন্দু বঙালীসকলক তেওঁ শ্ৰদ্ধা কৰে বুলিও এক মত পোষণ কৰে। ‘অসমৰ হিন্দু বাঙালীসকলক মই খুব শ্ৰদ্ধা কঁৰো। কিয়নো তেওঁলোকে নিজৰ মাতৃভাষাক খুব শ্ৰদ্ধা কৰে আৰু ভাল পায়। সেইকাৰণে বিশ্বৰ ভিতৰত সপ্তম স্থানত আছে বাংলা ভাষা। তেওঁলোকে নিজৰ মাতৃভাষাক ইমান ভাল পায় গতিকে আমি কিয় তেওঁলোকক বেয়া পাব লাগে?’ এইদৰে কয় ৰাজবংশীয়ে।
আমাৰ নিজস্ব স্বাভিমান আছে, কিন্তু আমি অসমীয়াসকলে নিজকে পাহৰি গৈছো। প্ৰাথমিক বিদ্যালয়ৰ পৰাই ইংৰাজী ভাষাতে লিখা হয় আবেদনখন। কিন্তু কিয়?
ৰাজবংশীৰ অভিযোগ ‘‘অসমীয়া বিভাগৰ শিক্ষকসকলেই অসমীয়াত আবেদনখন নিলিখে। গুৱাহাটী বিশ্ববিদ্যালয়ৰ অধিকাংশই অসমীয়া ভাষাত চিঠি অথবা আবেদন নিলিখে।‘‘ তদুপৰি, ইংৰাজী ভাষাৰ দাসত্বৰ পৰা আমি মুক্ত হ’ব পৰা নাই বুলি এক গুৰুত্বপূৰ্ণ মন্তব্য কৰে ৰাজবংশীয়ে।
প্ৰসংগক্ৰমে উল্লেখ কৰিব পাৰি যে, এই দিৱসৰ সৈতে সংগতি ৰাখি বিশিষ্ট নাট্যকৰ্মী নয়ন প্ৰসাদক শুক্ৰাচাৰ্য ৰাভা বঁটা প্ৰদান কৰা হয়। লগতে বিশিষ্ট সাংবাদিক প্ৰফুল্ল গোবিন্দ বৰুৱা আৰু ড০ শিৱনাথ বৰ্মনক প্ৰদান কৰা হয় অৰুণোদয় সন্মান। ভাগৱতী প্ৰসাদ বৰুৱা ভৱনত অনুষ্ঠিত হোৱা অনুষ্ঠানটোত শুক্ৰাচাৰ্য ৰাভাৰ পত্নীক বিশেষভাৱে সম্বৰ্ধনা জনোৱা হয়।
