অসমৰ সকলো খিলঞ্জীয়া সংগঠনে সৰ্বাত্মক বিৰোধিতা কৰা বিজেপি উত্থাপিত নাগৰিকত্ব বিধেয়ক ২০১৬ৰ বিৰোধিতাৰে সোচ্চাৰ হৈ অহা মীৰা বৰঠাকুৰক বহিষ্কাৰ কৰিছে অসম বিজেপিয়ে।
বৰঠাকুৰক দলৰ প্ৰাথমিক সদস্য পদৰ পৰা বৰ্খাস্ত কৰা বুলি ৰাজ্যিক বিজেপিৰ সাধাৰণ সম্পাদক দিলীপ শইকীয়াই বুধবাৰে এক বিবৃতি জাৰি কৰিছে।
‘বিগত সময়ত দলৰ নীতি আৰু স্থিতিৰ বিৰুদ্ধে অৱস্থান কৰা’ৰ বাবে বৰঠাকুৰক দলৰ পৰা বহিষ্কাৰ কৰা হৈছে, বিবৃতিটোত উল্লেখ।
ধৰ্মৰ ভিত্তিত বিদেশীক দেশৰ নাগৰিকত্ব প্ৰদানৰ বাবে উত্থাপিত বিধেয়কখনৰ বিৰুদ্ধে দল-সংগঠনৰ প্ৰতিবাদটো যোগ দিয়াৰ উপৰি বিধেয়ক বিৰোধিতাৰে ৰাজ্যজুৰি স্বাক্ষৰ সংগ্ৰহৰ অভিযানো চলাইছিল বহিষ্কৃত বৰঠাকুৰে।
বহিষ্কাৰৰ খবৰ পোৱাৰ লগে লগে নৰ্থ ইষ্ট নাও-ত বিষয়টো সন্দৰ্ভত প্ৰতিক্ৰিয়া প্ৰকাশ কৰিছে নেত্ৰীগৰাকীয়ে।
‘‘মই যেতিয়া ‘প্ৰত্যাহ্বানৰ ৰাজনীতি’ নামৰ কিতাপখন লিখিছিলো, তেতিয়াই মোক বহিষ্কাৰ কৰিব লাগিছিল। সেইখন এখন দলিল। তাত মোক বহিষ্কাৰ কৰাৰ বাবে কোনো ক্লু বিচাৰি নাপালে। কিন্তু মই নাগৰিকত্ব সংশোধনী বিধেয়কখনক প্ৰত্যাহ্বান জনাইছিলো আৰু দ্বিতীয়তে সাংসদ ৰাজেন গোহাঁইৰ বিৰুদ্ধে উত্থাপিত ধৰ্ষণৰ অভিযোগ সন্দৰ্ভত প্ৰধান মন্ত্ৰী মোদীলৈ পত্ৰ প্ৰেৰণ কৰিছিলো; এই দুটাকে ‘ক্লু’ হিচাপে লৈ তেওঁলোকে মোক বৰ্খাস্ত কৰিছে,’’ মন্তব্য মীৰা বৰঠাকুৰৰ।
উল্লেখযোগ্য যে ধৰ্ষণৰ অভিযোগ উঠা কেন্দ্ৰীয় ৰাজ্যিক ৰে’ল মন্ত্ৰী ৰাজেন গোহাঁইৰ বিৰুদ্ধে ব্যৱস্থা গ্ৰহণৰ বাবেও প্ৰধান মন্ত্ৰী মোদীলৈ পত্ৰ লিখিছিল বিজেপি নেত্ৰীগৰাকীয়ে।
ৰাজ্যিক বিজেপিৰ মহিলা মৰ্চাই গ্ৰহণ কৰা প্ৰস্তাৱ ৰাজ্যিক অনুশাসন সমিতিয়ে বিশদভাৱে পৰ্যালোচনা কৰি তেওঁৰ বিৰুদ্ধে এই ব্যৱস্থা গ্ৰহণ কৰিছে বুলি দলে জাৰি কৰা নিৰ্দেশটো প্ৰতিক্ৰিয়া প্ৰকাশ কৰিছে বৰঠাকুৰে।
‘‘সভাপতি ৰঞ্জিত দাসে মোক বহিষ্কাৰ কৰাৰ সিদ্ধান্ত লোৱা হ’লে মোৰ ক’বলগীয়া একো নাছিল। মহিলা মৰ্চাই মোক বহিষ্কাৰৰ বাবে লোৱা প্ৰস্তাৱ অনুসৰি দলে এই সিদ্ধান্ত লোৱা বুলি মোলৈ পঠোৱা পত্ৰখনত উল্লেখ আছে। কিন্তু এই সিদ্ধান্তটো দলৰ সভাপতিয়ে ল’ব নোৱাৰাটো বিজেপিৰ দৰে এটা দলৰ বাবে দুৰ্ভাগ্যজনক কথা,’’ জনালে বৰঠাকুৰে।
আনহাতে বিজেপিৰ অনুশাসন সমিতিৰ ‘কিছুমান কথা’ ফাদিল কৰাৰ বাবে বৃ্হস্পতিবাৰে দিচপুৰ প্ৰে’ছ ক্লাবত এক সংবাদ মেলৰ আয়োজন কৰা বুলিও সদৰী কৰিছে বৰঠাকুৰে।
নাগৰিকত্ব বিধেয়কৰ বিৰুদ্ধে মীৰা বৰঠাকুৰে কৰা মন্তব্যই ৰাজ্যজুৰি জনসাধাৰণৰ ব্যাপক ধনাত্মক সঁহাৰি লাভ কৰিছিল।
এনে পৰিস্থিতিত ‘জাতি-মাটি-ভেটি’ ৰক্ষাৰ প্ৰতিশ্ৰুতিৰে শাসনলৈ অহা দলটোৱে জনপ্ৰিয় নেত্ৰী এগৰাকীক তেওঁৰ ৰাজনৈতিক অৱস্থানৰ বাবে বহিষ্কাৰ কৰাটোৱে বিজেপিৰ ৰাজনৈতিক শ্ল’গানতে প্ৰশ্নবোধক চিন আৰোপ কৰিছে।
