ক্ষমতাৰ ৰাগীত বলীয়ান হৈ আইন ৰক্ষক আৰক্ষীকে আক্ৰমণ কৰা বিজেপিৰ নেত্ৰী দীপাঞ্জলী কাকতি মৰাণক অৱশেষত আৰক্ষীয়ে গ্ৰেপ্তাৰ কৰিলে।
কেন্দ্ৰীয় নিৰ্বাচন আয়োগে অসমত নিৰ্বাচনৰ দিন ঘোষণা কৰাৰ লগে লগে ৰাজ্যত বলবৎ হৈছে নিৰ্বাচন বিধি।
এনে সময়তে দিছপুৰৰ হেঁচাৰ পৰা মুক্ত হৈ আৰক্ষীয়ে বিজেপি নেত্ৰীগৰাকীক গ্ৰেপ্তাৰ কৰিবলৈ সক্ষম হোৱা বুলি এতিয়া বিভিন্ন মহলত আলোচনা হোৱা পৰিলক্ষিত হৈছে।
বিজেপিৰ ৰাজ্যিক কাৰ্যনিবাহকৰ সদস্যা দীপাঞ্জলী কাকতি মৰাণে বিগত বৰ্ষৰ নৱেম্বৰ মাহত তিনিচুকীয়া জিলাৰ কাকপথাৰ থানাৰ উপ-পৰিদৰ্শক অপূৰ্ব দাসক কৰ্তব্যৰত অৱস্থাতে প্ৰহাৰ কৰিছিল।
নিজকে মুখ্যমন্ত্ৰী সৰ্বানন্দ সোণোৱালৰ ঘনিষ্ঠ ব্যক্তি বুলি জাহিৰ কৰি বিজেপি নেত্ৰী গৰাকীয়ে আৰক্ষী বিষয়া গৰাকীক নিলম্বিত কৰাৰ ভাবুকি দিছিল আৰু প্ৰহাৰ কৰিছিল।
কৰ্তব্যৰত আৰক্ষী বিষয়াক দলীয় প্ৰভাৱ খটুৱাই প্ৰহাৰ কৰাৰ কথাই ৰাজ্য জুৰি তীব্ৰ প্ৰতিক্ৰিয়াৰ সৃষ্টি কৰিছিল।
বিজেপি নেত্ৰীগৰাকীয়ে প্ৰহাৰ কৰা আৰক্ষী বিষয়া অপূৰ্ব দাসে বিগত বৰ্ষৰ ৮ নৱেম্বৰতে দীপাঞ্জলী কাকতি মৰাণৰ বিৰুদ্ধে এজাহাৰ দাখিল কৰিছিল যদিও ৰহস্যজনক কাৰণত নেত্ৰীগৰাকীক গ্ৰেপ্তাৰ কৰা হোৱা নাছিল।
অৱশেষত ৰাজ্যত নিৰ্বাচনী আচৰণ বিধি বলবৎ হোৱাত আৰক্ষীয়ে সকলো ‘হেঁচা’ৰ উৰ্দ্ধলৈ গৈ বিজেপি নেত্ৰীগৰাকীক গ্ৰেপ্তাৰ কৰিবলৈ সক্ষম হয়।
শনিবাৰে তিনিচুকীয়াৰ বাসভৱনৰ পৰা তিনিচুকীয়া আৰক্ষীয়ে বিজেপি নেত্ৰীগৰাকীক গ্ৰেপ্তাৰ কৰে।
তাৎপৰ্যপূৰ্ণ ভাবে আৰক্ষীক প্ৰহাৰ কৰা দীপাঞ্জলী কাকতি মৰাণৰ বিৰুদ্ধে ব্যাপক প্ৰতিবাদ হোৱাৰ পিছতে বিজেপিয়ে তেওঁক দলৰ পৰা নিলম্বিত কৰিবলৈ বাধ্য হৈছিল।
এটা মাৰপিটৰ ঘটনাত বিজেপি নেত্ৰীগৰাকীৰ গাড়ী চালকজনক আটক কৰাৰ পিছতে নেত্ৰীগৰাকীয়ে কাকপথাৰ থানালৈ গৈ আৰক্ষীৰ সৈতে অভদ্ৰ ব্যৱহাৰ কৰিছিল।
কাকপথাৰত নৈৰাজ্যৰ সৃষ্টি কৰা নেত্ৰীগৰাকীক অৱশেষত আৰক্ষীয়ে গ্ৰেপ্তাৰ কৰাৰ সৎ সাহস দেখুওৱাত বিভিন্ন জনে সন্তোষ প্ৰকাশ কৰিছে।
