আজি ৩০ অক্টোবৰ, অসমৰ ইতিহাসৰ এক ক’লা দিন। এই দিনটোতেই, ২০০৮ চনত, ধাৰাবাহিক বোমা বিস্ফোৰণত বহু লোকে প্ৰাণ হেৰুৱাইছিল আৰু বহুতো লোক চিৰদিনৰ বাবে ঘূণীয়া হৈ ৰৈছিল। সেই অভিশপ্ত দিনটোক স্মৰণ কৰি আজি সমগ্ৰ অসমত শ্ৰদ্ধাঞ্জলি অনুষ্ঠানৰ আয়োজন কৰা হৈছে।
২০০৮ চনৰ ৩০ অক্টোবৰৰ সেই ক’লা দিনটোত বড়ো উগ্ৰপন্থী সংগঠন এন ডি এফ বি (NDFB) এ গুৱাহাটীকে ধৰি অসমৰ বিভিন্ন স্থানত এই বৰ্বৰ কাণ্ড সংঘটিত কৰিছিল। গুৱাহাটীত ৫টা, বৰপেটা ৰোডত ২টা, বঙাইগাঁৱত এটা আৰু কোকৰাঝাৰত দুটাকৈ বোমা বিস্ফোৰণ হৈছিল। মুঠ ৯টা স্থানত সংঘটিত হোৱা এই বিস্ফোৰণৰত ৮১ জন নিৰীহ লোক নিহত হৈছিল আৰু প্ৰায় ৪৭০ জন লোক আহত হৈছিল। এই ধ্বংসলীলাই সমগ্ৰ অসমক কঁপাই তুলিছিল।
এই মৰ্মান্তিক ঘটনাই আজি ১৭ বছৰ অতিক্ৰম কৰিলে। প্ৰতিবাৰৰ দৰে এইবাৰো অসমৰ বিভিন্ন স্থানত শ্ৰদ্ধাঞ্জলি অনুষ্ঠানৰ আয়োজন কৰি নিহতসকলক স্মৰণ কৰাৰ লগতে তেওঁলোকৰ পৰিয়ালবৰ্গলৈ সমবেদনা জ্ঞাপন কৰা হয়।
এই ধাৰাবাহিক বিস্ফোৰণৰ মূল অভিযুক্ত আছিল ৰঞ্জন দৈমাৰী, যাৰ পৰিকল্পনা অনুসৰি এই ভয়ংকৰ হত্যাকাণ্ড সংঘটিত হৈছিল। কেন্দ্ৰীয় তদন্তকাৰী সংস্থা চিবিআই (CBI)এ এই কাণ্ডত মুঠ ১৫ জনক গ্ৰেপ্তাৰ কৰিছিল।
২০১০ চনত মুখ্য অভিযুক্ত ৰঞ্জন দৈমাৰী গ্ৰেপ্তাৰ হৈছিল। ২০১৮ চনৰ ২৯ জানুৱাৰীত গুৱাহাটীৰ বিশেষ আদালতে দৈমাৰীৰ লগতে আন কেইবাজনকো দোষী সাব্যস্ত কৰি যাৱজ্জীৱন কাৰাদণ্ড বিহিছিল।
অৱশ্যে, পাছলৈ উচ্চ ন্যায়ালয়ে কেইবাজনো অভিযুক্তক দোষমুক্ত ঘোষণা কৰে যদিও মূল অভিযুক্তসকলক শাস্তি বিহা হৈছিল, তথাপি এই হত্যাকাণ্ডৰ ভয়াবহতাৰ তুলনাত শাস্তি পৰ্যাপ্ত নহয় বুলি আজিও অসমবাসী অসন্তুষ্টি প্ৰকাশ কৰে।
৩০ অক্টোবৰৰ এই বেদনাদায়ক স্মৃতিয়ে আজিও অসমীয়াৰ মনত সন্ত্ৰাস আৰু শোকৰ গভীৰ দাগ এৰি থৈ গৈছে।
