সুৰাপান কৰি গাড়ী চলাই আৰক্ষীৰ হাতত আটক হৈছে বিজেপিৰ বিধায়ক তথা ৰাজ্যৰ প্ৰাক্তন মন্ত্ৰী ৰঞ্জিত দত্তৰ পুত্ৰ।
শুকুৰবাৰে নিশা মদ্যপান কৰি গাড়ী চলোৱাৰ অভিযোগত যোৰাবাট অঞ্চলত আৰক্ষীয়ে আটক কৰে বিধায়কজনৰ পুত্ৰক।
সূত্ৰ অনুসৰি, ৰঞ্জিত দত্তৰ পুত্ৰ দীপজ্যোতি দাসৰ লগতে তেওঁৰ সৈতে বাহনত থকা আন দুজন লোকক আৰক্ষীয়ে আটক কৰে।
যান-বাহন শাখাৰ নিয়মীয়া পৰীক্ষাৰ সময়ত আৰক্ষীয়ে আটক কৰে তেওঁলোকক।
আৰক্ষীয়ে আটাইকেইগৰাকীৰে ব্ৰেথালাইজাৰ পৰীক্ষাত মদ্যপানৰ মাত্ৰা ১২০ৰ ওপৰত আছিল বুলি ধৰা পেলায়।
তেওঁলোকৰ বাহনখনো জব্দ কৰি যোৰাবাট আৰক্ষী আউটপোষ্টত ৰখা হয়।
AS32A3333 নম্বৰৰ টয়োটা ফৰ্চুনাৰ গাড়ীখন দীপজ্যোতিৰ নামত পঞ্জীয়ন কৰা হৈছিল।
বাহনখনত তাত বিজেপিৰ যুৱ শাখা ভাৰতীয় জনতা যুৱ মৰ্চাৰ ষ্টীকাৰ লাগি থকা বুলি প্ৰকাশ পাইছে।
তিনিওজনে অতি তীব্ৰ বেগেৰে গাড়ী চলাই নগাঁৱৰ দিশৰ পৰা গুৱাহাটী অভিমুখে আহিছিল বুলি জানিব পৰা গৈছে।
এই সন্দৰ্ভত আৰক্ষীয়ে এতিয়াও অধিক সবিশেষ প্ৰকাশ কৰা নাই।
